O le Ala na Saunia ai e le Alii le Lalolagi mo le Toefuataiga
Saunia e Peresitene M. Russell Ballard
Sui Peresitene o le Korama a Aposetolo e Toasefululua
I le anoanoai o itu, na saunia ai e le Alii le lalolagi mo le Toefuataiga o Lana talalelei ina ia faamanuiaina ai tagata taitoatasi, aiga, nuu, malo, ma le lalolagi.
O Malosiaga o le Malamalama ma le Pogisa, saunia e Warren Luch, faaaloaloga a le Falemataaga o Talafaasolopito o le Ekalesia
Na saunia e le Alii le lalolagi mo le Toefuataiga o le talalelei a Iesu Keriso a o lei taitai faaali mai le Tama ma le Alo ia Iosefa Samita i le 1820. O le mea moni, o le sauniuniga a le Alii e toe fuatai mai le atoatoaga o Lana talalelei i aso mulimuli na amata a o lei foafoaina le lalolagi.
I le faaaliga ia Oketopa 1918, ua taua o le Mataupu Faavae ma Feagaiga vaega e 138, na maua ai e Peresitene Iosefa F. Samita (1838–1918), ua tatou iloa ai o uluai taitai o Le Ekalesia a Iesu Keriso o le Au Paia o Aso e Gata Ai ma le toatele “o isi agaga filifilia … sa faapolopoloina ina ia oo mai i le atoaga o taimi e auai i le faataotoina o faavae o le galuega tele o aso e gata ai” (Mataupu Faavae ma Feagaiga 138:53; ua faaopoopo le faamamafa).
Na vaai Peresitene Samita “sa i ai foi i latou o e tamalii ma tautaua o e na filifilia i le amataga” (Mataupu Faavae ma Feagaiga 138:55). Na ia faaopoopo mai “o i latou, faatasi ma le toatele o isi, sa latou maua a latou lesona muamua i le lalolagi o agaga ma sa saunia e o mai i le taimi e tatau ai a le Alii e galulue i lona tovine mo le faaolataga o agaga o tagata” (Mataupu Faavae ma Feagaiga 138:56; faaopoopo le faamamafa).
Ina ua mavae le foafoaina o le lalolagi, na talanoa, pepese, miti, ma vavalo “perofeta paia uma lava talu mai anamua” e uiga i le “toefuatai ai mea uma lava” i le lumanai (Galuega 3:21; tagai foi i le Luka 1:67–75).
O le talanoa patino e uiga i le uluai perofeta o le Toefuataiga o le Ekalesia a Iesu Keriso, na matauina ai e Peresitene Polika Iaga (1801–77), “Na tulimatai le fofoga o le Alii ia [Iosefa Samita], ma luga o lona tama, ma luga o le tama o lona tama, ma luga o o latou tuaa e oo lava ia Aperaamo, ma mai ia Aperaamo e oo atu i le lolo, mai le lolo e oo atu ia Enoka ma mai ia Enoka e oo atu ia Atamu. Na Ia tulimataiina lena aiga ma lena toto a o salalau atu mai lona puna faavae e oo atu i le fanau mai o lena tagata. Na muai faauuina [Iosefa Samita] i le faavavau e pulefaamalumalu i lenei tisipenisione mulimuli.”1
A o tatou faamanatuina le 200 tausaga o le Uluai Faaaliga i lenei tausaga, atonu e talafeagai le manatuaina o le toatele o tamaitai ma alii i le aluga o seneturi na musuia e le Alii a o Ia saunia le lalolagi mo le Toefuataiga lea na amata ina ua faaali atu le Tama ma le Alo i le alii talavou o Iosefa Samita, o le sa sailia le faamagaloga ma le taitaiga i le 1820.
A o tatou toe tepa i tua i le talafaasolopito, o le a tatou iloa ai o le tele o le toe faaleleia na salalau atu i le salafa o le lalolagi na saunia ai tagata mo le Ekalesia a le Alii ina ia toefuatai mai i aso e gata ai.2
O le Faaleleia i Tusitusiga
O se tasi o ala sili ona taua na saunia ai e le Alii le lalolagi mo le Toefuataiga o Lana talalelei o se faaleleia o tusitusiga o le a tupu mai i le fatufatuaiga ma le faaaogaina o pepa ofevai ma paumanu.3
O paumanu, na faia mai pau o manu, sa faaaoga i aso anamua ma le vaitau popofou o aso nei e tusitusi ai.4 O uluai kopi na muai iloa o le Tusi Paia faa-Eperu (Feagaiga Tuai) ma le tele o kopi taua mulimuli ane o le Tusi Paia na faasaoina i paumanu.5
O pepa ofevai, na faia mai le ogatotonu o le laau o pepa ofevai, o se isi mea na faaaoga i aso anamua e tusitusi ai. O kopi muamua o tusi o le Feagaiga Fou ua faasaoina i pepa ofevai.
O nei mea na faaaoga e tusitusi ai na faigofie ai, e faatusatusa i le tusitusi i luga o le maa po o le omea, mo le au tusiupu e faamaumau ia afioga a le Atua na maua e ala mai i perofeta ma aposetolo musuia. O le faaaogaina o nei punaoa e tusitusi ai, o le tele o tusiupu e le mafaitaulia ma le le mailoa na kopiina ma le maelega, auina atu, ma faasaoina ia tusitusiga paia i ni kopi se tele ina ia le mate ai le mumu o le faatuatua.
Mo se faataitaiga, sa ou aoaoina talu ai nei lava “e silia ma le selau tusiga o le Evagelia a Mataio ua tusia i le faa-Eleni,” faatasi ai ma le tele o isi tusitusiga faaletusi paia i le Ogatotonu o Tausaga na tusia i paumanu.6
Atatusi o le fale lomitusi o le seneturi lona 16, mai le Getty Images
O le Faaleleia i le Lolomiga
E pei ona masani ona ou aoao atu, na musuia e le Alii se isi laasaga musuia maoae i le sauniaina o le lalolagi mo le Toefuataiga o Lana talalelei faaola ina ua faaaogaina e se faiomea Siamani, o Johannes Gutenberg, le lolomiina faatekinolosi na muai faalauiloa i Saina ina ia gaosia ai le lomitusi i le 1439 po o le 1440.7
O Gutenberg o se meafaigaluega i le aao o le Alii e faateleina ai le atamai, malamalama, ma le faatuatuaga faalelotu i le lalolagi.8 O lana fatufatuaiga na amata ai se faaleleia i le lolomiga lea na suia ai le lalolagi e faavavau e ala i le faafoeina o le faasalaluina lautele o manatu ma faamatalaga na avea ma “vaega e faia suiga.”9
E fuafua e tagata atamamai e uiga i le 30,000 tusi sa i ai i Europa i le taimi na lolomi ai e Gutenberg le Tusi Paia i luga o lana lomitusi. I totonu o le 50 tausaga talu ona maea lana fatufatuaiga, e silia ma le 12 miliona tusi na maua i Europa.
O le Toefaatulagaina o le Porotesano na uunaia ai le fatufatuaiga a Gutenberg e faasalalau atu ona manatu ma aumaia ai le Tusi Paia i tagata lautele i auala na le mafai e se tasi o le augatupulaga na muamua atu ona mafaufauina.
O le Faaleleia i le Faitau ma le Tusitusi ma le Faaliliuina o le Tusi Paia
O le faaleleia i le lolomiina ma na faaleleia e se faatelega o le tusitusi ma le faateleina o le galala o tagata lautele o Europa e faitau i upu paia o tusitusiga paia i a latou lava gagana.
O le Tusi Paia Faa-Latina, na faaliliuina mai le faa-Eleni ma le faa-Eperu i le seneturi lona lima TA, sa avea ma Tusi Paia aloaia a le ekalesia Katoliko i sisifo mo le 1,000 tausaga.10 Mo le tele o seneturi na iloa ai e le toatele o Europa e uiga i le Tusi Paia e tele lava i lauga na tuuina mai e patele.
Ae i le seneturi e 15 ma le 16, na fatuina ai e tagata na toe faatulagaina mataupu faalelotu ni faaliliuga fou o le Tusi Paia i gagana masani o Europa, e pei o le faaSiamani, Italia, Igilisi, Sipaniolo, ma le faa-Farani. O nei faaliliuga sa masani ona faavae i tusiga autu o le faa-Eperu ma le faa-Eleni—ae le o le Tusi Paia Faa-Latina. Na mafai ai e le faitau sefulu afe o tagata faitau ona iloa tala ma aoaoga o le Tusi Paia i a latou lava gagana.
O Matini Luteru, na fanau i le 1483, o se tasi o taitai i le lolomiina o le Tusi Paia i le gagana o ona aso. O lana faaliliuga faa-Siamani sa lolomiina i 1534—o se tausaga taua i le talafaasolopito o le faa-Kerisiano i sisifo.11 O le talitonu o Luteru i le mana o tusitusiga paia na fesoasoani e faatupu ai le Toefaatulagaina. O isi tagata na toefaatulagaina e siitia ai aoaoga lautele ina ia mafai ai e tagata uma ona maua le avanoa e faitau ai tusitusiga paia mo i latou lava.
Sa popole nisi o taitai faalelotu o le faateleina o le faitauina o le Tusi Paia o le a taitai atu ai i faitioga, le teena o le pule a le Ekalesia, ma e oo lava i le vevesi o tagata. Sa latou tali atu e ala i le faafalepuipuiina, faatigaina, e oo lava i le fasiotia o le toatele o i latou na mauaina o faaliliuina le Tusi Paia i le gagana masani o le aso pe onaina ni faaliliuga o le gagana e masani ai o tusitusiga paia.
O William Tyndale, na fanau mai pe tusa o le 1494, na vaaia i le taimi o le galuega lototele a Matini Luteru i le faaliliuga faa-Siamani o le Tusi Paia.12 A o avea pea ma se alii talavou, na maua e Tyndale le manatu e faia se lomiga fou e sili atu faa-Peretania o le Tusi Paia e faavae i uluai gagana o le faa-Eperu ma le faa-Eleni.
E tusa o le 1523 sa ia sailia ai le fesoasoani ma le faamalosiauga mai le epikopo Katoliko i Lonetona e faia ai sea lomiga ae sa matuai teena malosi lava. Ona o le faasa faasaga i le faaliliuina o le Tusi Paia, na pasia e le vaega o Oxford i le 1408, na manaomia ai e Tyndale se faatagaga aloaia ina ia faaauau e aunoa ma se faalavelave.
I le tuuto atu ai i le galuega o le faaliliuina o le Tusi Paia i le gagana Peretania, na amata faalilolilo ai e Tyndale lana galuega ma faamaeaina ai le faaliliuina o le Feagaiga Fou i le 1525. Na lolomi i Kolone, Siamani, ma na auina faanana le Faaliliuga a Tyndale i Egelani, lea na faatau atu ai i le amataga o le 1526.
Mulimuli ane, o Tyndale, e pei o le tele o isi alii ma tamaitai o e sa fasiotia mo le mananao ia maua e tagata lautele ia tusitusiga paia i a latou lava gagana, sa titina ai o ia a o noatia i se laau i le amataga o Oketopa 1536.13 E ui i lea, sa ola pea lana faaliliuga faa-Peretania ma o ana upu ma fuaitau ma vaega uma o lana faaliliuga sa faaaofia ai i le King James Version.14
O le King James Version, na lolomiina i le 1611, sa faaaogaina aloaia e le Ekalesia a Egelani ma sa uunaia ai mulimuli ane le Toefuataiga o le talalelei a Iesu Keriso i ni auala taua se tele.15 O le Tusi Paia lea na sili ona lautele lona faitauina i le taimi o le fanau mai o Iosefa Samita i le 1805. E oo atu i le taimi lea o le toatele o aiga, e aofia ai le aiga o Iosefa ma Lusi Maka Samita, sa i ai se Tusi Paia ma sa faitau mai ai i se tulaga faifai pea. O le mea moni, e toatele tagata na aoao e faitau e ala i le faalogo o faitau i le fale ma le suesueina e i latou lava.
O Faaleleiga i Tulaga Faaupufai ma Fesootaiga
O le faaleleia o lomiga, faaliliuga, ma le faitau ma tusitusi na saunia le ala mo faaleleiga faaupufai ma faatekinolosi lea na salalau atu i Europa ma Amerika i le va o seneturi e 17 ma le 19. O le suia o le siosiomaga faaupufai i Europa ma Amerika na tuuina atu ai i tagata le saolotoga sili atu e filifili ai o latou lava ala faalelotu. O le saolotoga o tapuaiga o se tasi lea o le tele o taunuuga o faaleleiga faaupufai na tutupu i lena vaitaimi.
Na amata foi e le Alii ona “sasaa atu [Lona] agaga i luga o tagata uma” (tagai i le Ioelu 2:28; Iosefa Samita—Talafaasolopito 1:41), e aofia ai ma i latou o e na saunia e moemiti i ala o femalagaaiga fou ma fesootaiga faatekinolosi ia o le a tuleia ai i luma Lana Toefuataiga i ni auala maoae.
A o faatuina ae e le Alii Lana Perofeta, sa Ia musuia alii ma tamaitai ia fatufatuai ni tekinolosi, e pei o alavai, uaealesi, nofoaafi, ma afi e alu i le ausa, ina ia mafai ai ona oo atu le talalelei i le lalolagi uma.
I le tele o isi auala, na saunia ai e le Alii le lalolagi mo le Toefuataiga o Lana talalelei ina ia faamanuiaina ai tagata taitoatasi, aiga, nuu, malo, ma le lalolagi.
Taialaina o le Aiga o Samita
A o tatou mafaufau i le ala na saunia ai e le Alii le lalolagi mo le Toefuataiga, e tatau ona tatou manatua pea o le tele o mea sa Ia ausiaina e ala lea i olaga o tagata taitoatasi—o alii ma tamaitai faatauvaa o e, i nisi tulaga, na ausia ni mea ofoofogia.
O le toatele o tagata ma aiga i atunuu i le salafa o le lalolagi sa saunia e talia le savali o le Toefuataiga. Na aofia ai matua o le Perofeta, o Iosefa ma Lusi Maka Samita, o ni tagata toalua e matua faaleagaga lava, o e sa ola ae i se aganuu sa faapea ona aoaoina ai i laua e alolofa ia Iesu Keriso ma suesue i le Tusi Paia.
Mo le tele o tausaga, na aafia ai Iosefa ma Lusi i mea tautupe, soifua maloloina, ma isi mea faalavefau i Niu Egelani, i le tulimanu i matu-i-sasae o le Iunaite Setete. E oo ane i le 1816, ina ua faaleagaina a latou laau toto ona o le suiga i le siosiomaga i le lalolagi atoa na mafua mai i le maugamu o Mauga Tambora i Initonesia, sa itiiti se filifiliga a Iosefa ma Lucy ae faia se faaiuga lototoa e tuua le saogalemu o le aiga potopoto, uo, ma le alalafaga.
E pei ona taua i le Voluma 1 o le talafaasolopito fou o le Ekalesia: “O Iosefa le Matua na alofa faapelepele i lana ava ma le fanau, ae na te lei mafai ona tuuina atu ia i latou le tele o mea masani o le olaga. O tulaga le lelei ma tupe na faafaigaluega na le manuia na oo ai le mativa i le aiga ma leai ai se fale mautu. Atonu o le a ese mai Niu Ioka.”16
I le tele o itu, o le toilalo o le aiga o Samita i Niu Egelani na uunaia ai i latou e agai atu i Niu Ioka i sisifo, lea na faateleina ai le vavao faalelotu ma musuia ai Iosefa Samita le Itiiti ia saili atu i le Alii i Lana sailiga mo se faamagaloga ma se taitaiga. O iina foi na natia ai papatusi auro, a o faatalitali ai o ia e sue, faaliliu, ma lolomi.
Ata o le aiga na pueina e Wendy Gibbs Keeler
Vaaia o le Aao o le Alii i o Tatou Olaga
E pei ona faia e le Alii i le toilalo o le aiga o Samita, e mafai foi ona Ia faamalosia i tatou, aoao i tatou i lesona fou, ma saunia i tatou e ala i toilalo ma faigata mo se lumanai e ese mai nai lo mea tatou te mafaufau i ai.
A o tatou mafaufau pe na faapefea ona faaalia le aao o le Alii i olaga o le aiga o Samita, e manaomia ona tatou iloa o loo faaali mai foi Lona aao i o tatou olaga taitasi. O le vaavaai mo le aao o le Alii i o tatou olaga e manaomia ai le lagona faaleagaga ma, i le tele o tulaga, taimi ma le vaaiga. O le mea e lelei ai, o faamanuiaga faapeteriaka, api talaaga patino, ma talaaga o le olaga faaletagata lava ia e mafai ona tuuina mai ai se vaaiga e iloa ai le faaali mai o le aao o le Alii i o tatou olaga.
I se faaaliga na tuuina mai i le 1831, na lapataia ai e le Alii le lalolagi, “Ma ua leai se mea e faatausuai ai le tagata i le Atua, pe ua leai ni isi e faamumu faasaga i ai lona toasa, tau lava o i latou o e latou te lē tautinoina lona aao i mea uma, ma lē usiusitai i ana poloaiga” (Mataupu Faavae ma Feagaiga 59:21).
O lo tatou naunautai e usiusitai i poloaiga a le Alii o Iesu Keriso, aemaise lava o poloaiga sili e lua ia alofa atu i le Atua ma o tatou tuaoi e pei o i tatou lava, o le a faateleina a o tatou vaavaai atu ma faailoa le aao o le Alii i o tatou olaga ma Lona aao i le sauniaina o le lalolagi mo le Toefuataiga o le Ekalesia a Iesu Keriso. O se “galuega ofoofogia ma le mea e ofo ai” (2 Nifae 25:17).
Ua saunia nei e le Alii le lalolagi mo Lona Afio Faalua Mai, e pei lava ona ia saunia le lalolagi mo le Toefuataiga mai o Lana talalelei e faavavau. E faapena foi, o Lona aao e vaaia e le gata i mea e tutupu i le suiga o le talafaasolopito ae i olaga foi o tagata taitoatasi.
Ina ua alu atu Iosefa Samita i le vao ua tatou taua nei e paia, sa ia sailia le faamagaloga ma le taitaiga i lona olaga.17 I se tasi itu, na ia tali atu ai i le valaaulia musuia a le Alii o loo tusia i le Evagelia a Mataio:
“Ia outou o mai ia te au, outou uma o e tigaina ma mafatia i avega, o au foi e malolo ai outou.
“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo, ona maua lea e outou o le malologa mo outou agaga.
“Aua e avegofie la’u amo, o la’u avega foi e mama ia” (Mataio 11:28–30).
Ou te molimau atu i le amataga lava, na saunia ai e le aao o le Alii le lalolagi mo le Toefuataiga o le “talalelei moni, mama, ma faigofie” a Iesu Keriso, o le “aoaoga faavae faaola lea a Keriso” o loo avanoa i fanau uma a le Atua.18 Ou te molimau atu foi o le aao o le Alii o loo i ai i o tatou olaga taitoatasi e valaaulia ai i tatou e mulimuli ia te Ia, auauna atu i isi, ma alolofa ia te Ia a o Ia saunia le lalolagi mo Lona Afio mamalu Faalua Mai.