Tamaiti ma le Autalavou: Amata Malosi

Bonnie H. Cordon

Peresitene Aoao o Tamaitai Talavou

Stephen W. Owen

Peresitene Aoao o Alii Talavou

Joy D. Jones

Peresitene Aoao o le Peraimeri

Ua faasoa mai e taitai o le Ekalesia le auala e mafai ai e matua ma uarota ona fesoasoani i fanau ia avea e faapei o le Faaola.

Pe ua e fiafia pe ua e naunau teisi e uiga i taumafaiga fou a le Ekalesia—Tamaiti ma le Autalavou—atonu e i ai ni au fesili: “O le a faapefea ona fesoasoani i lau fanau?” “E faapefea ona tatou faia lenei mea?” “O le a lau matafaioi i ai?”

Ua tuuina mai e taitai o le Ekalesia ni tali.

Aisea ua faia ai e le Ekalesia lenei suiga?

Sister Bonnie H. Cordon: E pei ona aoao mai Peresitene Russell M. Nelson, e manaomia e i tatou uma ona faateleina lo tatou gafatia e maua ai faaaliga.¹ Ua faatulagaina le Tamaiti ma le Autalavou e valaaulia tagata taitoatasi ma aiga ina ia saili atu i musumusuga mai le Agaga i auala e alualu ai i luma ma maua le olioli i le ala o le feagaiga. O se faatusatusaga matagofie i le mea ua vaaia e le perofeta mo i tatou taitoatasi.

Brother Stephen W. Owen: O loo aoao mai foi Peresitene Nelson o i tatou o se Ekalesia e taulai i le aiga, e tusa lava po o a foliga o o tatou aiga.² E le o i tatou o se Ekalesia e taulai i polokalama. E mafai e taitai ma faiaoga o le Ekalesia ona fesoasoani i a tatou fanau e aoao ma ola ai i le aoaoga faavae, ae o lena tiutetauave e amata i le fale, ma o se tiutetauave i aso taitasi.

E pei ona aoao mai le perofeta, e manaomia lo tatou sailia o faaaliga ma mulimuli i le Agaga, ma o le a fesoasoani le Tamaiti ma le Autalavou ia i tatou e faia lena mea—o se vaega ona mo le faafaigofieina. I le taimi ua tuanai, sa fiaselau ni tulaga manaomia mo matua e mataituina ma malamalama ai i le Alualu i Luma Faaletagata Lava ia, O le Tiute i le Atua, Faatuatua i le Atua, ma isi polokalama a le Ekalesia a o agai atu i luma a latou fanau e ala i lo latou talavou. O lenei faiga fou e valaaulia ai le autalavou ma fanau ia saili i musumusuga ao latou faatutuina ni sini e tusa ai ma o latou manaoga ma mea e fiafia i ai.

Sister Joy D. Jones: O se avanoa faagaeetia lea mo a tatou fanau ma le autalavou, o le tupulaga faiae, ina ia faateleina lo latou faatuatua ia Iesu Keriso. A o latou aoao e saili ma tali atu i le taitaiga a le Agaga Paia, o le a latou malamalama atili i lo latou faasinomaga ma le faamoemoega e faavavau, ma le auala e mafai ona latou alualu ai i luma ma lagona le alofa o le Tama Faalelagi mo i latou. O Tamaiti ma le Autalavou o loo taulai atu ia mafai ona faamanuiaina ma faamalolosia a tatou talavou ma o latou aiga i le faavaeina ma le faafaileleina o sootaga i o latou aiga, i le lotu, ma lo latou Tama Faalelagi.

O a laasaga muamua e mafai ona uia e aiga e amata ai ona faaaoga Tamaiti ma le Autalavou?

Sister Jones: Tatalo faatasi mo le taitaiga a le Agaga. E mafai ona amata e matua e ala i le talanoa ma lo latou aiga e uiga i vaega e tolu o le faaaogaina o le Tamaiti ma le Autalavou: aoaoina o le talalelei, auaunaga ma gaoioiga, ma le atinaega o le tagata lava ia. O a ni mea o loo latou faia nei? E mafai faapefea ona latou tuputupu ae o ni tagata taitoatasi ma se aiga i vaega nei e tolu? E faapefea e le taulai atu i le Luka 2:52 ona fesoasoani e taitaia a latou fuafuaga ma le faatulagaga o sini ia manatua ma mulimuli i le Faaola? Oka se avanoa ina a matagofie e faamalolosia ai le autalavou, aiga, ma le auaiga i ni auala faigofie, faifai pea, ma anoa.

Sister Cordon: Tatou te amata i sina vaega itiiti i le taimi. O le savali i luga o le ala o feagaiga e na o le pau lea o le tuu atu o le vae e tasi i luma o le isi. Faia se sini se tasi. Amata faigofie. O le tusitaiala mo le autalavou ma tamaiti o le a aumaia ia i tatou se mamanu matagofie e mulimuli ai.

Brother Owen: E le tatau ona tatou soona faafaigataina. E ese le faigofie o lenei mea. Faitau le Luka 2:52. Amata iina. Ona mafai lea e se matua ona nonofo i lalo ma lana tama po o se talavou i le fale ma talanoa i ai. ”O le a faapefea ona matou fesoasoani atu ia te oe ia tuputupu ae i le poto ma le tino ma alofagia e le Atua ma tagata?” ”O le a se mea e mafai ona tatou aoao pe faia faatasi?” “O a sini e mafai ona e faatuina?” Faia i le auala faigofie.

Afai e i ai se mea na e manao e iloa e tamaiti ma le autalavou e pei ona i ai nei, o le a lena mea?

Sister Cordon: O se avanoa ofoofogia lenei e tuputupu ai e pei ona faia e le Faaola! Afai o tatou mafaufau, “O le a se mea o loo ou taulai i ai?” e mafai ona tatou manatua ua uma ona tatou faia le tele o mea ina ia avea ai faapei o Ia. O le aoaoina o le talalelei o loo tupu i le tele o aiga ma le lotu. O loo tatou galulue ma auai i gaoioiga. O lenei taumafaiga fou ua na o se auala tatou te mafaufau ai ma tali atu e uiga i le faatinoina o mea ua tatou aoaoina—ma taulai atu i lena tuputupu ae i vaega e fa na tuputupu ae ai le Faaola: faaleagaga, faaleagafesootai, faaletino, ma faaleatamai (tagai Luka 2:52). O lenei mea o le a aumaia ai le olioli, filemu, ma le fiafia tumau ia i tatou uma pe a tatou mulimuli i le Faaola!

Sister Jones: O le atinaega e taulai atu i le Faaola, totonugalemu i le aiga, ma lagolagoina e le Ekalesia. E faafaigofieina ma faapatinoina lenei mea a o tatou laa ese mai polokalama ua mavae atu. O le a oo mai le tuputupu ae taitoatasi. Ou te faamoemoe o fanau, autalavou, taitai, ma o latou aiga o le a malamalama faapea o se auala e mafai ona maua, ma fetuutuunai ai mo fanau uma a le Tama Faalelagi i le salafa o le kelope ina ia agai faatasi i luma ma aafia i le olioli tumau i le ala o le feagaiga. E le o se suiga tele lenei mea po o se pioga faigata o le aoaoina. O le faia o mea e sili atu i mea ua tatou faia, a o taialaina i tatou e le Agaga, ina ia mafai ona faalautele e a tatou taumafaiga faamaoni lo tatou gafatia i le mulimuli ma le alofa ma le mataalia i le Faaola.

Aisea e taua ai mo le autalavou ma fanau ona atiina ae faapei o le Faaola?

Sister Jones: Muamua ma le sili, ua latou osia feagaiga e mulimuli pea ia te Ia. Ua latou osi feagaiga e “tutu o ni molimau a le Atua i taimi uma ma i mea uma, ma i nofoaga uma” (Mosaea 18:9). O lea e manaomia ai ona latou atiina ae e pei ona sa Ia faia: faaleagaga, faaleagafesootai, faaletino, faalemafaufau. O a latou feagaiga e le na o le mafuaaga lea e tatau ona latou faia ai, ae e tuuina atu ai foi le tomai mamana e fesoasoani ai ia i latou e ausia a latou sini.

Brother Owen: O lo tatou faamoemoega atoa i le olaga o le mulimuli lea ma avea faapei o lo tatou Tama Faalelagi ma Lona Alo, o Iesu Keriso. Tatou te fia pei o i La’ua. E amata ona tatou faataitaia lenei mea a o laiti, ina ia i ai le mamanu mo o tatou olaga o totoe. Ma tatou te mulimuli moni lava i le Faaola pe a tatou faia mea na Ia faia.

Sister Cordon: O le Faaola o lo tatou faataitaiga i mea uma. Tatou te suesue i Lona soifuaga ma le misiona ma aoaoga aua o Ia o mea uma ua tatou sailia e avea ai i tatou. Ae talu ai e tulagaese i tatou taitoatasi, o i tatou taitoatasi e i ai o tatou uiga ma tomai tatou te manaomia e atiina ae ia avea faapei o Ia. O lenei faiga fou e maua ai e tamaiti ma le autalavou se avanoa patino e tuputupu ae ai i na auala tulaga ese, ina ia atiina ae a latou meaalofa taitoatasi, ma faailoa mai na mea ua uunaia ai i latou e fai ina ia avea atili ai faapei o le Faaola. O le mea lena e patino ai lava lena mea. E leai se lisi o mea e togi pe a uma. O sini tatou te faatuina taitasi e agai i luma i le ala o feagaiga o le a eseese, ae o le a tatou aoao ma tuputupu ae ma agai atu ma faalatalata atili i lo tatou Faaola.

O a ni mea e te faamoemoe o le a lagonaina e fanau ma le autalavou pe a latou auai?

Sister Cordon: Ou te faamoemoe latou te maua se malamalamaaga loloto atu i lo latou faasinomaga e faavavau ma lagona e tatau ona latou auai. A tatou iloa po o ai i tatou ma po o ai e Ana i tatou, o le a ese a tatou amioga. O le a latou iloa ai o mea na fai mai ai ni faasalalauga faaleagafesootai e le moni, aua sa latou lagonaina le ala e talanoa mai ai le Agaga ia i latou. O le a latou maua le talitonuga ia i latou lava ma i o latou gafatia paia o ni afafine ma ni atalii o le Atua.

Sister Jones: Matou te mananao ia latou lagona le faatuatua ma le faamoemoe ia Iesu Keriso, ia lagona le filemu lea e sau mai le tausia o poloaiga, ia oo i sootaga lelei, ia aoao e uiga i le maufetuunai, ia lagona le olioli i le auauna atu i isi, ma lagona le fiafia ma le faataunuuga o le auai i le galuega o le faaolataga.

Brother Owen: Ou te faamoemoe o le a malamalama fanau i le talalelei i se auala o le a goto ifo ai mai o latou ulu i o latou loto. E le o faatatau i mea e maka pe a uma. O se faagasologa o le aoaoina ma le avea faapei o le Faaola. Ou te matua faamoemoe o a tatou fanau ma i latou tatou te auauna atu i ai o le a lava lo tatou lagona mautinoa i lo latou malamalama i le talalelei e aoao atu ai i isi. Mo se faataitaiga, ou te faamoemoe o le a mafai ona tatou fesili atu i a tatou fanau se fesili e uiga i le talalelei, ma o le a tatou faalogo i se tali matuai loloto lava ona ua latou aoaoina ma o se vaega o tagata ua avea ai i latou.

O le a faapefea ona iloa e matua o loo aoga le Tamaiti ma le Autalavou i o latou aiga?

Brother Owen: O le a ou saili mo fua o le Agaga o loo taua i le Kalatia 5, e pei o le filemu e sili atu i le aiga. Ou te manatu o le a sili atu ona agalelei a latou fanau, e sili atu le alolofa. O le a mananao a latou fanau ia faatasi ma le aiga. O le a sili atu ona latou tatalo ma saili ia tali. O le a latou vaaia le faaleleia e le na o le faaleagaga ae faapena foi i faaleagafesootai, faaletino, ma faalemafaufau.

Sister Jones: O le a latou iloa ua faamanuiaina a o faamalosia ia sootaga, e pei ona masani ai tagata o le aiga i le faaleleia atili ma le taumafai pea e tusa lava pe o latou tauivi, a o latou faaali atu le lagolago faatasi ma le tausia o le tasi ma le isi, ma e pei o le uunaiga a le Agaga Paia o sailia ma le malosi i taimi uma ma i ai i lo latou aiga. Atonu e vaai tagata o le aiga i se sootaga e sili atu ona manino i le va o mea o loo latou faia i aso uma ma le soifuaga o Keriso. Atonu o le a tele atu le talisapaia o le faitalia ma le salamo, uiga faaalia ua faaleleia, le faateleina o le mautinoa, o taumafaiga e aapa atu i fafo nai lo le liliu atu i totonu, ma se agaga faafetai tele mo le Faaola, Lona soifua, Ana aoaoga, o Ana faataitaiga, ma Lana Togiola ma le Toetu.

O le a se fautuaga e te tuuina atu i matua e ono lagona sina popole e uiga i le tuua o polokalama talu ai a le Ekalesia?

Sister Cordon: E moni lava tatou te fiafia i polokalama talu ai, aua o i tatou taitoatasi na atiina ae ma maua se avanoa e vaai ai isi o atinae i totonu o na polokalama. Sa musuia lena mo lo latou taimi. Ae tatou te le faafetai ea mo faaaliga faifai pea? E manaomia i tatou e le Alii ia faaauau pea ona tatou alualu i luma ma suia, ma e manaomia e Ia a tatou polokalama ina ia alualu ai i luma ma suia ina ia ausia manaoga o tagata o le Ekalesia i le lalolagi atoa. Tatou te taumafai lava e le aunoa e faaleleia ma ia avea ma Ekalesia ma tagata e silafia ma manaomia e lo tatou Tama Faalelagi i tatou ia avea ai.

Sister Jones: Ua faamanuiaina lava i tatou e ala i polokalama o le taimi ua tuanai ma e mafai ona tatou maua ai le lotofaafetai mo mea uma ua tatou aoaoina ma oo i ai. O se vaitau matagofie fou lenei, ma o se avanoa e saili ai le taitaiga a le Alii e aoao ma tuputupu ae ai i ni auala fou ma musuia.

E mafai faapefea e taitai ona fesoasoani i tamaiti ma le autalavou ia tuputupu ae i atinaega patino?

Brother Owen: Muamua, ou te manatu e manaomia e le taitai matua ona vaai atu i lena tamaitiiti po o lena alii talavou po o le tamaitai talavou e pei ona silasila mai ai le Atua ia i latou, o lona uiga o le tagata e mafai ona avea ai, ae le na o latou o i ai i le taimi nei. Amata i le mafaufau i le taunuuga. Ia i ai le vaai mamao. O le a umi se taimi o lenei vaega. Vaai po o a ituaiga tagata o le a avea ai tamaiti ma le autalavou. Ia lava le atiina ae o se sootaga pe a manaomia ona e talanoa atu i le autalavou, ae latou te faaaloalo ia te oe e faalogo ai.

Ma le isi foi, ia iloa matua. Ia saili mai ia i latou pe faapefea ona e fesoasoani atu. Faaaloalo i lo latou tiute o ni matua.

Sister Jones: O le Peraimeri e le o i ai se faatulagaga o au peresitene o korama ma vasega o loo i ai i alii talavou ma tamaitai talavou. E tuuina atu e taitai ma faiaoga o le Peraimeri, faapea ai foi ma uso ma tuafafine a auauna, se fesoasoani mo tamaiti e le o i ai se lagolagosua i o latou aiga. Peitai, e taua lo tatou faamamaluina i taimi uma le sootaga i le va o tamaiti, autalavou, ma o latou matua, po o le a lava le tulaga o i ai le aiga. E mafai e le Tamaiti ma le Autalavou ona saunia se auala e valaaulia ai le aiga atoa e o mai ma vaai ma o mai ma fesoasoani mai. E mafai ona avea o se auala e faamalosia ai le aiga atoa, pe o i latou o ni tagata o Le Ekalesia a Iesu Keriso o le Au Paia o Aso e Gata Ai pe leai.

Sister Cordon: E toatele tamaiti ma le autalavou e le i ai ni o latou matua i le lotu i le Aso Sa, ae o loo i ai pea ni o latou matua alolofa. Ou te uunaia taitai ia faamasani ma matua ma iloa po o a a latou miti ma moomooga o i ai mo a latou fanau. E mafai ona tatou fesoasoani atu. A o tatou galulue soosootauau ma matua, o le a tatou faamalosia tagata taitoatasi ma o latou aiga ma uunaia foi tamaiti ma le autalavou ina ia fefaamalosiai aiga o le tasi ma le isi.

O le a sau tala e fai atu i matua ua lofituina o e fefefe ina nei le mafai ona latou fesoasoani i a latou fanau ia manuia i le Tamaiti ma le Autalavou?

Sister Cordon: O le mea sili, o le tele o mea o loo tatou faia. Ua uma ona aoaoina faatasi e aiga le talalelei. O lea ua tatou faia auaunaga ma gaoioiga. Sa i ai pea lava sa tatou taumafaiga mo le atinaega faaletagata lava ia; o lea ua na ona tatou taulai atu lava i auala na tuputupu ae ai Keriso.

A o tatou nonofo i lalo ma a tatou fanau, ou te manatu o le a tatou fiafia lava i ai. E na o lou faalogo lava i loto o lau fanau i se auala lelei, ma masani. E finagalo lo tatou Tama Faalelagi ia tupu ae lau tama, maua le olioli, ma toe foi atu e mau faatasi ma Ia. O le a e lagonaina le Agaga Paia ua taialaina oe ao e tauivi e avea le talalelei faatasi ma lo tatou Faaola o Iesu Keriso o se vaega o mea uma o lou olaga.

Sister Jones: Amata i le auala e fetaui lelei ai mo lou aiga. Ia talitonu o le a e maua le fesoasoani mai le lagi. Saili le taitaiga a le Agaga. O le Tamaiti ma le Autalavou o le a avea ma se meafaigaluega taua faamatua. E tele tulaga manaomia i matua i le taimi nei ao latou taialaina ma faafailele o latou aiga. E faigofie lava i nisi taimi ona lagona le mamafatu o avega. O le a fesoasoani le Tamaiti ma le Autalavou i matua e iloa le mea e manaomia mai le mea e taua. O le fesoasoani atu i o tatou aiga ia iloa le auala e mulimuli ai i le Faaola e ala i le musumusuga a le Agaga Paia e taua mo i tatou uma ma o le a aumaia ai le alofa ma faamanuiaga a le Alii.

Brother Owen: Ou te manatu o le a mafai moni lava ona e fesoasoani i au tamaiti ma le autalavou. E te le tau faia ni mea maoae. E oo mai i lalo i le mauaina o le faamaoni ma le agaga tatalo, ma le fatuina o ni mausa paia ma faiga masani amiotonu i lou aiga. Amata i nisi o mausa autu, faigofie, ma amiotonu, ma o le a e vaaia le tutupu o vavega i olaga o lau fanau.