Ang Pinakanindot nga Gasa nga Akong Mahatag
Sa dihang ang akong pamilya ug ako nagsugod sa pagtambong sa Ang Simbahan ni Jesukristo sa mga Santos sa Ulahing mga Adlaw, akong gibati sa akong kasingkasing nga ang akong mama migiya kanamo didto.
Si mama namatay sa wala damha sa Adlaw sa Pasko duha ka tuig na ang milabay. Matinud-anon kaayo siya ug mapainubsanong sumusunod ni Jesukristo, apan siya wala gayud makakat-on mahitungod sa gipahiuli nga ebanghelyo. Human sa 11 ka bulan sa pagkat-on mahitungod sa Simbahan, ang akong bana, nga si Navid, ang akong anak nga babaye, si Katie, ug ako nabunyagan sa adlaw sa Pasko. Unsay makausa nahimong usa ka adlaw sa kagul-anan tungod sa pagkamatay sa akong inahan karon mao ang usa ka adlaw sa kalipay alang sa among pamilya tungod sa among bag-ong kinabuhi diha sa ebanghelyo.
Daghang mga tawo ang mitambong sa among bunyag. Nakalitan ko nga nakakita og sobra sa 100 ka tawo didto sa mga alas 10:00 sa Pasko sa buntag! Gibati namo nga gihigugma pag-ayo.
Sa wala pa ang among bunyag, ang temple ug family history specialist sa stake mitabang nako sa pag-andam sa ngalan sa akong inahan ug mga ngalan sa pipila nga mga katigulangan aron dad-on sa templo alang sa bunyag.
Kawhaan ug lima ka adlaw human sa among bunyag, sa Enero 19, 2018, adlawng natawhan sa akong mama, ang among unang biyahe ngadto sa Newport Beach California Temple. Gikulbaan ko ug wala masayud unsay angayang mapaabut, apan dihang misulod ko sa templo, akong gibati ang hilabihan nga kahilom. Ingon og walay laing samang lugar ang akong naadtoan. Ang among grupo nagpundok diha sa bunyaganan, diin ang presidente sa templo mipasabut sa kaimportante sa bunyag alang sa mga patay ug sa mga panalangin niini. Naghilak ko sa paghunahuna sa kalipay sa unsang paagi kining mga bunyag makapanalangin sa among pamilya.
Human mabunyagi si Navid alang sa pipila ka mga miyembro nga lalaki sa akong pamilya, siya mibunyag kanako para sa uban nga mga babaye nga sakop sa pamilya. Ang unang tawo nga akong gi-proxy mao ang akong minahal, buotan nga inahan. Sa dihang akong nadungog ang mga pulong “kinsa patay na,” nakahilak ko. Sa pagkadungog niini nakapahimo sa iyang kamatayon nga tinuod nga masakit. Apan dayon ako naghunahuna, unsa kadako nga gasa nga akong mahatag sa akong inahan sa iyang adlawng natawhan kay sa gasa sa bunyag sa templo?
Naghandom pa ko sa daghan pang biyahe ngadto sa templo. Mapasalamaton ko nga masayud nga ako makatabang paghatag og panalangin ngadto niadtong kinsa nag-una kanako pinaagi sa mga ordinansa sa templo. Pagkaanindot nga gasa!