Unsa ang Gitudlo sa Istorya sa Pasko Kanato mahitungod sa Pagpangalagad

“Mao kini ang panahon nga giganahan sa tuig. Kantaha ang garay; hapit na ang Pasko. Pagkatawo ni Jesus hisgutan, bata pang mianhi’s kalibutan” (“Awit sa Pagkatawo,” Songbook sa mga Bata, 32).

Ang Pasko usa ka talagsaong panahon sa dihang ang karnero, mga magbalantay sa karnero, pasungan, ug mga bitoon sa kalit lang naghatag og bag-ong kahulugan. Sila mahimong importante nga mga bahin sa pag-istorya pag-usab sa usa sa labing importanting mga panghitabo sa kasaysayan sa tawo: ang pagkatawo ni Jesukristo. Daghang pamilya magpakita og belen [talan-awon sa pagkatawo] sa ilang mga panimalay. Ang uban himoong prayoridad ang pagbasa og istorya sa Iyang pagkatawo o moapil sa parada. Sama sa tanang mga istorya ni Kristo, ang istorya sa Iyang pagkatawo puno sa mga leksyon nga atong makat-unan mahitungod sa pagpangalagad, mahitungod sa pagpakigbahin sa Iyang kahayag sa paghayag sa kalibutan. “Ang istorya sa Pasko usa ka istorya sa gugma,” miingon si Presidente Henry B. Eyring, Ikaduhang Magtatambag sa Unang Kapangulohan.

“… Sa mga istorya sa pagkatawo ni Kristo, atong makita ug mabatyagan kon si kinsa Siya kaniadto ug kinsa Siya karon. Kana nagpagaan sa atong palas-anon sa atong paglakat. Ug kini mopakalimot nato sa atong kaugalingon ug sa pagpagaan sa palas-anon sa uban.”¹

“Wala na may luna alang kanila sa balay nga abutanan” (Lucas 2:7)

Ang tag-iya sa abutanan napakyas sa paghatag og luna alang sa Manluluwas, apan kita dili kinahanglan nga mohimo niana nga sayop! Makahimo kita og luna alang sa Manluluwas diha sa atong mga kasingkasing pinaagi sa paghimo og luna alang sa atong mga kaigsoonan diha sa atong mga lamesa, sa atong mga panimalay, ug sa atong mga tradisyon. Daghang mga tradisyon sa pamilya mahimo nga mas nindot ug gani mas halandumon pinaagi sa pagpaapil sa ubang tawo. Si Daiana ug ang iyang pamilya adunay tradisyon sa pagdapit og tawo nga mogahin sa Pasko uban kanila. Matag Disyembre, sila mohisgot ug mohukom kinsa ang gusto nila nga dapiton.² Tingali ang inyong pamilya makasugod sa susama nga tradisyon. Tingali usa ka tawo nga inyong gipangalagaran ganahan nga moapil sa inyong pamilya nga kaubang magkanta og paborito nga mga kanta sa Pasko. Tingali mohatag usab kamo og luna sa inyong panihapon sa Pasko alang sa usa ka tawo nga walay pamilya dihang dapita.

Unsa ang mas maayong paagi sa pagsaulog sa Manluluwas kay sa pagsunod sa Iyang ehemplo sa pagdapit og tawo? Si Nephi namahayag: “Siya nagdapit kanilang tanan sa pagduol ngadto kaniya ug sa pag-ambit sa iyang kaayo; ug siya wala maglimud kang bisan kinsa nga moduol ngadto kaniya, itum ug puti, ulipon ug gawasnon, lalaki ug babaye; ug siya naghinumdom sa mga luog; ug ang tanan managsama ngadto sa Dios” (2 Nephi 26:33). Mohatag og luna ug mohimo og pagdapit.

“Ug niadtong dapita may mga magbalantay sa mga karnero didto sa sibsibanan, nga nanagtukaw sa kagabhion sa pagbantay sa ilang mga hayop” (Lucas 2:8)

Kini daw haum nga mga magbalantay sa karnero mao ang una nga mitimbaya sa masuso nga Manluluwas. Mga Propeta sa karaan nga nagpasabut kang Jesukristo isip ang “Magbalantay sa Israel” (Salmo 80:1) ug ang “Magbalantay sa tibuok yuta” (1 Nephi 13:41). Ug si Kristo Mismo miingon, “Ako mao ang maayong magbalantay sa mga karnero, ug nakaila sa akong mga karnero” (Juan 10:14). Ang pagkaila sa atong karnero ug pagbantay mao ang importante nga bahin sa pagbantay ug pagpangalagad sama sa pagpangalagad sa Manluluwas.

Uban sa nagkidlapkidlap nga mga suga ug gipanindot nga mga dekorasyon, anaa ang daghang talan-awon sa panahon sa Pasko. Apan tingali ang labing maanindot niining panahona makita kon kita mahinumdom sa pagtutok niadtong atong gialagaran ug sa pagbantay sa atong kaugalingong mga panon. Ang pagbantay tingali mao ang pagkahibalo sa paborito sa usa ka tawo o pagpangutana sa mga plano sa usa ka tawo atol sa holiday. Kita nagbantay kon kita motan-aw ug motubag sa mga panginahanglan sa uban—sa klaro ug sa dili kaayo klaro.

Sa dihang namatay ang bana ni Cheryl, nga si Mick, naguol siya pag-ayo. Samtang nagsingabut ang iyang unang Pasko nga wala siya, nagkagrabe ang kamingaw. Salamat na lang, ang iyang mapangalagarong sister nga si Shauna diha. Si Shauna ug ang iyang bana, si Jim, midapit ni Cheryl sa daghang mga outing sa holiday. Sila nakamatikod sa gision nga kupo ni Cheryl ug nakahukom nga dunay himoon mahitungod niini. Pipila ka adlaw sa wala pa ang Pasko, gidad-an nila ni Shauna ug Jim si Cheryl og regalo sa Pasko: usa ka maanindot nga bag-ong kupo. Sila nakahibalo sa pisikal nga panginahanglan ni Cheryl alang sa usa ka mainit nga kupo apan usab sa iyang emosyonal nga mga panginahanglan alang sa kahupayan ug kauban. Gihimo nila nga matuman kadto nga mga panginahanglan kutob sa ilang mahimo ug mipakita og maayong ehemplo kon sa unsa nga paagi kita usab makabantay sa atong mga panon.³

“Ang mga magbalantay sa karnero nasig-ingon ang usa sa usa, Tana, mangadto kita sa Betlehem” (Lucas 2:15)

“Tana, mangadto kita” usa ka madasigon nga pagdapit! Ang mga magbalantay sa karnero wala magtuo nga ang ilang mga higala gikapoy pag-ayo nga molakaw. Wala sila mopaingon sa Betlehem sa ilang kaugalingon. Malipayon silang mitan-aw sa usag usa ug miingon, “Tana, mangadto kita!”

Samtang kita tingali dili makahimo sa pagdapit sa atong mga higala nga motan-aw sa masuso nga Manluluwas, kita makadapit kanila nga mobati sa diwa sa Pasko (o ang espiritu ni Kristo) pinaagi sa pagserbisyo uban kanato. “Ang paagi aron molambo ang diwa sa Pasko mao ang pagkamanggihatagon ngadto sa uban ug pagserbisyo,” miingon si Bonnie L. Oscarson, kanhi Kinatibuk-an Presidente sa Young Women.⁴ Hunahunaa nga ikaw naggunit og kandila. Ang uban siguradong makakita ug makabenepisyo sa kahayag gikan sa inyong kandila, apan hunahunaa ang kainit nga ilang mabati kon kamo mogamit sa inyong kandila aron sa pagdagkot sa ilang kandila ug motugot kanila sa paggunit sa kahayag sa ilang kaugalingon.

Si Kristo Mismo mitudlo nga niadtong kinsa nagsunod Kaniya adunay kahayag sa kinabuhi (tan-awa sa Juan 8:12). Ang pagserbisyo sama sa Iyang gibuhat mao ang usa ka paagi nga kita mosunod Kaniya ug makatagamtam nianang gisaad nga kahayag. Mao nga ipakigbahin ang kahayag pinaagi sa pagdapit sa uban nga moserbisyo uban kaninyo! Sa unsang paagi kamo ug ang inyong gipangalagaran makaserbisyo pagdungan? Mag-uban kamo nga mag-andam sa inyong paboritong pagkaon o surprisahon ang usa ka tawo og gamay nga gift o sulat. Inyong mabati ang kahayag nga moabut gikan sa pagsunod sa ehemplo sa pagserbisyo ni Kristo.

“Ilang gipanugilon ang pulong nga gisulti kanila mahitungod niadtong bataa” (Lucas 2:17)

Sayon hunahunaon ang malipayong kahinam sa mga magbalantay sa karnero samtang mipakigbahin sila sa nindot nga balita sa pagkatawo ni Kristo sa daghang tawo kutob sa mahimo. Gipahibalo sa mga anghel, ang gipanagna nga Mesiyas miabut na! Dinhi Siya! Sa pagkatinuod, ang pagpakigbahin sa maayong balita sa Manluluwas usa ka dako nga tema sa istorya sa pagkatawo ni Kristo. Ang mga anghel nanganta. Ang bitoon mitudlo sa agianan. Ug ang magbalantay sa karnero misugilon niini.

Makadugang kita sa atong tingog sa mga istorya sa Pasko pinaagi sa pagpakigbahin sa maayong balita ug sa pagpamatuod bahin sa Manluluwas. “Samtang kamo adunay pribilehiyo sa pagbarug alang sa Manluluwas sa inyong pagpangalagad nga mga paningkamot, pangutan-a ang inyong kaugalingon, “Unsaon nako pagpakigbahin ang kahayag sa ebanghelyo ngadto niini nga tawo o pamilya?’” gitudlo ni Sister Jean B. Bingham, Kinatibuk-ang Presidente sa Relief Society. “Unsa ang giaghat sa Espiritu nga akong buhaton?”⁵

Aniay pipila ka mga sugyot alang kaninyo nga ikonsiderar samtang kamo magtinguha nga masayud unsaon ninyo sa pagpakigbahin sa inyong pagpamatuod sa Manluluwas ug sa Iyang ebanghelyo:

Pangita og kasulatan nga nakadani sa inyong mga pagbati mahitungod sa Manluluwas o nagpahayag nganong kamo mapasalamaton Kaniya. Ipakigbahin kini niadtong inyong gialagaran.
Pagpadala og text o mensahe sa social media uban sa usa ka video sa Pasko. Adunay mga pipila ka maanindot sa ChurchofJesusChrist.org!
Sultihi ang usa ka higala mahitungod sa usa ka espesyal nga panumduman o tradisyon nga makapahinumdom ninyo ni Kristo.

Pagbaton og hugot nga pagtuo nga ang Espiritu Santo mosaksi sa kamatuoran sa inyong pagpamatuod, sama nga Siya misaksi ngadto nila ni Simeon ug Ana nga ang batang si Jesus mao ang Manluluwas (tan-awa sa Lucas 2:26, 38).

“Aron tinud-anay nga makasaulog sa pag-anhi ni [Jesukristo] sa kalibutan, kinahanglan gayud kitang mobuhat sama sa Iyang gibuhat ug motabang dala ang kapuangod ug kalooy sa atong isig katawo,” miingon si Elder Dieter F. Uchtdorf sa Korum sa Napulog Duha ka mga Apostoles. “Mahimo nato kini kada adlaw, pinaagi sa pulong ug buhat. Himoon nato kining tradisyon sa Pasko, bisan asa pa kita—nga mahimong mas mabination og gamay, mas mapasayloon og gamay, dili kaayo mohukom, mas mapasalamaton, ug mas manggihatagon sa pagpaambit sa atong kaabunda ngadto sa nanginahanglan.”⁶