Fatu Gamanga

Silangang Probinsya, Sierra Leone

Pinaagi sa programa sa literasiya sa ebanghelyo, si Fatu nakakat-on dili lamang mobasa ug mosulat, apan siya usab nakat-on mahitungod sa ebanghelyo ni Jesukristo. Sa wala pa magpasakop sa Simbahan, si Fatu naglisud sa pagsuporta sa iyang pamilya. Karon siya nakapalambo og mga kahanas sa pagbarug sa kinaugalingong paningkamot ug nagdumala sa iyang kaugalingong negosyo sa paghimo ug pagpamaligya og nindot nga hinimo sa kamot nga mga trapo. Siya nagserbisyo usab isip presidente sa Relief Society sa iyang branch.

Christina Smith, tiglitrato

Gamay pa ako nga bata sa dihang namatay ang akong amahan. Lisud nga walay amahan. Ang akong inahan naningkamot sa pagsuporta sa iyang pamilya, apan wala siyay igong kwarta sa pagpaeskwela nako. Nabugnaw ko tungod kay kinahanglan kong mohunong sa pagkat-on ug ako wala gayud makakat-on sa pagbasa. Ang akong inahan ug ako naningkamot sa pagbuhat og daghan nga mga butang sa among balangay, sama sa pagtrabaho sa uma, sa pagsuporta sa among kaugalingon. Sulod sa katuigan, naglisud mi.

Sa katapusan naminyo ko ug nakabaton og mga anak. Daghang tuig ang milabay, ang akong bana namatay, ug naglisud ko isip single nga ginikanan sa pag-atiman sa akong mga anak.

Ang akong mga higala miduol nako ug miingon, “Namatay ang imong bana. Karon ikaw nag-antus. Gusto kami nga modapit nimo sa among simbahan aron makita unsay mahimo ni Jesus alang kanimo.” Misunod ko sa akong mga higala ngadto sa ilang simbahan. Miadto usab ko sa ubang mga simbahan.

Usa ka adlaw, usa ka babaye gikan sa pipila lang ka balay ang miduol nako ug miingon, “ako adunay usa ka simbahan. Makaadto ka ba?”

“Dili,” miingon ko, “misulay nako sa pag-adto og lain-laing simbahan.”

“Palihug,” ang babaye miingon, “Gusto ko nga modapit nimo sa akong simbahan.”

“Unsay tawag sa imong simbahan?” Nangutana ako.

“Ang akong simbahan mao Ang Simbahan ni Jesukristo sa mga Santos sa Ulahing mga Adlaw.”

Siya mikombinser nako nga magkat-on pa. Gidapit niya ang mga misyonaryo nga mobisita nako. Sa unang adlaw miabut ang mga misyonaryo, akong gitawag ang akong pamilya. Ang mga misyonaryo milingkod ug nagsugod sa pagtudlo kanamo.

Sa unang higayon nga misimba ko, naglingkod ko tupad sa usa ka babaye nga nagkanta gikan sa libro sa himno. Naningkamot ko sa paghatag og pagtagad, apan dili ko kamao nga mobasa. Wala gani ko makasabut unsay iyang gikanta. Nabugnaw ko. “Dili na ko moanhi niini nga simbahan pag-usab,” miingon ko sa akong kaugalingon.

Giingnan nako ang mga misyonaryo nga dili na ko moadto sa simbahan pag-usab. Usa ka misyonaryo miingon, “dili ko mamugos nimo nga mahimong usa ka miyembro sa Simbahan, apan ako mosulti nimo sa kamatuoran. Kon gusto nimong motuo nga kini nga Simbahan tinuod, basaha kini nga libro.” Gihatag niya kanako ang Basahon ni Mormon.

“Dili ka makahatag niini nga libro kanako,” miingon ko. Wala koy grado. Dili gani ko makamaong mobasa. Wala ko magkinahanglan sa inyong libro.”

Ang mga misyonaryo misulti nako, “ang imong mga anak nagkat-on sa pagbasa. Sila mobasa niini alang kanimo, ug ikaw makasabut.”

“Akong sulayan,” miingon ko.

Akong anak nga babaye nagsugod sa pagbasa sa Basahon ni Mormon ngari kanako, ug miadto ko sa simbahan pag-usab. Usa ka sister sa simbahan miduol nako ug misulti kanako kabahin sa usa ka klase alang niadtong kinsa dili makamaong mobasa ug mosulat. Miingon siya nga kini mao ang klase sa literasiya sa ebanghelyo.

“Nagkinahanglan mi og usa ka estudyante,” miingon siya.

“Ako gusto gayud nga makahibalo unsaon sa pagbasa ug pagsulat,” miingon ko. “Busa motambong ko sa klase!”

Samtang mitambong ko sa klase, ako nakat-on sa pagbasa, pagsulat, ug dugang pa mahitungod sa ebanghelyo. Ang akong anak nga babaye mibasa pa gikan sa Basahon ni Mormon ngari kanako. Usa ka adlaw miingon ko, “Kini mao ang pulong sa Dios. Dili ko makalimud niini.” Nakahukom ako nga magpabunyag.

Sa wala madugay human sa akong bunyag, ang presidente sa branch mitawag nako ug miingon, “Sister Gamanga, ang Espiritu migiya nako nga motawag kanimo nga mahimong presidente sa Relief Society.”

“Wala ko kahibalo unsay imong gipasabut,” miingon ko. “Dili ko makamaong mobasa, dili ko makamaong mosulat, ug ikaw motawag kanako? Unsa ang kahulugan niana?”

Mipasabut siya nga akong dapiton ang mga babaye ngadto sa simbahan, makigsulti kanila ug motabang kanila. “Uban sa Dios, mahimo nako kini,” miingon ko.

Sukad nianang adlawa, daghan nga mga butang ang nahitabo sa akong kinabuhi. Nagsugod ko sa pagbasa sa duha ka letra nga pulong, dayon tulo ka letra nga pulong. Dayon gikan sa tulo ka letra nga pulong ngadto sa upat ka letra nga pulong, dayon lima ngadto sa unom ka letra nga pulong. Kini nakatabang kanako sa pagtudlo sa Relief Society.

Kon adunay usa ka butang nga dili nako masabtan, mangayo ko og tabang. Ang akong problema mao ang spelling. Dili ko makamao unsaon sa paglitok sa pipila ka spelling, apan makakuha ko og tabang mao nga makasabut ko. Kon magtudlo ko, mohangyo ko sa mga sister sa Relief Society sa pagtabang nako sa bisan unsa nga mga pulong nga wala nako mahibaloi. Kana mao ang paagi sa akong pagtudlo sa klase. Matag higayon nga ako mangayo og tabang, ako makat-on pa.

Sa wala pa ko mamiyembro sa Simbahan, naningkamot ko sa pagpamaligya og mga trapo nga hinimo sa kamot, apan wala koy kwarta nga ipalit sa materyal. Sultihan nako ang mga tawo, “Kon gusto mo og trapo, palita ang materyal ug dad-a dinhi nako, dayon himoon kini nako alang ninyo. Mobayad mo nako kon kini mahuman.”

Karon nga nia ko sa Ang Simbahan ni Jesukristo sa mga Santos sa Ulahing mga Adlaw, nakat-on ako kabahin sa pagbarug sa kinaugalingong paningkamot. Ang Simbahan mitabang nako sa paglahutay sa pagkat-on sa pagbasa, pagsulat, pagsulti, ug sa pagsulay sa pagbuhat og butang alang sa akong kaugalingon aron mahimong makabarug sa kinaugalingong paningkamot. Karon ako moadto sa shop sa mananahi ug mangayo sa sobrang mga tinabas nga ilang gigunting gikan sa mga panapton ug gibilin diha sa salog. Paliton nako ang mga tinabas sa gamay nga presyo ug gamiton kini sa paghimo og mga trapo. Karon mobaligya nako og mas daghan kay kaniadto.

Sukad ako miapil sa Simbahan, ang akong kinabuhi nausab. Milambo pag-ayo ang akong kinabuhi! Mapasigarbuhon ako ni Jesukristo ug mapasigarbuhon ako sa Iyang Simbahan. Mapasalamaton ako alang sa Ang Simbahan ni Jesukristo sa mga Santos sa Ulahing mga Adlaw.

Fatu reading to others — Ang mga panalangin sa literasiya ug pagbarug sa kinaugalingong paningkamot nakahatag ni Fatu sa oportunidad sa pagtabang ug pagpakigbahin sa unsay iyang nakat-unan ngadto sa uban.