Mga Young Adult
Ang Ehemplo sa Manluluwas sa Pagpakighigala
Kitang tanan moagi sa mga panahon sa kamingaw, apan ang ehemplo sa Manluluwas nagtudlo kanato og pipila ka mga butang kabahin sa pagpakighigala.
Litrato gikan sa Getty Images
Isip mga young adult, kitang tanan moagi sa mga panahon sa kamingaw—pagbalhin tungod sa pag-eskwela, pagpauli gikan sa misyon, moagi og panagbulag, bugtong miyembro sa Simbahan sa inyong dapit, bag-o diha sa usa ka ward, dili minyo, naminyo sa usa ka tawo nga layo sa panimalay pirme, bag-ong mga ginikanan, ug daghan pa. Ang pipila ka ang-ang sa panahon sa kinabuhi dili makapahimo sa pagpakighigala nga sayon.
Apan kana wala magpasabut nga imposible. Sama sa tanang butang, ang tubag anaa sa pagsunod sa Manluluwas. Si Elder Ronald A. Rasband sa Korum sa Napulog Duha ka mga Apostoles mipahayag, “Diha sa pakighigala, sama sa tanang ubang baruganan sa ebanghelyo, si Jesukristo mao ang atong Ehemplo.”1 Ania ang pipila ka butang nga atong makat-unan gikan sa ehemplo sa Manluluwas kabahin sa pagpakighigala.
Pangitaon Sila
Si Jesus mihatag og bili sa panaghigalaay. Siya nagkinahanglan sa tabang ug suporta sa uban (sama natong tanan!) aron sa pagtuman sa Iyang yutan-ong pangalagad, apan imbis nga magpaabut sa tukma nga mga tawo sa pagpakita diha sa Iyang pultahan, Siya migawas ug nangita kanila! Miadto Siya sa lugar nga dili kasagaran nga Iyang adtoon (tan-awa sa Lucas 5:3–10), naglakaw Siya sa palibut (tan-awa sa Marcos 1:16; Juan 1:36), ug Siya midapit sa mga tawo nga moadto ug makita kon asa Siya nagpuyo (tan-awa sa Juan 1:39).
Tingali kita wala magkinahanglan og mga higala alang sa samang rason sa Manluluwas, apan kini importante gihapon alang nato nga malibutan og maayong mga tawo. Kon anaa kamo sa usa ka bag-ong ang-ang sa panahon sa kinabuhi diin makita ninyo ang inyong kaugalingon nga nagkinahanglan og mga higala, pangitaa sila. Pag-apil sa simbahan ug sa ubang mga kalihokan, ipaila ang inyong kaugalingon, mosulay og bag-o nga mga butang, pagpasiugda og salo-salo, mangalagad nga tinud-anay (bisan kinsa ang inyong gipangalagaran tingali nagkinahanglan usab og higala!), ug inyong makaplagan ang inyong kaugalingon nga mas gilibutan sa potensyal nga mga higala.
Isulti ang Kaayo sa Uban
Ganahan ko sa dihang si Jesus nakigkita ni Natanael ug miingon, “Tan-awa aniay usa ka tinuod nga Israelinhon kang kinsa wala ang pagkalimbongan!” (Juan 1:47). Kon maghunahuna ko mahitungod niini nga bersikulo, kini nagpahinumdom kanako nga ako kinahanglang mangita ug mopahibalo sa kaayo nga akong nakita sa uban.
Si “Mister” Fred Rogers, kinsa ingon og usa ka eksperto sa pagpakighigala, mipasabut usab sa unsang paagi nga ang pagpangita sa labing maayo sa uban usa ka Kristohanong kinaiya. “Ako nagtuo nga ang pagpasalamat usa ka balaan nga butang,” miingon siya. “Nga kon kita motan-aw sa unsay labing maayo diha sa tawo nga atong gikauban nianang higayuna, kita nagbuhat unsay gibuhat sa Dios. Busa, sa paghigugma ug pagpasalamat sa atong silingan, kita nag-apil sa butang nga tinud-anay nga sagrado.”2
Pag-ampo alang sa mga Higala
Ang pipila sa labing halandumon nga yutan-on nga mga kasinatian uban sa Manluluwas mao ang higayon sa dihang Siya nag-ampo alang sa uban. Ang mga Nephite misulat nga “ug walay usa nga [naka]sabut sa kalipay nga mipuno sa [ilang] mga kalag sa panahon nga [sila] nakadungog kaniya nga nag-ampo alang [kanila] ngadto sa Amahan” (3 Nephi 17:17). Ang atong mga pag-ampo dili tingali makapatandog sama sa Iyang pag-ampo, apan kita sa gihapon makagahin og panahon sa pag-ampo alang niadtong kinsa atong gimahal.
Gawas sa pag-ampo alang sa inyong mga higala, mahimo usab kamong mag-ampo nga makabaton og mga higala. Samtang kamo “[mag]pakigtambag uban sa Ginoo sa tanan nimo nga buhaton” (Alma 37: 37)—lakip ang inyong mga kabalaka mahitungod sa kamingaw ug panginahanglan og mga higala—Siya dili lamang “moagak [kaninyo] alang sa kaayohan,” Siya usab moagak kaninyo ngadto sa maayo—maayo nga mga tawo nga mamahimong maayong mga higala.
Tan-aw ngadto sa Manluluwas
Si Jesus nasayud kon unsay atong bation kon kita mobati og kamingaw tungod kay Siya usab “nakasinati sa kagul-anan” ug kamingaw (Mosiah 14:3). Mao nga bisan kon kita mao ang labing maayo nga usa ka higala, kita malagmit gihapon adunay mga panahon o mga gutlo nga mobati og kamingaw. Apan ang kamingaw mahimo usab nga usa ka pahinumdom kanato sa balaanon nga sugo sa paghigugma sa usag usa (tan-awa sa Juan 13:34).
Kon nakigbisog kamo sa usa ka panahon sa kamingaw karon, tan-awa ang ehemplo sa Manluluwas. Labaw ni bisan kinsa, himoa Siya nga inyong higala. Siya—ug ang atong Langitnong Amahan—dili gayud mobiya kaninyo nga mobati og kamingaw.