O le a le Mea e Faatusa i ai le Fua i le Faaaliga a Liae?

I le faaaliga a Liae, o le a le mea e faatusa i ai le fua, e “sili ona manaomia nai lo isi fua uma,?” (1 Nifae 11:22).

“O le fua o le laau o se faatusa mo faamanuiaga o le Togiola a [Iesu Keriso]. O le taumafaina o le fua o le laau e faatusa i le mauaina o sauniga ma feagaiga lea e mafai ai ona aoga atoatoa le Togiola i o tatou olaga”(David A. Bednar,“Miti a Liae: Piimau Pea i le Ai Uamea,” Liahona, Oke. 2011, 34).

O nei sauniga e aofia ai le papatisoga, faamauga, ma le faamanatuga, faauuga o le perisitua mo alii, ma sauniga o le malumalu.

Mauaina o le Fua

O le ai uamea, po o le afioga a le Atua, e taitai atu ai i tatou ia Iesu Keriso aua ua valaaulia i tatou e tusitusiga paia ma perofeta o ona po nei ina ia auai i sauniga ma feagaiga ma fesoasoani ia tatou malamalama ai i aoaoga, misiona, ma le taulaga a Iesu Keriso.

O a upu mai tusitusiga paia po o le au perofeta o nei ona po ua taitai atu ai oe ia Iesu Keriso?

Tumau i le Fua

O nisi tagata i le faaaliga a Liae na lafoai le fua ona o le tauemuga ma faitioga a isi. O le tumau ai i le fua o le tumau lea i le faamaoni i a tatou feagaiga ma ia asiasi pea i nofoaga e osi ai feagaiga.

Faasoaina Atu o le Fua

Ina ua uma ona taumafa Liae i le fua, sa manao o ia e faasoa atu i lona aiga ina ia latou lagona ai le “olioli tele naua” sa ia lagonaina (1 Nifae 8:12).

E mafai faapefea ona e faasoa atu lou alofa ia Iesu Keriso ma fesoasoani i isi ia auai i sauniga?