Unsaon nako sa pagdesisyon nga moserbisyo og misyon?

Pag-andam sa Kinasingkasing nga Pagpangutana

Ang mga misyon dili gayud alang sa tanan, apan unsa ang alang sa tanan sa tinuoray mao ang pagpangita kon ang usa ka misyon alang kaninyo! Usahay kita dili gustong moadto, mao nga kita dili na lang mangutana o kita mangutana nga dili mohatag og higayon sa Espiritu sa pagtubag. Kita kinahanglan nga mangutana sa kinasingkasing! Kon makita ninyo ang inyong tubag pinaagi sa matinuoron nga pagtinguha, kamo adunay kalinaw ug pagsalig bisan unsa pa ang gisulti sa Ginoo nga inyong buhaton—magpabilin o moadto.

Ali B., edad 22, Utah, USA

Paghinulsol

Usa sa mga butang nga nakatabang nako sa pagdesisyon nga moserbisyo og misyon mao ang pagkat-on ug pagsinati sa tinuod nga paghinulsol. Samtang nagtuon ko mahitungod sa Pag-ula sa Manluluwas ug gigamit unsay akong nakat-unan sa akong kinabuhi, akong gibati ang dili mahulagway nga kalinaw. Samtang mibati ako niini, gusto nako ang uban mobati sa sama nga kalinaw.

Elder Berdejo, edad 21, Arequipa, Peru

Magpabiling Dunay Kontak sa Ginoo

Ang Langitnong Amahan makahatag kaninyo sa tubag pinaagi sa mga kasulatan, usa ka mensahe gikan sa General Authority, o bisan gikan sa pagpamatuod sa usa ka tawo. Mao nga makuha ninyo ang inyong inspirasyon gikan sa pagpabiling dunay kontak sa Ginoo.

Samuel H., edad 14, Utah, USA

Hinumdumi nga Siya Motubag Kaninyo

Sa wala pa ko magmisyon, nakigbisog ko nga masayud kon ako moadto ba. Sa katapusan mihukom sa paghangyo sa Langitnong Amahan, kinsa tinuod nasayud sa tanan nga atong maagian ug nasayud kon kita kinahanglan bang moserbisyo og misyon. Pinaagi sa pag-ampo akong nadawat ang kumpirmasyon nga kinahanglan kong moadto. Nasayud ko nga ang Langitnong Amahan motubag sa mga pag-ampo. Duol Kaniya uban sa inyong mga pangutana, ug Siya motubag kaninyo sumala sa inyong hugot nga pagtuo ug sa Iyang kabubut-on ug tayming.

Sister Terpend, edad 21, Jamaica Kingston Mission

Tan-awa ang Inyong Pamilya ug ang Patriyarkal nga Panalangin

Ang akong pamilya ug ang akong patriyarkal nga panalangin mitabang kanako sa paghukom. Ang akong igsoong babaye sa karon nagserbisyo og misyon, ug ang iyang ehemplo ug pagpamatuod sa misyonaryo nga buhat nakapadasig kanako. Akong tinguha nga moserbisyo nahimong mas lig-on usab sa dihang akong nadawat ang akong patriyarkal nga panalangin, nga miingon nga ako makahimo sa pagpakigbahin sa ebanghelyo ngadto sa uban.

Juliana P., edad 16, Nevada, USA