O Se Mataupu Fou Matagofie
Ata na tusia e Carolyn Vibbert
Sa ou tapunia se mataupu se tasi i lou olaga ina ua avea au ma se tina ua oti lana tane ia Oketopa 2010. I lena taimi, sa ou faigaluega ai o se faufautua i Farani i saute. O se faalavelave faafuasei i le galuega na faatapulaa ai lou fealuai, ma sa ou le fiafia ona sa le mafai ona toe maua lou soifua maloloina ma lou malosi. Sa ou fiafia i se olaga faalegaluega faamanuiaina mo le 11 tausaga. Sa ou fiafia i lau galuega. Sa tele ni au uo. Ae sa le mafai ona ou toe ausia tulaga manaomia o lau galuega.
E tatau ona ou tautino atu, ina ua mavae le silia ma le 33 tausaga o faatinoina o le Upu o le Poto, sa ou mafaufau ai pe aisea ua le mafai ai ona “taufetuli ae le vaivai” pe “savavali ae le matapogia” (tagai Mataupu Faavae ma Feagaiga 89:20). Mulimuli ane, sa tatau ona ou litaea vave nai lo le mea na faamoemoeina, ma tapunia ai le isi mataupu i lou olaga.
Sa ma nonofo ma lou afafine ina ua ia iloaina o le a siitia atu o ia e lana galuega i le eria o Pale. Sa ou filifili e tatau ona ma o ma tatala se mataupu fou i lou olaga i se nofoaga fou.
E lei leva ona taunuu, ae valaauina uma i maua e galulue i le malumalu o Pale Farani. O lou valaauga e auauna atu i le malumalu na faamautu mai ai ia te au sa ou i ai i le nofoaga sao i le taimi sao aua na aumai au e le Alii iinei. Ua ou maua le tele o le olioli i le galue ai i se tulaga faifai pea i le maota o le Alii, ma e ese le matagofie o le faasoa atu o taimi i le malumalu ma lou afafine. Na te faatumuina lo’u loto i le olioli!
O le aso, ua ou iloa ai le faamanuiaga sili lea sa nana i tua o se mafatiaga. O le faaitiitia o lou fealuai, le le mafai ai ona toe faatino lau galuega, ma vave ona litaea na faigata. Ae ou te iloa sa tauave au e lo tatou Alii o Iesu Keriso. Sa Ia fesoasoani mai ia te au e faalemu i lalo ma saili le malologa, faamoemoe, ma le filemu ua avea nei ma se vaega tele o lou olaga.
O taimi uma lava ou te savali ai i faitotoa o le malumalu, ou te lagonaina le Agaga Paia. I taimi faigata faatasi ai ma le tele o uunaiga mai le lalolagi i o tatou luga, e matagofie tele le iloa ua tuuina mai e le Alii ia i tatou ni nofoaga paia lea e faatulaga lelei ma matagofie. Ou te lagonaina le agaga faafetai tele mo lenei mataupu fou o le auaunaga i le malumalu i lou olaga. E matagofie lava!