Avea e Faapei o Nifae

Saunia e le Au Peresitene Aoao o Alii Talavou

Ina ua fai atu Nifae i lona tama, “o le a ou alu ma fai mea ua poloaiina e le Alii” (1 Nifae 3:7), na ia tuuina mai ia i tatou se faataitaiga musuia o le faatuatua ma le usiusitai ma le filiga. O le tautinoga a Nifae e alu ma fai sa mauaa i uiga taua e lua e mafai e i tatou uma ona atiina ae: o lana molimau patino e uiga i le Alii ma Ana perofeta, ma lona malosi faaleagaga.

Atiina Ae o se Molimau

Sa usiusitai ia Nifae aua sa ia sailia ma maua mai lana lava molimau e uiga i poloaiga a le Alii i lona tama (tagai i le 1 Nifae 2:16–20). Sa ia iloa o le galuega o le aumaia o papatusi apamemea o le a faigata. Ae e le pei o ona uso, sa ia iloa o le a faatasi le Alii ma ia ma saunia se ala mo i latou e faataunuuina ai.

O lenei faatuatua i le Atua ma Lana perofeta na faamanuiaina ma lagolagoina ai Nifae i lona olaga atoa ma fesoasoani ai ia te ia e ausia mea ofoofogia. E pei o Nifae, e mafai foi ona tatou faia ni mea tetele i o tatou olaga a o tatou taumafai e usitai i le fautuaga tatou te maua mai perofeta soifua, o musumusuga a le Agaga Paia, ma tusitusiga paia. Mo se faataitaiga, o le perofeta a le Alii i aso nei, o Peresitene Russell M. Nelson, ua talosagaina i tatou ina ia fesoasoani e faapotopotoina Isaraelu ma saunia mo le toe afio mai o le Faaola.¹

A tatou suesue i le afioga a le Atua ma usitai i ai, o le a tuputupu ae lo tatou faatuatua ma o le a tatou lagonaina i totonu o o tatou loto se naunautaiga ina ia faaauau pea ona usiusitai, e tusa lava pe tatou te iloa o mea e faigata.

Ata

young man hiking

Atiina Ae o le Malosi Faaleagaga

Ua aoao mai foi i tatou e le faataitaiga a Nifae i le uiga faaKeriso o le malosi—galue i luitau nai lo le vaavaai atu mo se auala faigofie. E i ai taimi i o tatou olaga e talosagaina ai i tatou e faia ni mea faigata ma mamafa. I na tulaga, afai tatou te faalagolago i lo tatou faatuatua ia Keriso ma filifili le “mea e sili atu ona faigata ae sao nai lo le mea sese e faigofie atu,”² o le a faamanuiaina i tatou.

A e feagai ma se filifiliga po o se galuega faigata, o le i ai o se uiga o le “alu ma fai” o le a fesoasoani e te tumau ai. O le tali atu ma le faamaoni i le taitaiga e te maua ua faaali mai ai o le Alii e mafai ona Ia faalagolago ia te oe ma faateleina lou faatuatua ia Iesu Keriso.

A o e galue ma le faamaoni e atiina ae lau molimau, le malosi faaleagaga, ma se uiga “alu ma fai” o le a faamanuiaina oe e le Alii, faamalosia oe, ma lagolagoina oe i lenei tausaga ma i lou olaga atoa. ◼