Pagsabut Unsay Buhaton sa mga Kausaban

Pagsugod sa pag-eskwela. Pagbiya sa Primary. Pag-adto sa Templo. Pagsulod og bag-ong trabaho. Paggradwar sa high school. Pagserbisyo og misyon.

Kini mao lang ang pipila sa importanting panghitabo nga mahimong masugatan sa kinabuhi sa inyong mga anak, ug silang tanan nagkinahanglan og espesyal nga pagpangandam. Ang mga kausaban mahimo nga makahahadlok, apan ang pipila ka mga himan makatabang nato sa pagsunod niini nga malampuson. Ania ang pipila ka mga sugyot sa pagtabang kaninyo sa paggiya sa inyong mga anak agi sa mga kausaban sa kinabuhi.

Paminawa ang ilang mga pagbati mahitungod sa kausaban. Pangutan-a sila kon unsay ilang ganahan ug unsay ilang gikahadlokan. Pagmaawhagon apan masinabuton sa ilang mga kabalaka. Usahay ang ilang gikinahanglan mao ra nga dunay maminaw aron sila mobati nga malinawon sa umaabut nga kausaban.
Hatagi sila og daghang impormasyon kutob sa mahimo kon unsay ilang mapaabut uban sa butang nga bag-o. Pananglitan, kon ang inyong anak mohimo og mga bunyag sa templo sa unang higayon, hatagi sila og sunod-sunod nga pagpasabut kon unsay mahitabo kon sila anaa na sa sulod sa templo. Kon kamo mobalhinay ngadto sa bag-ong siyudad, susiha kon unsay inyong mahimo mahitungod sa ilang bag-o nga eskwelahan, ward, ug kasilinganan. Kon kamo mopagamay sa mga butang nga wala mahibaloi, inyong gikuha ang mga tinubdan sa kabalaka. Ang ilang bag-ong kahibalo makatabang kanila nga makasabut sa bag-ong kasinatian nga ilang maangkon.
Paghimo og plano sa pagdumala sa bag-ong mga sitwasyon. Hunahunaa daan ang potensyal nga mga problema ug paghunahuna og mga paagi sa pagsagubang niini. Tabangi ang mga anak nga maghunahuna og mga solusyon sa ilang mga pangutana “Unsa kaha kon”: “Unsa kaha kon ako makasakay sa sayop nga bus?” “Unsa kaha kon ako mingawon diha sa kamping?” “Unsa kaha kon dili ko ganahan sa akong bag-ong magtutudlo?” Paghimo og laing emerhensiya nga plano aron sila mobati nga komportable: “Kon ikaw kapuyon na pag-ayo, tawga ko ug ako moanha ug mokuha nimo.” “Kon ang usa ka klase lisud kaayo, atong istoryahon ang imong magtutudlo mahitungod niini.”
Motabang nila sa pagkontrol pinaagi sa pagpahinumdom nila sa importante nga mga butang nga ilang naagian kaniadto ug sa mga himan nga anaa kanila karon sa pagtabang nila nga magmalampuson. Paggamit sa positibo, maawhagon nga pinulongan: “Ikaw nakalagpas niana; ikaw makalagpas niini!” Makahimo ka sa lisud nga mga butang.” “Ikaw aduna sa unsay imong gikinahanglan. Ikaw andam na.” “Ako mituo nimo.”
Hatagi sila og kasiguroan nga ma-OK ra ang tanan. Daghang mga tawo ang nakabuntog sa susamang mga pakigbisog; tingali sila usab makabuntog! Pahinumdumi sila nga sila makaampo ngadto sa ilang Langitnong Amahan alang sa panabang bisan kanus-a, bisan asa, mahitungod sa bisan unsa.
Paghimo og sistema sa pagsuporta aron ang inyong mga anak dili mobati nga nag-inusara sa ilang pakigbisog. Kon kamo nakasinati og susamang butang, sultihi sila mahitungod niini. Unsay inyong gibati? Giunsa ninyo sa pagpahiangay? Sulayi ang pagpangita og tawo nga mahimong “higala” sa inyong mga anak. Makakita ba sila og higala nga ikauban sa ilang bag-o nga klase sa Primary? Aduna bay tawo nga inyong nailhan kinsa motudlo kanila pinaagi sa ilang trabaho o sa klase? Kinsa ang mahimo nilang kauban sa kwarto sa kolehiyo?
Agad-agara sila. Ang inyong anak tingali magkinahanglan og gamay nga pag-awhag o bisan pahimangno sa paghinay-hinay, apan ayaw kaayo sulayi sa pag-usab ang ilang natural nga lakang. Sunda ang ilang padulngan. Kon sila gusto nga mobuhat niini uban sa ilang tanang kusog, siguroha nga sila aduna sa tanan nga gikinahanglan sa pagbuhat sa ingon. Kon wala sila mobati nga andam nga mopadayon pa, ayaw sila pugsa sa pag-apil sa hingpit. Awhaga sila sa malumo nga mohimo og mga butang nga dili sila komportable, apan paghinay-hinay lang. Sinatia ang mga panginahanglan sa inyong mga anak, ug mangayo og giya sa Espiritu aron masayud unsaon nga mas labing makatabang kanila.