Ang Katapusang Pulong
Ang Misyon ni Jesukristo mao ang Pagpakita sa Gugma sa Dios
Ni Elder Jeffrey R. Holland
Sa Korum sa Napulog Duha ka mga Apostoles
Gikan sa usa ka pakigpulong sa Oktubre 2003 nga kinatibuk-ang komperensya.
Sa daghang talagsaong mga katuyoan nga nahimo sa kinabuhi ug pagpangalagad ni Ginoong Jesukristo, usa ka talagsaong aspeto niana nga misyon sa kasagaran wala mamatikdi. Ang Iyang mga sumusunod wala makasabut niini sa hingpit niadtong higayona, ug daghan sa modernong Kristiyano wala makasabut niini karon, apan ang Manluluwas Mismo misulti niini balik-balik ug madasigon. Mao kini ang importante nga kamatuoran nga sa tanan nga gianhi ni Jesus nga isulti ug buhaton, lakip ug ilabi na sa Iyang matubsanong pag-antus ug sakripisyo,… Siya nagpakita kanato kon kinsa ug unsa gayud ang Dios nga atong Mahangturong Amahan, unsa ka hingpit ang Iyang pagkamaunongon ngadto sa Iyang mga anak sa tanang panahon ug nasud. Sa pulong ug sa buhat, si Jesus nagtinguha sa pagpadayag ug sa paghimong personal ngari kanato sa tinuod nga kinaiya sa Iyang Amahan, ang atong Amahan sa Langit.
Si Jesus mianhi sa pagpangamuyo uban sa tawo sa paghigugma sa ilang Langitnong Amahan sama nga Siya sa kanunay nahigugma ug mohigugma kanila kanunay. Ang plano sa Dios, ang gahum sa Dios, ang kabalaan sa Dios, oo, gani ang kasuko ug ang paghukom sa Dios aduna silay higayon nga makasabut. Apan ang gugma sa Dios, ang hilabihan ka mahinungdanon sa Iyang debosyon ngadto sa Iyang mga anak, sa gihapon wala nila mahibaloi sa hingpit—hangtud nga miabut si Kristo.
Busa ang pagpakaon sa gigutom, pag-ayo sa masakiton, pagpanton sa pagkahipokrito, pagpangamuyo alang sa hugot nga pagtuo—kini mao ang Kristo nga nagpakita kanato sa agianan ngadto sa Amahan, Siya kinsa “maloloy-on ug mapuangoron, dili daling masuko, mainantuson ug puno sa kamaayo.”1 Sa Iyang kinabuhi ug labi na sa Iyang kamatayon, si Kristo namahayag, “Mao kini ang kapuangod sa Dios nga akong gipakita kaninyo, ingon man sa akong kaugalingon.”
Ako mosaksi sa usa ka personal, buhi nga Dios, kinsa nakaila sa atong mga ngalan, maminaw ug motubag sa pag-ampo, ug nagpangga kanato hangtud sa kahangturan isip mga anak sa Iyang espiritu. Mopamatuod ko nga taliwala sa mga talagsaon nga komplikadong buluhaton nga anaa sa uniberso, Siya nagtinguha sa atong indibidwal nga kalipay ug kaluwasan labaw sa tanan pang diosnon nga mga kabalaka.
Pinaagi sa espiritu sa balaang pagka-apostol, ako moingon sama sa usa kinsa mihupot niini nga katungdanan sa karaan: “Niini ania [gani] ang gugma, dili nga kita nahigugma sa Dios, apan nga siya nahigugma kanato, ug nagpadala sa iyang Anak nga halad-pasig-uli sa atong mga sala. Hinigugma, kon ang Dios nahigugma kanato, kita usab kinahanglan nga maghigugmaay sa usag usa” (1 Juan 4:10–11)—ug sa paghigugma Kaniya sa kahangturan.