Ang Papel nga Langgam nga Pula
Ang tagsulat nagpuyo sa Idaho, USA.
Ang tanang gihunahuna ni Eve mao ang tanang kalingawan nga himoon sa iyang mga higala nga wala siya.
“Nagmasakiton ako ug inyo ako nga giduaw” (Mateo 25:36).
Si Eve ganahan sa panahon sa Pasko. Ang iyang klase sa eskwelahan migahin sa buntag sa pagkolor sa mga kard ug pagpaminaw sa makalingaw nga musika.
“Karon panahon na sa pagbasa,” miingon si Mrs. Grunig. “Ug kon mahuman ninyo ang tanan ninyong basahunon karon ug ugma, kamo walay bisan unsa nga homework atol sa holiday.”
Miabiba ang tanang bata sa klase ni Eve. Apan si Eve wala kaayo moabiba. Nagkurog siya og gamay samtang iyang gikuha ang iyang libro aron mobasa. Gibati niya nga tugnaw kaayo ug ang iyang tutunlan misakit. Iyang mga mata gibati og kainit samtang siya mitan-aw sa mga pulong diha sa pahina. Pagkahuman sa klase, ang tiyan ni Eve nagsakit usab.
Sa katapusan panahon na nga mopauli uban sa iyang igsoong lalaki ug babaye, nga sila si Tim ug Wilma. Kasagaran malingaw sila sa pagpauli. Sila magdula og dakop-dakop o maghimo og snowman. Apan karon ang gustong buhaton ni Eve mao ang pagpauli ug mohigda.
Sa pag-abut ni Eve sa balay, si Mama mihikap sa iyang agtang.
“Duna kay hilanat,” miingon siya. “Kinahanglan kang moinom og daghang tubig ug mopahulay.”
Misaka si Eve sa iyang higdaanan ug nakatulog diha-diha dayon. Pagkasunod buntag, ang tanan sa iyang pamilya busy nga nangandam alang nianang adlawa. Apan miingon si Mama nga si Eve nasakit ug dili makaeskwela.
Dayon si Eve nakahinumdom og usa ka butang nga nakapaguol kaniya. Karon mao ang Christmas party sa eskwelahan! Kinahanglan nilang mahuman ang ilang mga proyekto sa art ug manganta og mga awit ug adunay party. Kinahanglan siya nga moadto!
Apan si Mama wala mousab sa iyang hunahuna.
“Pasayloa ko dili ka makaadto sa party, sweetie,” miingon siya. “Apan mas importante ang imong panglawas.”
Nagsugod sa paghilak si Eve. Si Mama naningkamot sa pagtabang nga siya mobati og mas maayo pinaagi sa lamian nga sabaw. Ang tanang gihunahuna ni Eve mao ang tanang kalingawan nga himoon sa iyang mga higala nga wala siya.
Sa pagkahapon, sila si Tim ug Wilma miabut gikan sa eskwelahan. Mipula ang ilang mga aping tungod sa pagdula sa snow.
“Ang party sa eskwelahan makalingaw kaayo,” miingon si Wilma. “Nakahimo kami og papel nga langgam nga pula aron ibutang sa among balay.”
Gikuot ni Tim ang pipila gikan sa iyang bulsa.
“Ug tan-awa—gipadala ni Mrs Grunig kanamo uban sa usa ka espesyal nga regalo alang nimo. Aron ikaw usab makahimo og papel nga langgam nga pula!”
Mipahiyom si Eve. “Mapakita ba ninyo kanako unsaon?”
Sila si Tim ug Wilma mipakita ni Eve unsaon sa paggunting subay sa gituldokan nga linya ug pil-on kini sa sakto. Sila mitabang kaniya sa paghigot sa lambo.
“Mama, tan-awa unsay akong gibuhat!” Si Eve miingon, nagpakita sa iyang bag-ong paborito nga dekorasyon sa Pasko.
Si Eve naghunahuna kon unsa kabuotan ni Mrs Grunig sa paghinumdom kaniya sa dihang nasakit siya, ug sa unsang paagi sila si Tim ug Wilma mitabang kaniya. Karon matag higayon nga si Eve motan-aw sa iyang papel nga langgam nga pula, siya mobati og dakong paghigugma.
Paghimo og usa ka Papel nga Langgam!
-
Guntinga ug ipapilit kining pahina sa pula nga papel. Dayon guntinga ang mga langgam ug mga pako.
-
Hinaya paggunting ang usa ka gisi subay sa gituldokan nga linya diha sa langgam. Ipasulod ang mga pako agi sa mga gisi.
-
Pagbutang og lungag ibabaw sa mga pako ug ipasulod ang lambo agi niini aron mabitay kini.