Bisan Kinsa Basta Dili Lang Siya!
Paghulagway pinaagi ni Phil, i2i nga paghulagway
Dihang nakadungog ko mahitungod sa inisyatibo sa Simbahan nga “Dan-agi ang Kalibutan” sa Pasko ug sa tibuok kalibutan nga pag-alagad, naghunahuna ko, “Pagkanindot nga ideya. Buhaton nako kini.”
Duha ka adlaw sa wala pa sa tibuok kalibutan nga adlaw sa pag-alagad sa Disyembre 1, dunay misulod sa akong hunahuna kinsa ang kinahanglan nakong tabangan. Diha-diha dayon, ako naghunahuna, “Bisan kinsa basta dili lang Siya!” Kini nga tawo nakapasakit pag-ayo nako sa daghang katuigan, apan sa akong pagsige og hunahuna sa iyang ngalan, mas nahibaloan nako nga ang maong hunahuna gikan sa Espiritu.
Akong gisultihan ang akong bana unsay akong gihunahuna, ug siya miingon nga ang pag-alagad niini nga tawo makaayo kanako. Sa gihapon, gikulbaan ko kaayo sa paghunahuna sa pagtabang kaniya. Nasayud ko nga ako dili makabuhat niini sa akong kaugalingon, busa nag-ampo ko alang sa kalig-on ug sa usa ka tawo nga mouban nako. Sa katapusan, akong gitawag ang mga sister missionary, ug sila miuyon nga mouban kanako.
Miabut ang Disyembre 1, ug ako gikulbaan pag-ayo nga ako nangurog samtang nagdrayb. Kami nag-ampo sa dihang miabut kami sa apartment. Miginhawa ko og lawom ug mituktok sa pultahan. Ang tawo nga miabli sa pultahan, apan ingon og wala siya makaila nako. Nangutana ko kon siya nakaila ba kinsa ako. Nagtuo siya nga ako usa sa mga sister nga mga misyonaryo. Sa dihang giingnan ko siya kinsa ko, nasurprisa siya apan nalipay nga ako nakigkita kaniya. Usa ka bakikaw nga higayon ang nabati sa dihang giingnan nako siya nga kini usa ka tibuok kalibutan nga adlaw sa pag-alagad, ug kami gusto nga motabang kaniya sa bisan unsang paagi nga among mahimo.
Akong gitagaan og trabaho ang mga misyonaryo, ug nanglimpyo mi sa iyang apartment. Human sa duha ka oras, kami nahuman ug mibiya. Sa nagdrayb na ko pauli nakaamgo ko nga ako nagkatawa ug malipayon. Dayon nakaamgo ko pag-ayo: ang Langitnong Amahan mikuha sa tanan sa akong sakit, kasakit, kapait, ug kasubo. Nawala kini! Ug ako gawasnon gikan sa tanang kaguol nga akong gidala sulod sa daghang katuigan. Ang Langitnong Amahan mipanalangin kanako og kalig-on nga mopasaylo sa katapusan niini nga tawo. Talagsaon kaayo kon unsa ka gaan ang gibati sa akong kasingkasing.
Ako mapasalamaton nga ako misunod sa aghat sa pagtabang niini nga tawo. Ang akong mahigugmaong Langitnong Amahan nasayud nga kinahanglan kong makabaton niini nga kasinatian aron ako mouswag ug mahimong labaw pa sa tawo nga gusto Niya nga ako mahimo.