Tamaiti ma le Autalavou:O se Taulaiga mo le Olaga i Aso Uma
Ata na pueina e Randy Collier
Atonu na faateia oe e faapea, o Tamaiti ma le Autalavou e le aofia ai lisi auiliili o sini uma e tatau ona e faia. Ua tele naua mea ofoofogia ua e faia! Ae, o lenei faiga patino na fatuina e fesoasoani ia te oe e latalata atili atu ai i le Faaola i auala e musuia ai ou manaoga taitasi ma mea e te fiafia i ai.
O le faamoemoega autu lava o le Tamaiti ma le Autalavou o le fesoasoani lea ia te oe e faamalosia lou faatuatua ia Iesu Keriso. Luka 2:52 ua aoaoina i tatou e faapea i le talavou o Iesu Keriso, na “tupu ai le poto ma le tino [o Iesu], ua alofagia o ia e le Atua ma tagata.” Sa soifua o Ia i se olaga paleni, ma e mafai foi e oe. E ala i le taulai atu i vaega faaleagaga, faaleagafesootai, faaletino, ma faaleatamai o lou olaga, e mafai ona avea atili ai oe e faapei o le Faaola.
Auiliiliga mai le Talaane o Vai Malu, saunia e Simon Dewey
E Faapefea Ona Faaaoga
Ua uunaia oe e le Tamaiti ma le Autalavou ina ia tuputupu ae faaleagaga, faaleagafesootai, faaletino, ma faaleatamai e ala i le punouai i le aoaoina o le talalelei, auaunaga, ma gaoioiga, ma atinaega o le tagata lava ia.
Aoaoina o le Talalelei
E pei lava ona “tupu le poto” o le Faaola (Luka 2:52), e mafai ona e tuputupu ae i lou atamai ma lou malamalama i le talalelei. O mataupu faavae uma o le talalelei e te aoaoina o le a fesoasoani ia te oe e iloa ai pe mafai faapefea e le Faaola ona faamalosia ma faamanuiaina oe i vaega uma o lou olaga.
E tele punaoa e mafai ona tatou faaaogaina e aoao atili ai e uiga i mataupu faavae o le talalelei ma avea ai faapei o le Faaola. Mo se faataitaiga, o le tatalo, suesue i tusitusiga paia, ma le Agaga e saunia le faavae. E mafai ona fesoasoani lou aiga ma taitai o le Ekalesia ia te oe e aoao atili e uiga i le Faaola. O mataupu aoaoina o le Sau, Mulimuli Mai ia te Au ma le seminare e mafai ona fesoasoani e taiala ai lau suesuega. A o e faaaogaina au punaoa e aoao ai e uiga ia Iesu Keriso ma Lana talalelei, o le a faaleleia ai lau sootaga ma Ia.
Auaunaga ma Gaoioiga
O le auauna atu i isi o se tasi lea o mea autu na faia e le Faaola a o i ai o Ia i le lalolagi. E ala i le mauaina o ni auala faigofie ma masani e fesoasoani ai ia i latou o loo i totonu o lou aiga ma le alalafaga, ua e mulimuli i Ana faataitaiga ma tautino ia avea atili e faapei o Ia.
O gaoioiga anoa a vaega e mafai ona fesoasoani ia te oe ma isi talavou e saili ni auala e auauna atu ai i isi ma ia tuputupu ae faatasi faaleagaga. O gaoioiga malie, ma faagaeetia e maloloina. Ma a outou faapotopoto faatasi o se vaega talavou, faamaoni o le Au Paia o Aso e Gata Ai, e tele lava ina mafai ona outou aoaoina ma faataunuuina ni mea se tele nai lo mea e te mafaia na o oe lava.
Atinaega PATINO
E amanaia tele oe ma le ituaiga o tagata ua avea ai oe e le Tama Faalelagi ma Iesu Keriso. A o e faia ni sini ina ia tuputupu ae i le tagata ua finagalo le Tama Faalelagi e avea ai oe, e mafai ona e latalata atili ia te Ia ma Lona Alo.
E tulaga ese tagata uma, o au sini la ia alualu i luma patino e tatau ona fetuunai i ou manaoga. Mo se faataitaiga, afai e te manao e aoao e ta ni viiga i luga o le piano, e mafai ona e faia se sini e faataitai i aso taitasi. Afai e te manao ia sili atu le lelei i le suesue i tusitusiga paia, atonu e te faatulagaina se taimi i aso taitasi e te faitau ai. Saili le taitaiga a le Agaga e maua ai se fuafuaga o le a sili ona aoga mo oe.
O le Tamaiti ma le Autalavou e mo OE
O le tagata e sili ona faamanuiaina o oe! A o e faatuina au lava sini e suesue ma ola i le talalelei, auai i auaunaga ma gaoioiga, ma atiina ae patino, o le a e aoao atili ai e uiga ia te oe lava ma le tagata moni o loo e i ai. O le galuega o le avea ma soo o Iesu Keriso e mafai ona faigata, ae o se sini aupito faamanuiaina lea e mafai ona tatou faia mo i tatou lava.
O Tamaitai e Masaga na Faatinoina le Tamaiti ma le Autalavou
O talavou e pei lava o outou ua amata ona vaaia faamanuiaga o le taumafai ia avea atili e faapei o Iesu Keriso i o latou olaga i aso uma. O Danika ma Natasha R., 15, mai Ohaio, ISA, o ni tuafafine masaga o e na filifili e faia le mea tonu lava lena. O lo la tama e mai Taialani, ma ona o nisi taimi la te asiasi atu ai i aiga iina, o lea na filifili ai Danika ma Natasha e fia aoao atili e uiga i meaai ma le gagana Tai.
Na faia e Danika se sini e faataitai fua o supo faaTai. Sa ia faatau mo mea na manaomia ma sa ia faatinoina ni auala fou o le kukaina ma lona tama. Sa manao Natasha e aoao e fesootai ma lona aiga i Taialani, o lea sa ia faatuina ai se sini e aoao se upu fou se tasi i aso taitasi. Sa ia faaaogaina se upegatafailagi e fesoasoani ai i ana suesuega i le gagana ma faataitai le faaleoina o upu ma lona tama.
A o galulue Danika ma Natasha i a laua sini, sa la mananao e faasoa atu i isi tamaitai talavou o la latou uarota le mea sa la aoaoina. Sa fesoasoani o latou taitai ia i laua e faatulaga se gaoioiga e aoao atili ai e uiga ia Taialani. I le gaoioiga, na aoao ai e Danika le kukaina o le supo mo tagata uma a o Natasha na aoaoina i latou i ni upu Taialani.
Sa faaaofia ai foi e le auuso la laua uo o Grace i le gaoioiga. Sa i ai ia Grace se sini patino ina ia lelei atili i le tautala atu i nofoaga faitele, o lea sa ia tuuina atu ai se aoaoga i le auala e faaaoga ai fasilaau [chopsticks] e ai ai la latou supo!
E ala i le faataitaiina o a latou sini ma galulue ma o latou taitai ma isi tamaitai talavou, na mafai ai e Danika ma Natasha ona fuafua se po malie e fiafia ai ma a la uo.
Faamanuiaga o le Auai i le Tamaiti ma le Autalavou
Na faasoa atu e Danika ma Natasha ua la mauaina le tele o faamanuiaga e ala i le taumafai e aoao atili e uiga i lo la tofi ma faamanatuina faatasi ma lo laua aiga ma isi tamaitai talavou. E lei oo mai lo la aafiaga e aunoa ma ni luitau. Na faamatala e Natasha, “Sa ou i ai i le aoga ao ou aoaoina le faaTai, o nisi taimi sa faigata ona maua se taimi e fai ai.” Na faaopoopo mai Danika, “I le gaoioiga, sa i ai sina faaletonu i le faia o le supo na o au aua e le o i ai iina lou tama.” Ae ua malilie uma ia tamaitai i le iuga, sa matuai aoga lava.
Ua fai mai Danika, “Ou te fiafia lava i lou faaaluina o le taimi faatasi ma lou tama, ma na fesoasoani ou te lagona ai le latalata atili i lou aiga.” Ua ia faamatala foi, “O le faia ma le tausia o au sini patino na fesoasoani ou te latalata atili atu ai ia Iesu Keriso e ala i le tuuina mai ia te au o se ala manino e fesoasoani ai ia te au lava ia ma isi. Nai lo na o le feoeoeai faatasi lava e pei o nisi po, sa i ai sau tulaga faatonuina e mulimuli ai, ma ou tumau ai, ma na ou maua ai se isi taimi tele e mafaufau ai ia Keriso.”
Fai mai Natasha o le faia ma le tausia o lana sini “sa matuai ou mafaufau loloto ai i le mea sa ou manaomia ma sa ou manao e fai ina ia ou latalata atili atu ai ia Keriso.” Ua ia tusia foi e ui lava ua uma ona ia taulai atu i se sini fou, ae sa musuia lava o ia e aoao pea le faaTai: “O lau uluai sini lava o le aoao o le gagana Taialani ina ia mafai ona ou talanoa atu i lou aiga i Taialani, o lea ou te manao ai pea e aoao le faaTai ina ia mafai ona ou talanoa atu ia i latou.”
O le tutusa o le faiga e Danika ma Natasha o lo la atinaega patino na fesoasoani ia i laua e aoao atili ai e uiga i le aganuu a lo la tama, fiafia faatasi ma uo, ma faalatalata atili ai i o la aiga ma le Faaola—ma o le mea lena e faatatau i ai le Tamaiti ma le Autalavou.
O lou auai i le Tamaiti ma le Autalavou e mafai foi ona fesoasoani e fausia ai ni sootaga ma lou aiga, isi talavou ma le uarota, aemaise lava le Faaola a o e taulai atu i le auala e avea ai oe ma se oe e sili ona lelei.