Pagpangalagad sa Kabataan ug Kabatan-onan

Ni Brittany Beattie

Departamento sa Pagkapari ug Pamilya

Ang tanang mga hamtong, bisan unsa pa ang ilang mga calling, makasuporta sa pagpalambo sa kabataan ug kabatan-onan sa ilang ward.

Usa ka mahigugmaong Langitnong Amahan mihatag sa matag usa kanato sa talagsaong mga talento, mga gasa, mga pasyon ug mga tinguha. Kini nga mga talento nagtugot kanato nga mangalagad sa nagpalibut kanato samtang kita nagtinguha nga mahimong “usa sa kasingkasing ug hunahuna” sa pagsunod kang Jesukristo (Moises 7:18). Naglakip kini sa atong mapangalagarong mga paningkamot sa kabataan ug kabatan-onan.

Bisan og kamo usa ka magtutudlo sa Primary, usa ka lider sa kabatan-onan, o tigpangalagad nga brother o sister, o kamo dunay inter-aksyon lamang sa kabataan ug kabatan-onan diha sa simbahan, kamo adunay kapasidad sa pagdasig, pag-awhag, pagbayaw, ug pagtabang sa kabataan ug kabatan-onan nga mahimo sa tanan nga gusto sa Langitnong Amahan nga sila mamahimo.

Ang inyong pag-awhag ug pagpangalagad mahimong kabahin sa gisuportahan sa Simbahan nga mga aspeto sa nasentro sa panimalay nga mga paningkamot, sa paghinumdom nga ang mga ginikanan adunay sagrado, unang tahas sa paggiya ug pagsuporta sa kalamboan sa ilang mga anak. Tinuod kana bisan kon ang mga ginikanan dili mga miyembro sa Ang Simbahan ni Jesukristo sa mga Santos sa Ulahing mga Adlaw o kon sila dili aktibo sa Simbahan. Busa, unsa man ang suporta sa Simbahan mahisama, ug kon sa unsang paagi ang matag usa kanato makatampo?

Kining upat ka ideya makatabang:

1. Ila-ilaha ang kabataan ug kabatan-onan.

Lisud ang pagsuporta sa uban hangtud kamo makahibalo unsa nga suporta ang ilang gikinahanglan. Nakaila ba kamo sa kabataan ug kabatan-onan sa inyong palibut nga nakahibalo og igo unsa nga mga tumong ang ilang gihimo, unsa nga tabang ang ilang gikinahanglan, o unsay importante ngadto kanila? Sa laing bahin, nakahibalo ba usab kamo sa ilang mga kalig-on ug mga tinguha aron kamo makatabang sa mga indibidwal makakonektar kon ang usa ka oportunidad alang kanila sa pagsuporta sa usag usa moabut?

Pananglitan, si Jessica Ocampo gikan sa Guatemala mitanyag nga mobantay sa anak sa iyang higala si Lisbett nga si David samtang si Lisbett nagserbisyo sa kamping sa Young Women. Si Jessica nangutana kon duna bay bisan unsa nga iyang mabuhat aron matabangan si David atol nianang panahona, ug si Lisbett miingon nga si David wala gayud makakat-on sa pagbisikleta. Si Jessica midapit sa iyang mga anak sa pagtabang, ug sila mitudlo ni David sa pagbisikleta. Sila usab nasayud nga si David modula sa basketball team sa ward ug nangandam alang sa usa ka sangka, maong migahin sila sa adlaw nga pagpangandam. Tingali si David wala mahimong mas maayo sa basketball nianang usa ka adlaw, apan, siya miingon, “sila mipakita nako nga sila nagpakabana gayud.” Siya usab midugang, “Ania gihapon nako ang video sa akong telepono sa dihang nakat-on ko sa pagbisikleta.”

Uban pang mga Ideya

Siguroha nga kamo adunay pagtugot sa ginikanan alang sa bisan unsang inter-aksyon uban sa ilang mga anak gawas sa klase o kalihokan sa Simbahan. Likayi ang tinagsa-tagsa nga mga sitwasyon sa kabataan ug kabatan-onan. Kon anaa ang usa sa mga ginikanan sa bata samtang kamo magsuporta sa ilang anak kini mas maayo. Ang pag-amping kinahanglan nga himoon aron sa pagpasiugda og kasiguroan.
Timbayaa ang kabataan ug kabatan-onan ug ang ilang mga ginikanan sa simbahan. Ilha ang ilang mga ngalan ug kumustaha ang ilang semana.
Hangyoa kadtong inyong gialagaran ug ang ilang mga pamilya mahitungod kon unsay ilang labing ganahan, gikahadlokan, o gitinguha. Sayri unsa nga mga butang ang ilang giandaman. Dayon pakigsultihi sila ug pag-ampo usab nga makahibalo kon duna bay bisan unsa nga inyong mahimo sa pagsuporta kanila.

2. Ipakigbahin ang inyong mga talento ug pangitaa ang koneksyon nga mahimong malakip ang uban.

Kamo migahin sa tibuok kinabuhi sa pagpalambo sa kahanas ug mga talento. Kamo adunay talagsaong mga kasinatian nga makahatag kaninyo og mga panabut ug kahibalo mahitungod sa nagkalain-laing mga hilisgutan. Mahimo bang ipakigbahin ninyo ang inyong mga talento ug kaalam uban sa kabataan o kabatan-onan sa pagtabang kanila sa ilang mga plano sa kalamboan? Makatabang ba kamo kanila nga makaila sa mga oportunidad nga makatabang kanila sa ilang gitinguha nga kalamboan?

Sama pananglit, si Olalekan Babatunde gikan sa Osun, Nigeria, nagtrabaho sa pagkaabogado. Ang iyang stake miapil sa unang pagsulay alang sa Kabataan ug Kabatan-onan. Sa dihang siya nakadungog nga kini nakadasig sa usa ka batan-ong lalaki sa iyang ward nga mahimong usa ka abogado, si Olalekan nakigkita kaniya sa pagtanyag og suporta. Si Olalekan nagtabang kaniya nga makakat-on kon unsay buhaton sa pagpangandam alang sa abogasiya.

Si Maria Vashchenko gikan sa Kyiv, Ukraine, nakamatikod sa epekto sa usa ka babaye nga nakahibalo sa abilidad sa musika sa iyang 13 anyos nga anak nga lalaki. Ang babaye midapit kaniya sa pagtugtog sa piano sa kultural nga selebrasyon sa wala pa ang pagpahinungod sa Templo sa Kyiv Ukraine. Nagkonsiderar na unta siya nga mohunong sa musika nianang higayuna, apan miuyon siya nga dawaton ang iyang pagdapit.

“Kini mao ang dako kaayong impluwensya sa kinabuhi sa akong anak,” miingon si Maria. “Ang konsyerto nindot kaayo! Pagkahuman, gisultihan namo ang among anak nga siya mahimo nang mohunong sa musika, apan mitubag siya nga dili na siya mohunong. Migradwar siya gikan sa eskwelahan sa musika nga maayo kaayo ang grado, hanas sa daghan nga mga instrumento sa musika, misugod sa pagsulat sa musika ug mga kanta, ug mihimo og usa ka grupo sa musika. Sa dihang nagmisyon siya, miorganisar siya og mga kalihokan sa musika, mipatugtog og mga himno sa panagtigum sa sakramento, mipahigayon og choir sa misyonaryo, ug mitudlo og mga investigator sa pagpatukar og sista ug piano. Kami kanunay mapasalamaton sa mga sister nga mitabang sa among anak nga mopalambo sa iyang mga talento.” Ang impluwensyal nga sister nakahimo og kalainan pinaagi lamang sa pagkahibalo sa mga kahanas sa batan-ong lalaki ug pagdapit kaniya sa paggamit niini sa pagpanalangin sa uban.

Uban pang mga Ideya

Pagtanyag nga motudlo sa kabataan ug kabatan-onan sa inyong mga kahanas sa usa sa ilang mga kalihokan, o sultihi sila nga ipakigbahin ang ilang mga talento uban sa Relief Society o sa korum sa mga elder.
Ribyuha ang inyong patriyarkal nga panalangin sa pagpamalandong sa inyong mga talento ug mga gasa sa Espiritu nga makasuporta sa uban sa ilang kalamboan—bisan ang gasa nga dili makita sa uban, sama sa pagkahimong maayong tigpaminaw.
Paghimo og lista sa mga kalig-on sa indibidwal—inyoha ug sa uban—aron kamo andam sa pagsuporta sa uban kinsa makabenepisyo sa kahibalo sa uban. Kini makatabang ilabi na sa mga pamilya, sa mga ward council ug mga kapangulohan sa klase ug korum sa pagtinabangay.

3. Pakita nga interesado ug hatag og pag-awhag.

Hinumdumi kon ang kabataan o kabatan-onan adunay dagkong butang nga moabut; i-follow up dayon. Pagpadala og sulat sa pagdasig. Pangutana kon unsay nahitabo sa mga butang nga ilang giplano nianang semanaha. Pakita og kadasig sa ilang pagtubo ug awhaga sila nga magpadayon gihapon bisan sa mga kahigawad. Dili kamo kinahanglan nga masayud sa mga detalye aron ipahibalo kanila nga kamo mosuporta.

Kausa, dihang ako naningkamot nga mopalambo og kinaiya sa pagmata og sayo, usa ka miyembro sa ward nakadungog nako nga naghisgot sa usa ka Dominggo mahitungod sa akong tumong nga makatulog og ubay-ubay nianang semanaha. Siya nangutana kanako kon unsay akong buhaton aron kini mahitabo. Mipasalig ko nga matulog sa akong gitinguha nga oras labing minus usa ka gabii nianang semanaha. “Ako mangutana nimo mahitungod niini sa sunod semana,” miingon siya. Nagtuo ko nga mangutana gayud siya, mao nga ako mituman sa akong pasalig.

Insakto gayud, pagkasunod semana sa simbahan nangutana siya kon natuman ba nako ang akong tumong (natuman nako!), ug siya nangutana kon buhaton ba nako pag-usab sa sunod semana. Nasayud ko nga siya mo-follow up, mao nga ako mihimo niini. Pagkasunod semana, siya miawhag nako sa pagtuman sa akong tumong kaduha nianang semanaha. Ug sa sunod semana? Siya mipasalig kanako og tulo ka gabii. Nagpadayon siya sa pag-awhag matag semana hangtud nga ang akong plano nahimong tinuod nga kinaiya.

Paglabay sa katuigan, gisulti nako kana nga istorya sa laing higala sa simbahan tungod kay ako wala makapadayon sa akong maayong kinaiya ug nasayud nga kinahanglan nga magsugod ko pag-usab. “Motabang ko nimo nga may tulubagon,” miingon siya. Busa matag semana siya mo-follow up kanako hangtud nga ako nakapalambo og kinaiya sa maayo nga pagkatulog pag-usab. Sulod sa katuigan, ang pamilya ug suod nga mga higala mitabang nako sa mga tumong nga makaangkon og saktong pagkatulog, apan ang duha ka higayon nga kadto labing epektibo sa dihang ang mga miyembro sa ward—kinsa dili kaayo nako suod—mitabang kanako sa paghimo ug paghupot og usa ka tumong ug dayon mi-follow up nako sa maawhagon nga paagi.

Uban pang mga Ideya

Kon ang usa ka indibidwal mopakigbahin sa ilang kahanas atol sa usa ka pasundayag o sa dula, tambong ug dasiga sila.
Tan-awa ang paglambo sa uban ug dayga sila sa ilang mga paningkamot, sama sa usa ka pakigpulong o leksyon sa Simbahan, usa ka kalihokan nga sila mitabang sa pagplano, usa ka proyekto sa pagserbisyo nga ilang giapilan, o usa ka kalampusan sa eskwelahan nga inyong nadunggan. Ang inyong mga pulong makahatag og importante nga kadasig kanila sa pagpadayon sa ilang mga tumong sa lisud nga mga adlaw.
Kon kamo magplano og mga kalihokan sa pamilya sa pagtabang sa inyong mga anak nga makat-on og bag-ong kahanas, ikonsiderar ang pagdapit sa uban sa pag-apil, ilabi na kon kini may kalabutan sa ilang mga tumong.

4. Sunda ang Espiritu Santo

Labaw sa tanan, tinguhaa ang Espiritu Santo. Ang Langitnong Amahan ug ang Manluluwas nasayud sa imong mga kalig-on ug sa mga panginahanglan sa uban. Sila nasayud sa inyong kapasidad sa pagpanalangin sa kabataan ug kabatan-onan sa inyong kinabuhi. Pag-ampo aron masayud kon sa unsang paagi kamo makasuporta ug makapanalangin niadtong mga indibidwal. Dayon lihok inubanan sa hugot nga pagtuo. Ang Espiritu mogiya kaninyo sa inyong gagmay ug yano nga mga paningkamot sa pagdala og mga milagro (tan-awa sa Alma 37: 6).

Ang panawagan sa Manluluwas nga “usa sa kasingkasing ug hunahuna” (Moises 7:18) nagdapit kanato—batan-on ug tigulang—nga magkahiusa sa atong mga paningkamot nga mahisama sa Manluluwas ug mosunod sa Iyang mga paagi. Samtang kita mangalagad sa kabataan ug kabatan-onan ug magtinguha sa pagtabang kanila nga molambo, kita makamatikod nga kita milambo usab.

Uban pang mga Ideya

Pagpuyo nga takus sa kanunay nga pakig-uban sa Espiritu Santo.
Paggahin og panahon matag semana sa pagpamalandong kon unsaon sa pagsuporta sa paglambo sa inyong mga anak o kabataan ug kabatan-onan sa inyong pamilya, ward o komunidad.
Salig sa Espiritu sa pag-atiman sa inyong kaugalingong personal nga kalamboan. Pagkat-on ug padayon sa paglambo pinaagi sa kapakyasan, magtinguha sa Espiritu Santo sa pagtabang kaninyo samtang kamo naglambo.