O Se Lelei Laitiiti i Aso Taitasi
Saunia e Sister Joy D. Jones
Peresitene Aoao o le Peraimeri
A o ou laitiiti, sa ou taina le vaiolini. Sa ou manao ia leo manaia. Sa ou fia taina mo ou matua ona la faapea mai lea, “Auoi, Joy, tai manaia!” Ae e le’i leo manaia. Sa ‘o‘ī!
O nisi taimi pe a ou le faataitai, e faapea mai lou faiaoga, “Joy, na e faataitai i lenei vaiaso?” Na ou manao ai e faataitai ina ia mafai ona lelei lau tata i le vaiaso e sosoo ai.
O le toe tepa i tua, o le taina o le vaiolini o se aafiaga lelei aua sa faigata. E ui lava ou te lei fiafia e faataitai, ae sa ou aoaoina le tele o mea mai le faatuina o se sini e faataitai teisi i aso uma.
O le mea lena ou te faamoemoe o le a outou faia. Taumafai ia lelei teisi atu i aso taitasi. E le faamoemoe le Tama Faalelagi ina ia mafai ona e faia mea uma i le taimi e tasi. O le olaga e faatatau lea i le aoaoina ma le tuputupu ae teisi i taimi taitasi. E finagalo o Ia ia e taumafai pea. Ma e finagalo o Ia ia e fiafia i le tuputupu ae!
O nisi taimi tatou te faafaigata ai ia i tatou lava. Tatou te manatu, “Na ou le mafaia. E le mafai ona ou faia, “ona tatou faama’amulu lea. Ae o loo fetalai mai le Faaola, “Ia faaauau pea. O lea ou te iinei e fesoasoani ia te oe!” Ona o Iesu Keriso, tatou te le faia ai na o i tatou. E mafai ona tatou tutu i luga ma toe taumafai faatasi ma Lana fesoasoani. O le mea lena e faatatau i ai lenei olaga.
Afai e i ai se mea se tasi ou te moomoo maimau pe ana mafai ona outou iloa i o outou loto, o le faapea atu e alofa le Tama Faalelagi ia te oe. Atonu o e feagai ma mea faigata, ae ua saunia oe e sau i le lalolagi i lenei taimi. Tau lava o le taumafai pea ma faaauau pea ona faasoa atu lou malamalama. O le a faamanuiaina ma taialaina oe e le Tama Faalelagi a o e mulimuli i le ala o le feagaiga. ●