Dili Kamo Gusto nga Mahimong Mayubiton
Ang pagkamayubiton uso kaayo—gawas sa mga mata sa Ginoo.
Paghulagway sa litrato pinaagi ni David Stoker
Makahingalan ba kamo og pipila ka mga timailhan sa katapusang mga adlaw? Adunay pipila ka inila: ang Pagpahiuli, ang pagtungha sa Basahon ni Mormon, nagkalain-lain nga mga kalamidad, ang pagsangyaw sa ebanghelyo, pagkadautan sa kadaghanan. Nan, ania ang usa ka piho nga timailhan nga tingali wala ninyo mahunahunai: pagkamayubiton.
Duha ka mga tigsulat sa Bag-ong Tugon mihisgot nga dunay mga mayubiton sa katapusang mga adlaw (tan-awa sa 2 Pedro 3:3; Judas 1:18). Mao kana, adunay mga tawo nga moyubit ug motamay ni Jesukristo, sa Iyang mga pagtulun-an, ug sa Iyang mga sumusunod. Apan isip Iyang mga disipulo, gisultihan kita nga mahimong mainantuson ug mapailubon (tan-awa sa 2 Pedro 3:11–15), magpaabut sa Iyang pag-anhi ug ang katumanan sa Iyang mga saad, magsunod sa Iyang kalooy ug pagbaton og kapuangod alang sa uban (tan-awa sa Judas 1:22).
Siyempre, ang pagkamayubiton dili bag-ong butang, apan kini mikatap pag-ayo. Ug bisan kon kamo wala gayud moyubit sa mga butang sa Dios, ang pagbaton og mayubiton nga kinabuhi dili angay sundon sa disipulo ni Jesukristo.
Mopadayon sa Pagkamayubiton? Dili, Salamat.
Ang pagyubit nagpasabut sa pagbiay-biay, pagbugal-bugal, o panginsulto. Naglakip kini usahay sa dili maayong pagsumay-sumay, sama sa pagsunod-sunod sa usa ka tawo ug paggamit og kataw-anan nga tingog o pinasobra nga linihokan o paghulagway. Kitang tanan nakakita niini. Anaa kini bisan asa. Ingon og ang mga tawo ganahan niini.
Apan ang Ginoo wala.
Wala gayud diha sa mga kasulatan nga giaprobahan ang pagkamayubiton. Gani, kini gipanghimaraut. Pananglitan, si Alma ang Batan-on mitudlo:
“Aduna bay usa taliwala kaninyo nga naghimo og usa ka pagbiay-biay sa iyang igsoon … ?
“Alaot ngadto sa mao nga usa, kay … siya kinahanglan gayud maghinulsol o siya dili maluwas!” (Alma 5:30–31).
Ang pagkamayubiton usa ka simtoma sa sukaranang sala sa garbo. Ug ang sukaranang pagbati luyo sa pagkamayubiton mao ang pagbiay-biay—ubos nga pagtan-aw sa uban—kana mao, ang pagtan-aw nga uyamot ang mga tawo, dili lang ang dili pag-uyon sa unsay ilang isulti o buhaton.
Dili kini mao ang gusto sa Ginoo. Siya miingon, “Ug tuguti nga ang matag tawo motamud sa iyang igsoon sama sa iyang kaugalingon” (Doktrina ug mga Pakigsaad 38: 24). Kitang tanan managsama og bili. Si Alma nangutana, “Kamo magpadayon ba sa pagpakaaron-ingnon nga kamo labaw nga maayo kay sa uban[?]” (Alma 5:54). Kana nga matang sa panghunahuna mosangput sa pagkamayubiton. Ang mayubiton nga mga tawo usa ka paagi sa mga tawo nga maningkamot sa pagpataas sa ilang kaugalingon kay sa uban.
Labaw pa niana, ang mga mayubiton sa kasagaran maningkamot nga ang uban moapil kanila. Usa ka imahe gikan sa damgo ni Lehi nagpakita gyud kini. Ang katawhan diha sa dako ug lapad nga gambalay “ang kinaiya ingon og nagbiay-biay ug nagtulisok sa ilang mga tudlo” (1 Nephi 8:27). Ang pagtulisok makapabahin sa katawhan, mag-ingon, “Kinahanglang mouban mo namo, o kamo maulawan ug kataw-an.” Sama sa kasakit, ang pagkamayubiton ganahan og kauban. Kana tungod kay sa pagkatinuod, ang mapasigarbuhon sa kasagaran usab walay pagsalig sa ilang kaugalingon.
Pagmaaghup. Ayaw pagyubit.
Sa tanan nga pagyubit bisan asa, makatintal nga moapil niini. Ingon og sila nalingaw, di ba? Ang tanan nagbuhat niini, ilabi na sa internet ug sa social media. Kita gani matintal sa pagbuhat unsay gibuhat sa uban—sa paggamit sa kaugalingong hinagiban sa kalibutan batok niini, sa pagtulisok usab sa dako ug lapad nga gambalay aron makita kon ganahan ba sila nga tulisukon usab.
Apan usab, dili kana pamaagi sa Ginoo.
“Ayaw pagbiay-biay batok niadto nga mabiay-biayon” (Doktrina ug mga Pakigsaad 31:9).
“Higugmaa ninyo ang inyong mga kaaway, ug pag-ampo kamo alang sa mga magalutos kaninyo ” (Mateo 5:44).
Kana mas taas nga sumbanan kay sa sumbanan sa kalibutan, nga ingon og nag-ingon, “Yubita ang tanang tawo ug ang tanang butang nga lahi kaninyo sa bisan unsa nga paagi.”
Lisud ang paglahutay sa pagyubit sa uban ug dili mobalos sa pagyubit, tungod kay ang atong kultura nagpatuo nato nga ang labing abtik, labing masakit nga pagyubit modaog sa sangka alang sa pagtagad ug pagtahud sa mga tawo. Apan kana dili tinuod. Ang Ginoo mitudlo kanato—ug nagpakita nato—nga ang gugma, kaaghup, pailub ug pagkamainantuson mao ang Iyang pamaagi.
Kon kita tinuod nga sumusunod ni Jesukristo, kita dili moyubit sa atong kaigsoonan, tungod kay ang atong mga kasingkasing mapuno sa Iyang tiunay nga gugma (tan-awa sa Moroni 7:47–48).