Ou te manatu o nisi taimi e faigofie mo talavou matutua ona talitonu o le salamo o se mea e taufaafefe. E moni lava e mafai ona taufaafefe le tautino atu o mea sa tatou faia pe a tatou fefefe pe o le a leai se alofa mai tagata tatou te alolofa i ai pe mai lo tatou Tama Faalelagi. Faatasi ai ma lena vaaiga o le salamo, atonu o le a faaosoosoina ai i tatou e tautau atu “tau lava o mea” e pasi ai le lagona e pei o se suega e agai atu i le isi tulaga. Ae peitai, ua ou iloa e ala i ou aafiaga e le faapena le salamo moni. E le o taimi uma e mafanafana ai le salamo, ae afai tatou te malamalama i le tele o le alofa o le Alii ia i tatou ma finagalo e fesoasoani ia i tatou, o le a mou ese le fefe pe a tatou faatinoina lo tatou faatuatua i Lona mafaia ona faamama i tatou. Ua ou aoaoina a ou faatinoina lou faatuatua ia Keriso e ala i le salamo, o au mea sese ua tuanai e le tau faauigaina ai lou taimi nei po o lou lumanai (faitau atili i lau tusiga i le itulau 44).
I tusiga na o le faaeletonika ua tau mai ai e Evita, o le salamo moni e aumaia ai ia i tatou le agaga faafetai mo le Faaola ma Lana Togiola ma tuuina mai ai ia i tatou le malosi e tetee atu ai i faaosoosoga o le lumanai. Ua faaopoopo mai Leah tatou te tau le faatalitali mo le faamanatuga i le Aso Sa—o le liliu atu i le Alii e ala i le salamo i aso taitasi, tatou te maua ai le mana e taofi ai e oo lava i ni mausa laiti e aveesea ai i tatou mai ia te Ia. Ma afai tatou te faia ni mea sese matuia, ua faasoa mai e Jori faapea o le faagasologa o le salamo e mafai ona aoaoina ai i tatou e uiga i le alofa o le Faaola mo i tatou taitoatasi.
O le salamo o se meaalofa ou te faafetai ua i ai i lou olaga. E silafia e le Atua o i tatou o tagata ma e fai ai a tatou filifiliga faavalevalea i nisi taimi. I le le atoatoa o loo tatou i ai, o loo i ai le faamoemoe mo i tatou. Afai tatou te tuu atu lo tatou faatuatuaga i le Faaola, o le a Ia savali faatasi ma i tatou i luga o le auala e toe foi atu ai i lo tatou Tama i le Lagi—e tusa lava po o le a le umi e alu ai.