E Taua le Agalelei
O le Faatoesega
I se tasi aso i le aoga, sa taufaalili ai nisi o tamaiti o lau vasega i se isi tamaitiiti e ala i le valaauina o ia i ni igoa. Sa foliga mai o se mea malie, o lea sa ou auai ai ma i latou. Mo ni nai vaiaso, sa ou taufaalili atu ai ia te ia ma au uo.
I ni nai vaiaso mulimuli ane, sa tau mai ai e lea tama ia te au ona lagona. Sa tiga o ia i a matou upu e ui lava ina sa ia foliga mai sa lei popole o ia i le matou ula ia te ia. Sa fai mai o ia, sa ia tagi i po uma. Sa toetoe lava a ou tagi ina ua ia tau mai ia te au. Sa ou manao e fesoasoani ia te ia ma filifili ai e faatoese atu mo le mea na ou fai atu ai ia te ia.
O le aso la na sosoo ai, sa ou alu atu ai ia te ia ma faauouo ia te ia. Sa ou fai atu, “Ou te faamalie atu na ou taufaalili ia te oe.” Sa luelue lona ulu i au upu, ma sa faatumulia ona mata i loimata. Ae sa ula pea isi tamaiti ia te ia. Ona ou manatuaina lea o mea na ou aoaoina i lau vasega o le Peraimeri: filifili le mea tonu.
Sa ou fai atu i tamaiti o lau vasega ma le lototoa, “Aua le ula ia te ia! Na outou iloa ea le faigata o lenei mea mo ia? Faamolemole ia faatoese mo le mea ua outou faia ma avea ma ana uo.”
Ae sa le faigofie ona suia i latou. Nai lo lena, sa latou feita ia te au ma fai mai, “O le a le mea ua te’i a ua e faapena ai? Sa e taufaalili foi ia te ia!”
Sa ou lagona pea le faanoanoa i le mea sa ou faia muamua. O lea na ou fai atu ai, “Ua uma ona ou faatoese atu ia te ia. Ou te manao ia outou malamalama i ona lagona ma aua nei outou ula ia te ia.”
Sa faatoese se tasi o i latou, ma o le toatolu o i matou na avea ma uo lelei. O loo iai ni nai tagata o loo ula pea ia te ia, ae ua ia maua le lagona lelei teisi ona ua ia maua i ma’ua. O le a ou filifili le mea sao e ala i le fesoasoani atu i se uo o manaomia le fesoasoani. ●