O le Vaai atu i le Lumanai, ae Siitia e le Taimi ua Tuanai
Mo le toatele o le lalolagi, o le tausaga fou o se taimi lea e mafaufau ai i le lumanai. Ae o se taimi foi e aoao ai mai le taimi ua tuanai. I lenei fetaulaiga ala sa tatou i ai ma le mea o loo tatou o i ai, tatou te maua ai avanoa e tuputupu ae ai.
I lena agaga, e le gata ua i ai i lenei lomiga ni nai suiga fou mananaia mo le lumanai, ae ua suesue ai foi mai lo tatou taimi ua tuanai ina ia malamalama ai i la tatou vaega i le mea o le a oo mai.
O le tausaga lenei tatou te faamanatuina ai le 200 tausaga o le Uluai Faaaliga. Ua saunia e le Au Peresitene Sili ma isi se faasologa o tusiga e suesueina ai le taimi ua tuanai ma fesoasoani ia i tatou e mamanuina lo tatou lumanai. O le masina lenei, e fesoasoani ai Peresitene M. Russell Ballard, o le Sui Peresitene o le Korama a Aposetolo e Toasefululua, tatou te malamalama ai i lo tatou tulaga i le Toefuataiga faifai pea o le malo o le Atua ma Ana taumafaiga e saunia i tatou mo le Afio Mai Faalua (tagai i le itulau e 12).
O le vaai atu i le lumanai, e maua ai foi e lenei lomiga ia punaoa mo le taumafaiga fou a le Ekalesia e lagolago tamaiti ma le autalavou (tagai i itulau 20 ma le 26) ma faalauiloa atu ai le kosi o le suesuega o le Tusi a Mamona mo tagata taitoatasi ma aiga (tagai itulau 34 ma le 38). Ua folasia mai e la tatou anotusi mo le autalavou le autu fou a le autalavou (tagai i itulau 56 ma le 60).
Matou te faamoemoe o loo faaauau pea ona avea le Liahona ma se punaoa taua i le lagolagoina o a outou suesuega o le talalelei e totonugalemu i le aiga a o tatou agai atu i luma faatasi, e uunaia e le gasologa o le taimi ua tuanai.
Adam C. Olson
Pule Faatonu