Diha sa mga Tunob ni Jesus
Ang akong ngalan mao si Mary. Nagpuyo ko sa Israel kauban sa akong pamilya. Kami adunay daghang espesyal nga mga kasinatian nga maglakaw diin naglakaw si Jesus kaniadto.
Betlehem
Usa ka espesyal nga dapit nga among giadto mao ang Betlehem, diin natawo si Jesus. Sila si Maria ug Jose kinahanglang mobiyahe og mga 90 ka milya (144 km) aron makaabut didto gikan sa ilang panimalay sa Nazaret. Mibisita mi sa usa ka simbahan nga natukod diin ang mga tawo nagtuo nga didto ang kwadra.
Nakita usab namo ang umahan duol sa Betlehem. Ang mga magbalantay sa karnero nagbantay gihapon sa mga panon didto, sama sa ilang gibuhat sa gabii nga natawo si Jesus. Among madungog ang baaing sa mga karnero samtang kami nanganta og “Sa Layo nga Patag sa Judea” (Mga Himno, nu. 127). Kanunay nakong mahinumduman unsay akong gibati nga nanganta niana nga kanta.
Ang Dagat sa Galilea
Kini mao ang Dagat sa Galilea. Kini ang matahum nga linaw diin si Jesus mitudlo sa liboan ka tawo ug mibuhat og daghang mga milagro. Gibati gayud nako ang Espiritu didto. Kini adunay malinawon nga pagbati nga nagsulti kanako sa sagrado nga mga butang nga nahitabo didto.
Ganahan ko nga moadto sa dapit nga gilakwan ni Jesus, sama sa Suba sa Jordan, diin si Jesus nabunyagan. Kon ako anaa niini nga mga dapit, hilom akong maglakaw duol sa mga tawo nga nagsimba ni Jesus pinaagi sa pagdagkot sa mga kandila ug pagluhod sa pag-ampo. Kanunay nakong gibati sa akong kasingkasing nga ang Langitnong Amahan ug si Jesus malipayon sa mga tawo nga mopakita sa ilang gugma alang Kanila.
Jerusalem
Ang Jerusalem usa ka dako nga siyudad. Sa Dominggo sa wala pa Siya gilansang sa krus, si Jesus nagsakay sa usa ka asno (tan-awa sa Mateo 21:1–11). Ang mga tawo miabi-abi Kaniya ngadto sa siyudad pinaagi sa pagwara-wara sa mga dahon ug nagsinggit og, “Hosanna!”
Matag tuig sa Dominggo sa dili pa ang Pasko sa Pagkabanhaw, ang mga tawo mosubay sa dalan ni Jesus paingon ngadto sa Jerusalem. Magdala sila og mga dahon sa higera ug manganta og mga awit mahitungod ni Jesus. Usa ka tuig ang akong pamilya miapil sa ubang mga Kristiyano niini nga paglakaw. Maanindot kaayo nga mobati sa gugma sa tanan alang sa ilang Manluluwas.
Dili kinahanglan ninyo nga molakaw diin si Jesus naglakaw sa pagsunod sa Iyang mga tunob. Makasunod kamo sa iyang ehemplo bisan asa!