O se Faatanoa o le Molimau
Ata na tusia e Phil, i2iArt.com
I lou tausaga muamua i le aoga maualuga, na tetea ai ou matua. Mo le tele o tausaga, sa ou vaai i lou tama e le o tagofia le faamanatuga. Sa ou iloa sa ia tauivi e tausi poloaiga, ae sa ou le malamalama i le maualuga po o le umi o na tauiviga. Ae ina ua tau mai e ou matua ia te au e uiga i le tapeina o lona igoa na iu ai ina ma aoaoina ma lou uso ia faamatalaga.
“Ou te ita ia te oe!” Sa ou ee atu ai pea, ma tagi masusu. Sa ou matuai ita lava. Efaapefea ona ia faia lenei mea i lo matou aiga? Sa ou mafaufau ai. E faapefea ona ia pepelo ia i tatou mo se taimi umi?
O le uluai faateia ma le ita sa lei umi. I totonu o ni nai vaiaso, na suia lou ita i le le toe kea loa. I le taimi muamua, o le le toe kea o se toomaga mai le ita ma le tiga na ou lagonaina, ae na iu lava ina suia lou toomaga i le atuatuvale. Sa ou lagonaina le mamafatu o lou olaga ua siomia ai au. E sili atu nai lo se isi lava taimi muamua, sa manaomia ona ou fesootai atu i le lagi. Sa manaomia ona ou lagonaina le alofa o le Atua, taitaiga, filemu, ma le faamalologa.
E lei umi, ae oo mai le konafesi aoao. I se tasi sauniga, sa ou faalogo ma faatalitali ina ia lagona le faamafanafanaga a le Atua. Ae e le’i oo mai. O iina i le falesa pogisa, sa ou mafaufau ai, e le mafai ona ou lagonaina le Agaga Paia, ae ou te mautinoa o loo i ai o Ia iinei. E tatau ona i ai o Ia iinei. A o ou mafaufau i lenei mea, sa amata ona ou manatuaina le tele o molimau laiti na ou mauaina e moni tusitusiga paia, o Iosefa Samita o se perofeta, ua faamanuiaina e le Tama Faalelagi lou aiga, ma o le tausia o poloaiga na aumaia ai le filemu. Sa pei o loo i ai sau faatanoa o le molimau.
O le tele lava o lou toe mafaufau i au molimau faaleagaga ua mavae, o le tele foi lena o lou iloaina e ui lava sa ou matuai manao lava e lagona le Agaga, ae sa matuai le afaina lava pe le mafai ona ou lagonaina Lana uunaiga i lena taimi tonu lava. Ua i ai sau faleoloa o ni molimau filemu, ma tumau e moni le talalelei.
O lena malamalama na lagolagoina ai au ma tuuina mai ai ia te au le manao e faaauau pea ona tausia poloaiga e tusa lava pe na foliga mai na le vave mai faamanuiaga. Na faasolosolo lava, ina ou lagonaina atili le alofa o le Tama Faalelagi ma le Faaola i lou olaga. O le latalata ia i Laua, e tusa lava pe le mafai ona ou lagonaina i taimi uma i Laua ua latalata mai, na aumaia ia te au se filemu e le mafaafitia ma se molimau e malosi atu i le talalelei a le Faaola. O loo faaauau pea ona faatosinaina au i le taimi nei pe a ou feagai ma le le mautonu po o le lototiga. Ou te iloa e mafai ona ou faatuatuaina le Tama Faalelagi ma le Faaola, ma o le a La faamaloloina, siitia, ma faamalosia au ma i tatou taitoatasi.