Ang Nabuak nga Belen sa Pasko
Gihulagway ni Rose Datoc Dall
Isip usa ka bata, maghinam-hinam ko alang sa Pasko. Sa dihang si Mama mipagawas sa mga kahon sa dekorasyon, ang akong lima ka igsoong lalaki ug ako nasayud nga nagsugod na ang Pasko. Kanunay namong ipahimutang ang christmas tree isip pamilya. Nakahinumdom gihapon ko sa dekorasyon nga hinimo sa kamot ug sa daghang sinaw nga kinoloran nga mga bolang mabuak.
Hinoon, usa ka bahin sa dekorasyon si Mama maoy mismo mihimo. Ang akong lola mihimo og maanindot nga puting porsilana nga belen sa pasko alang ni Mama. Matag tuig, si Mama mopahimutang sa belen sa pasko diha sa dakong bato ibabaw sa fireplace sa sala. Ganahan ko nga maglingkod ug magtan-aw kaniya nga mopahimutang sa matag hulagway. Ubos sa matag hulagway, butangan niya og gamay nga puting suga gikan sa kutay sa mga suga. Gipapilit niya ang usa ka tumoy sa mga suga ngadto sa bato aron dili matagak, ug dayon iyang ipaslak sa outlet sa luyo sa lingkuranan sa kilid. Kon mahayagan na ang bato, nindot kaayo tan-awon!
Usa ka gabii, hapit na ang Pasko, ang akong igsoong mga lalaki nagkiat. Ang mas magulang migukod sa iyang manghud nga igsoon. Taliwala sa gukdanay, mitago siya luyo sa lingkuranan tupad sa bato. Sa dihang nakit-an siya sa akong igsoong lalaki, midali siya sa pag-ikyas, apan ang iyang tiil nasangit sa kutay sa mga suga ilawom sa talan-awon sa belen sa pasko. Ang gagmay nga piraso sa tape wala makapugong sa pagbira sa iyang tiil. Ang delikado nga belen sa pasko nahagbong gikan sa bato ngadto sa pula nga bika sa ubos, nangabuak.
Nagdali si Mama padulong sa sala. Sa dihang nakita niya kon unsa ang nahitabo, nakahilak siya ug misulod sa iyang kwarto. Nasayud siya nga kadto aksidente, apan ang kadaut nahimo na.
Nianang pagkagabii, sa dihang naghigda na kaming tanan, si Papa mikuha og dustpan ug silhig ug mainampingong misilhig sa nabuak nga mga piraso. Dayon siya wala matulog nga nagpapilit sa mga piraso.
Ang belen sa pasko makita nga dunay mga buak. Ang baka nawala ang dunggan. Ang usa sa mago nawad-an og piraso sa iyang nawong. Ang usa sa magbalantay mas daghan og papilit kay sa porsilana sa pila ka bahin. Apan, sa milagrosong paagi, ang nangabuak nga mga hulagway naayo.
Si Lola mitanyag nga mohimo og bag-ong belen sa pasko, apan mibalibad si Mama. Giingnan ni Mama si Lola nga ang iyang belen sa pasko mas dakog kahulugan ngadto kaniya karon. Nagsilbi kini nga usa ka simbolo sa debosyon sa iyang mahigugmaong bana ug usa ka pahinumdom sa atong mahigugmaong Manluluwas.
Samtang kita makigbisog niini nga kinabuhi, kita mahimong mabuak sa pipila ka paagi. Gani bation nato nga ang nangabuak dili na maayo nga mga piraso. Apan kita adunay Manluluwas, ug kita mahimong tibuok pinaagi sa Iyang mahigugmaong mga kamot.