Daghang mga tawo sa Mexico magpundok isip mga pamilya ug mga higala sa pagbuak sa piñatas isip kabahin sa ilang pagsaulog sa Pasko.
Unsa ang pipila ninyo ka paboritong mga tradisyon? Magsul-ob og bagang mga sinina aron manaygon isip pamilya? Magsakay sa balsa dayon moinom og mainit nga cocoa? Mag-barbecue diha sa baybayon?
Bisan unsa pay ipakita sa mga kompaniya sa kard sa pagtimbaya sa holiday, ang Pasko gisaulog sa matag klima, kultura, ug dapit—sa kasagaran walay timaan sa snow nga makita o bisan unsa nga kahoy nga aguho.
Ania tan-awa ang pipila ka mga paagi nga ang kabatan-onan sa tibuok kalibutan magsaulog sa pagkatawo sa Manluluwas.
Mga paghulagway pinaagi ni Nina Hunter
“Ang bulan sa Disyembre sa akong pamilya nagrepresentar sa panaghiusa. Ganahan kami nga magpakabuhi pinaagi sa pagsunod sa ehemplo ni Kristo, ug kami maningkamot kanunay sa pagpahinumdom sa among kaugalingon sa mga buhat nga Iyang gihimo alang namo ug sa daghang mga panalangin nga among nadawat. Sa among sala kami adunay usa ka hulagway sa Manluluwas, gilibutan sa mga 20 nga pula nga mga kasingkasing.
“Kon andam na kami nga moabli sa among mga regalo sa tungang gabii, tan-awon nako pag-una ang akong pamilya ug dayon ang litrato ni Kristo. Mapasigarbuhon ko nga ang Iyang imahe anaa niana nga kwarto, ug ako mapasigarbuhon nga moingon sa akong kaugalingon nga unsay Iyang gusto kaayo sa akong pamilya nahitabo.
“Ako nagplano nga moserbisyo og full-time nga misyon. Kini nga mga higayon nga gipakigbahin sa Pasko naghatag kanako og dugang tinguha sa pagpakigbahin sa ebanghelyo ngadto sa ubang mga tawo. Uban sa ebanghelyo, ang Pasko adunay tibuok lahi nga pagbati. Uban sa ebanghelyo, ang tanan mahitungod sa Pasko nasentro kang Kristo ug sa pamilya, ug kana nakahatag kanako og mas dakong kahupayan.”
Myrium G., Paris, France
“Sa Bangalore, Ang Pasko dako nga kasaulogan. Ang tanan nagsaulog, ma-Hindu ba sila, ma-Muslim, o ma-Kristiyano man. Daghang mga tawo modekorasyon og Christmas tree ug magbitay og bitoon diha sa ilang balay.
“Usa ka tradisyon nga among sundon sa among pamilya mao ang pag-apil sa kalendaryo sa Dan-agi ang Kalibutan nga gihatag sa Simbahan. Usab, ang akong mama nagsugod sa pagpangandam og cake alang sa akong mga silingan, mga kauban, mga higala, ug pamilya. Sa bisperas sa Pasko kami modapit sa among tanang mga sakop sa pamilya sa among balay. Sugdan namo ang among debosyonal sa Pasko sa balay sa alas 10:30 sa gabii, ug kami manganta og mga himno, magbasa og mga kasulatan, motan-aw og pipila ka video sa Pasko, ug mag-istorya.
“Kami modapit sa gagmayng mga bata sa pagbutang sa batang Jesus diha sa kuna sa tungang gabii sa ika-25 sa Disyembre. Kami manghinaut og ‘Malipayong Pasko’ sa matag sakop sa among pamilya, mohiwa sa cake, mag-istorya sa tibuok gabii, ug matulog og dugay nianang adlawa.
“Mapasalamaton kami nga nakabaton ni Jesukristo isip kabahin sa among kinabuhi. Pinaagi Kaniya kami makakaplag og mahangturong kalipay.”
Ankita K., Bangalore, India
“Pasko 2018 mao ang akong labing nindot nga Pasko. Dihay usa ka pagbati sa panag-uban ug kamahigalaon, ug ako nakaapil sa kalihokan alang sa mga bakwit [refugees].
“Ako mihimo og pulang papel nga botas ug mitudlo niadtong mga gidapit sa panihapon sa paghimo niini, nga ibutang sa matag plato. Kadtong gidapit sa gabii nagdala og mga backpack nga puno sa mga butang sa personal hygiene aron kini mahatag inig ka Dominggo.
“Kami nagtan-aw og salida kabahin ni Kristo uban sa mga bakwit isip kabahin sa gabii. Kadto usa ka nindot nga Pasko nga hinumduman.”
Alexis L., Paris, France
“Gibuhat namo kining butanganan sa lemonada aron gamiton sa ting-init, apan ang Pasko mao ang sakto nga oportunidad nga gamiton kini aron mahatagan ang mga tawo og mga biskwit ug mainit nga tsokolate! Akong bation nga mas duol sa Manluluwas sa dihang ako magmamugnaon sa pagserbisyo sa uban.”
Brooklyn H., Alberta, Canada
“Ganahan kong mogahin og panahon uban sa akong mga igsoong babaye, ilabi na kon kami magdula. Sa panahon sa Pasko kami adunay mga panihapon nga sug-an og mga kandila matag gabii. Malinawon ang pagbati. Ang kahayag sa mga kandila nagpahinumdom kanako sa atong Manluluwas, kinsa mao ang Kahayag sa Kalibutan.”
Dane H., Alberta, Canada
“Daghang mga tawo naghunahuna sa kabukiran isip dapit sa kalinaw diin sila makig-uban sa kinaiyahan ug makadiskubre sa katahum sa mga gilalang sa Dios. Apan dinhi sa Hawaii, kami mobati ug makadayeg sa gahum sa Dios diha sa dagat ug sa tanang mga katingalahan nga anaa niini.
“Bisan unsang oras nga kamo mogahin nga gilibutan sa mga kinaiyahan ug mga pamilya, kini usa ka kasinatian sa pagkasuod. Ipadaplin una ang mga kalingawan sa kinabuhi ug magtutok sa katahum sa inyong palibut, diha sa mga butang nga inyong nakita ug sa mga tawo nga inyong ipakigbahin ang kasinatian.
“Unsay mas maayo nga panahon kay sa Pasko aron mobati nga mas may kalabutan niini nga yuta ug sa atong mga pamilya, samtang kita makasabut nga silang duha adunay importante nga bahin sa plano nga gipahimutang sa atong Amahan sa Langit ug sa atong Manluluwas nga si Jesukristo.”
Diane A., uban sa litrato ni Zyrus A., Hawaii, USA
“Ang akong pamilya kanunay moapil sa pipila ka matang sa pagserbisyo nga kalihokan sa Pasko. Usa ka butang nga among buhaton mao ang paghatag og mga goodies niadtong nanginahanglan. Pinaagi sa pagserbisyo sa uban, kami makapakita sa gugma sa Dios. Ang akong mga ginikanan mitudlo kanako sa kahulugan sa Pasko pinaagi sa pagpakita og maayong ehemplo ug sa pagserbisyo sa uban. Kini nga kasinatian nakatabang nako nga makasabut sa akong tahas dinhi sa yuta ug sa tinuod nga kahulugan sa Pasko.”
Aaron S., Bangalore, India
“Usahay, tungod kay kami usa ka dakong pamilya, kaming tanan magpundok niini nga balay ug sa tupad nga balay. Kami adunay musika. Kami manayaw. Kami kanunay mag-uban isip pamilya kutob sa mahimo panahon sa Disyembre, tungod kay walay klase.
Kami magdula. Kami mag-istorya. Kami mangatawa. Kami mangaon. Kana ang tradisyon. Kon ako anaa sa eskwelahan, wala koy panahon sa pagbuhat sa tanan niadtong mga butanga uban sa akong pamilya. Busa kami maningkamot nga magpadayon kini nga mga tradisyon. Ang pamilya mao ang labing importante nga butang. Kini nga mga tradisyon makatabang kanamo nga magpabilin nga mag-uban isip usa ka pamilya.”
Juan C., Barranquilla, Colombia
“Human sa sunog nakaamgo ko nga ang labing importanting mga butang mao ang imong pamilya ug mga higala. Bisan og kami wala makadawat og daghang mga regalo, nindot kaayo nga gilibutan sa pamilya. Malipayon gihapon kini nga panahon alang kanamo, bisan og kini dili sama sa among normal nga Pasko.”
Rachel W.
“Kinahanglan kong motabang sa pagdiskarga ug pag-organisar sa daghang mga trak nga puno sa gidonar nga mga dulaan. Dayon among giablihan ang pultahan ug gipasulod ang tanan. Makalingaw kaayo nga magtan-aw sa tanang mga bata. Mosanag ang ilang mga mata. Nalipay kaayo sila! Kini nakapalipay nako nga makakita nila nga nalipay pag-ayo ug malinawon human makasinati og teribling butang.”
Audrey V.
“Nindot kaayo nga makita ang tanan nagkapundok bisan og wala planoha ug nagdepende sa matag usa sa sosyal nga paagi. … Akong nakat-unan nga ang materyal nga mga butang dili mahinungdanon kaayo. Ang pagserbisyo, pamilya, ug panahon nga gigahin nga magkauban maoy importante. Ang kinabuhi bililhon. Dili maayong mga butang mahitabo kanunay, mao nga kita kinahanglan maningkamot nga malipay sa positibo nga mga panahon samtang anaa pa sila. Kita ang naghimo nianang positibo nga mga panahon!”