Mga Young Adult
Wala Kamo Mag-inusara—Salig Kanako
Litrato sa babaye gikan sa Getty Images
Sa dihang nahimo kong usa ka young adult, nagtuo ko nga nakasabut nako sa tanan kabahin sa kamingaw. Kadaghan ko magbalhin-balhin sa nagtubo pa ko, mao nga duna koy daghang kasinatian nga nagbiya sa akong komportable nga dapit aron sa pagpakighigala. Ug sa dihang naminyo ako sa pinakabuotan nga lalaki, nasayud ko nga dili gayud ko mobati og kamingaw pag-usab, di ba?
Sayop.
Ang kamingaw sa pagkabatan-on dili kaayo malikayan, bisan kon kini molungtad lang og kadiyot. Kita adunay daghang mga butang nga buhaton nga nakapa-busy nato. Kita adunay bag-ong mga tahas: estudyante, kapikas, empleyado, o ginikanan. Mamalhin kita layo sa panimalay ug pamilya. Kita giatake og dagko—gani makapahimulag nga—mga desisyon. Dugang pa, kita dali maapektahan sa matag adlaw ug usahay sa dili kasagaran nga mga pagsulay sa kinabuhi. Kining tanang butanga makadugang aron sa paghimo sa kamingaw nga usa sa labing kasagaran nga pagbati sa mga young adult karon. Maayo na lang, adunay mga paagi sa pagpakigbatok sa kamingaw, ug mao kana kon unsa ang mahitungod niini nga seksyon.
Sa pahina 44, si Shaila mipakigbahin kon sa unsang paagi nga ang pagpasakop sa Simbahan sa katapusan nakatabang kaniya nga mabuntog ang iyang kamingaw. Sa pahina 48, si Mindy nagtudlo kanato sa paagi nga kita makakita ug hatagan og bili ang panaghigalaay sama sa gibuhat ni Kristo. Ug sa digital lamang nga mga artikulo, si Bella naglatid sa mga epekto sa maayong mga pakighigala ngari kanato, ug ako mohatag og duha ka paagi alang niadtong kinsa gimingaw samtang layo gikan sa mga minahal atol sa panahon sa Pasko.
Adunay mga paagi sa pagbuntog sa kamingaw—ang paggawas ug mangita og bag-ong mga higala, paghimo og tinuoray nga mga koneksyon matag adlaw, o pagpalambo og mas suod nga relasyon uban sa Manluluwas. Kon kita makaamgo nga Si Jesukristo mao ang kanunay nga nag-uban kanato, kon kita makakita nga kita wala gayud mag-inusara, kita makabaton sa kalig-on sa paglakaw gawas sa atong kaugalingon, magmugna og himsog nga relasyon, ug sa pagpanalangin niadtong naglibut kanato.
Gikan sa usa ka tawo kinsa nagtuo diha kaninyo,
Alexandra Palmer