Tatalaina o le Mana o le Tusi a Mamona
E alala le tusitala i Arisona, ISA.
A o ou i ai i le misiona i Filipaina, sa ma aoao atu ma lau soa se lesona e faapitoa le mamana e uiga i le taua o le suesue i aso uma i le Tusi a Mamona. I le faaiuga o le lesona, sa tuuina mai ai e lau soa se tasi o molimau e sili ona mamana o le suesueina o tusitusiga paia ou te lei faalogo muamua i ai. Sa ia molimau mai o le faitauina o le Tusi a Mamona na faaopoopo ai se mana fou i lona olaga lea sa le mafai ona faamatalaina.
Sa manino lava o lona aafiaga i le Tusi a Mamona na suia ai lona olaga, ma sa ou manao ai mo au lava ia.
Sa ou filifili i lena po o le a ou toe faitauina le Tusi a Mamona. Mai le amataga.
Sa ou faaaluina le tele o taimi i ou tulivae e faamatala atu ai i le Atua sa ou manao e lagonaina le liua ma le mana lea e sau mai le Agaga Paia.
O le tali na ou maua o le: Faitau. Na o le faitau a.
O le mea la lena sa ou faia. Sa ou tuu atu au lava i le faitauga ma se malosi fou. Sa ou gauai faapitoa atu i fuaiupu, mataupu, ma itulau taitasi. A o ou faitau, sa ou maua fuaiupu na taliina au fesili, ma faafilemuina ou popolega, ma fesoasoani e sii ae ia avega a i latou sa ou aoaoina.
Ina ua mavae se masina, sa ou iloaina se mea o i totonu ia te au ua suia. Ua faateleina lou malosi e alofa ai i isi; Sa tele atu lou faamoemoe i le lumanai; Sa mafai ona ou galue malosi ma umi atu i aso taitasi; Sa atili ona ou taulai atu i le galuega; ma sa amata ona ou lagonaina le olioli tele.
I se tasi aso i au suesuega na ou tau atu ai i se upusii mai ia Peresitene Ezra Taft Benson (1899–1994), na avea muamua ma peresitene o le Ekalesia: “O loo i ai se mana i le [Tusi a Mamona] lea o le a amata ona oo mai i o outou olaga i le taimi lava e amata ai ona e suesue ma le faamaoni i le tusi. … A amata loa ona e matelaina ma galala i le fia maua o na afioga, o le a e mauaina le ola i se faatelega sili atu naua o faamanuiaga. ”1
A o faaauau pea ona ou suesue, sa amata ona ou malamalama moni i lona uiga. Sa ou mauaina le ola i se olaga e sili atu.
O le toe tepa i tua, ua ou mautinoa ai o se tasi o mafuaaga na tuuina ai au i lena soa, ina ia mafai ona ou i ai iina i lena po e faalogologo i lana molimau. Sa ou lagonaina vaega lelei uma o le olaga—alofa, faamoemoe, faatuatuaina, galue malosi, naunautai, ma le olioli—sa faateleina.
Sa i ai se malamalama fou i lou olaga, ma na ou iloaina e moni.