O Le Opo E Sili Ona Manaia!
E alala le tusitala i Iuta, ISA
Sa fiafia Eli pe a opoina. Opo mai ia Tama. Opo mai ia Tinamatua ma Tamamatua. Opo mai ia Tina. O ni opo na te lagona ai le mafanafana. Ma le saogalemu. Ma le fiafia.
O le mea lena na opo ai e Eli ia Tina i le taimi o le lotu. Sa fiafia o ia e nofo i luga o vae o Tina. E masani lava ona fusi mau e Tina o ia.
Ona faaiuina lea o le sauniga faamanatuga. Ua oo i le taimi o le Peraimeri. Sa fiafia Eli i le Peraimeri. Ua teine matua o ia i le taimi nei. Tolu tausaga le matua! Sa i ai foi ana ia lava tusitusiga paia!
Peitai i le aso, sa na o le pau lava le mea na manao ai Eli o le faaauau pea ona opo Tina e faavavau.
Na sii atu e Tina ia Eli i lalo atu o le fale faafiafia. I le potu o le Peraimeri, sa faanofo e Tina Eli i luga o se nofoa.
“E mafai ona ta o?” Na fai mai ai Eli.
“Leai,” o le tali atu lea a Tina. Sa agalelei lona leo. “E tatau ona e i ai i lau vasega,” o lana tala lea. “Ma e tatau ona ou i ai i la’u vasega.”
Na kisi atu Tina i le alafau o Eli. Ona ia savali atu lea i fafo o le faitotoa.
Sa lagona e Eli le tafe ifo o loimata i ona alafau.
Sa ia mafaufau i le fusiina o ia e Tina. E masani lava ona fusi o ia e Tina pe a la faitauina le Tusi a Mamona. E masani lava ona latou faitau faatasi ma le aiga. Ae o nisi taimi sa faitau ai nao Eli ma Tina.
Sa piki i luga e Eli lana Tusi a Mamona. Sa i ai totonu se ata o Iesu.
Sa tapuni e Eli le tusi ma opoina. Sa ia lagona e pei o loo ia opoina Iesu. Sa ia lagona le mafanafana. Ma le saogalemu. Ma le fiafia. O le opo sili lea ona manaia! ●