“E Tusa ma le poto o Ia o Le ua Silafia Mea Uma”
Ata na tusia e Christopher Wormell
Ina ua ou ulufale atu i le nofoaga autu mo le aoaoina o faifeautalai o se faifeautalai faamisiona, sa ou iloa ai e tele ni mea e tatau ona aoaoina. Sa ou faia le mea sili ou te mafaia e suesue ai, faamalosia lau molimau, ma fausia i luga o le faavae ua ou maua. Ou te tatalo, fesili i le Tama Faalelagi se fesili, ona saili lea mo ni tali. O lenei faatinoga na suia lo’u olaga.
I se tasi aso a o ou auauna atu o se faifeautalai i Peru, sa maua ai e se uso a faifeau se tusi e tau atu ai ia te ia ua maliu faafuasei le tama o sana uo mamae. Sa maligi ona loimata. “Aisea e faatagaina ai e le Tama Faalelagi lenei mea e tupu?” o lana tagi lea.
Sa ootia ai lou loto i lenei fesili. O le po lena, sa ou tootuli ai ma fesili atu i le Tama o i le Lagi i le fesili lava lea e tasi. Ona, ou sailiili lea i le Tusi a Mamona, ma tau atu ai lau vaai i le 2 Nifae 2:24, lea o loo faapea mai, “ae faauta, ua faia mea uma e tusa ma le poto o ia o le ua silafia mea uma.”
Sa oo mai i lou loto lena fuaitau ma sa lei aluese ai. Sa ou tusia se kata i le faifeau ma faaaofia ai lena mau o se vaega o lau molimau. Sa ou faamautinoa atu ia te ia o le a lelei mea uma ona e faia e le Tama Faalelagi ia mea i le poto. E mafai ona tatou faalagolago ia te Ia ona e alofa o Ia ia i tatou ma silafia mea uma.
Pe tusa ma se tausaga ma le afa mulimuli ane, sa ou auauna atu ai i atumauga o Peru ae ou maua se telefoni e lei faamoemoeina mai lau peresitene o le misiona. Sa ia fai mai na tigaina lou tama i le tino ua pe ma sa i ai i se tulaga ogaoga. Ina ua mavae sina taimi puupuu, na maliu lou tama. Sa ou matua faavauvau lava, ma sa ou lagona le faanoanoa i fesili e pei o le, “E mafai faapefea ona ou faagaloina lenei mea?”
Sa ou tatalo i le Tama Faalelagi mo se tali. E tele taimi sa ou fia iloa ai le mafuaaga na aveese ai lou tama e aunoa ma au, e oo lava i le maua o se avanoa e faatofa atu ai. Sa ou liliu atu i le Tusi a Mamona, tatala, ma faitau ai upu lava ia e tasi sa ou faasoa atu i lena faifeau i le tele o masina ua mavae: “Ae faauta, ua faia mea uma e tusa ma le poto o ia o le ua silafia mea uma.” O na upu na ufitia ai au i le filemu e pei o se palanikeke ma tuu mai ia te au le alofa tunoa ina ua ou lagona le toilalo.
Ua leai sou tama faalelalolagi, ae o lou Tama Faalelagi o le a i ai pea iina mo au. E faia e le Tama Faalelagi mea uma i Lona poto, ma a o tatou saili ma faia le mea sili tatou te mafaia e saunia ai i tatou lava, e mafai ona tatou maua ni tali taua.