Usa ka Blind Date uban sa usa ka Babaye nga Santos sa Ulahing mga Adlaw

Ni Elder Joaquin E. Costa

Sa Seventy

Ang pasalig ni Renée sa pagsunod sa ebanghelyo nakapausab sa akong kinabuhi.

Wala ako magtubo isip usa ka miyembro sa Ang Simbahan ni Jesukirsto sa mga Santos sa Ulahing mga Adlaw, apan pinaagi sa pipila ka mga miyembro nga akong nakaila, akong nakat-unan nga kon ang usa ka tawo nagpuyo og kinabuhi nga limpyo, putli, ang Kahayag ni Kristo nagdan-ag diha kanila. Sila mahimo nga gamhanan nga mga ehemplo.

Ang akong una nga kontak sa Simbahan pinaagi sa usa ka higala nga akong naamigo sa kolehiyo. Usa siya ka maayo kaayo nga miyembro sa simbahan kinsa nagserbisyo og misyon. Ako nagtubo sa usa ka Katoliko nga pamilya, siya kanunay naningkamot sa pagsugod sa panag-istoryahanay uban kanako kabahin sa relihiyon. Apan wala gyud ko mainteresado. Ang akong higala maalamon kaayo, ug siya misulay pag-usab sa pagpaila kanako sa Simbahan—pinaagi sa paghimo og usa ka blind date sa usa ka babaye nga Santos sa Ulahing mga Adlaw.

Among Unang Date

Sa dihang si Renée ug ako nag-date sa unang higayon, nahigugma ko kaniya sa hingpit. Maanyag kaayo siya alang nako, makasulti ko nga adunay butang nga espesyal mahitungod kaniya. Sa wala madugay, ako andam na nga mahimong seryoso uban kaniya ug sa paghimo og pamilya—apan human sa pipila ka mga date, miingon siya nga kinahanglang dili na kami mag-date tungod kay siya ganahan na “kaayo” kanako ug siya gusto nga magminyo sa templo. Mas migrabe pa hinoon alang nako, sa wala madugay mibiya siya alang sa usa ka misyon. Human niana, nakahukom ko nga ako dili na makagusto og mga Santos sa Ulahing mga Adlaw.

Sa dihang mibalik siya gikan sa iyang misyon, ang among komon nga higala midapit kanako sa party diin makita nako si Renée, ug nagsugod mi sa paggahin og panahon pag-usab. Ako nakagradwar sa kolehiyo ug dunay maayo kaayo nga trabaho, ug gibati na usab nako nga andam na nga magminyo. Naghunahuna ko nga ako usa ka maayong tawo nga minyoan, mao nga ako misugyot. Miingon siya dili.

Nagduha-duha nga Makigkita sa mga Misyonaryo

Aron magpadayon ang relasyon, akong gidawat ang imbitasyon nga maminaw sa mga misyonaryo. Usa ka panahon niana siya miduol kanako nga dunay luha ang mga mata, nagpamatuod sa Basahon ni Mormon ug mihangyo nako sa pagbasa niini. Gusto siya nga makabaton ko og pagpamatuod sa ebanghelyo aron nga siya makatuman sa iyang tinguha nga maminyo sa templo. Gihigugma nako siya ug dili ko gusto nga pakyason siya, busa miingon ko nga akong buhaton. Apan bisan tuod ako miuyon nga makigkita sa mga misyonaryo, nakigkita lang ko nila aron aduna koy panahon sa pagkumbinser ni Renée nga makigminyo nako. Wala koy intensyon nga moapil og bag-ong relihiyon.

Human sa pipila ka mga appointment uban sa mga misyonaryo, dili gihapon ko interesado. Naglingkod ko kon magleksyon sila, apan wala kaayo magtagad o maningkamot nga mobati sa Espiritu. Ang akong kasingkasing sirado, tungod kay ako dili maminaw sa mga misyonaryo alang kanako; naminaw ko nila tungod ni Renée. Wala gihapoy gipadulngan, ug dili gihapon nako makumbinser si Renée nga ako mahimong usa ka buotan nga bana ngadto kaniya bisan dili magpabunyag. Nagpabilin siya nga lig-on sa iyang mga gituohan.

Paghimo sa Basahon ni Mormon nga Personal

Dayon giilisan ang mga misyonaryo. Usa ka bag-ong misyonaryo miabut sa pagtudlo kanako, ug siya adunay ideya. Gipaablihan niya nako ang mga kasulatan sa Alma 42, ug siya mihangyo nako nga basahon nako og kusog ngadto kanila, bersikulo human sa usa ka bersikulo. Apan imbis nga magbasa lang niini pulong sa pulong, gusto niya nga akong basahon ang akong ngalan ngadto niini. Dili gyud ko gusto, apan siya miinsister.

Mao nga nagsugod ko sa unang bersikulo. “Ug karon, Joaquin …” Dihang nagbasa ko niadto nga mga pulong, ang basahon nagsugod sa pagpakigsulti kanako. Samtang akong gibutang ang akong ngalan, akong gibati ang gahum sa personal nga pagpamatuod.

Ang sunod nga bahin sa Alma 42 nagtudlo mahitungod sa Pagkapukan ni Adan ug Eva, ug sa katapusan miabut ang plano sa katubsanan. Sa dihang ako miabut sa bersikulo 29 ug nabasa, “Ug karon, Joaquin, ako nagtinguha nga ikaw kinahanglan dili motugot niini nga mga butang nga mohasol pa kanimo,” misugod ko sa paghilak sama sa usa ka bata. Ako wala gyud makahilak sama niana kaniadto. Ako nasayud nga ang Basahon ni Mormon tinuod—apan wala gani nako mahuman ang pagbasa sa kapitulo. Sa dihang sa katapusan mikalma na ko, giingnan nako ang mga misyonaryo nga ako gusto nga magpabunyag. Si Renée malipayon kaayo. Nabunyagan ko, ug sa katapusan miuyon siya nga makigminyo kanako. Paglabay sa usa ka tuig, kami nabugkos sa Buenos Aires Argentina Temple.

Mapasalamaton kaayo ko sa pasalig ni Renée sa pagsunod sa ebanghelyo ug magminyo sa templo. Ang iyang matinud-anong pasalig sa pagpakig-date wala lang makapalig-on sa iyang relasyon ngadto sa Dios ug sa ebanghelyo, apan midapit usab nako sa pagkat-on sa ebanghelyo. Nasayud ko nganong siya matahum kaayo ngari nako: tungod kay siya limpyo, mahigugmaon, ug putli. Tungod sa iyang pagkamatinud-anon, nakapalambo ko og usa ka personal nga pagpamatuod sa Basahon ni Mormon ug niini nga Simbahan.