O le Auala na Tatalaina ai e le Tusi a Mamona le Lagi Mo Au

Saunia e Jessica Patterson Turner

A o tatou suesueina le Tusi a Mamona i lenei tausaga, ou te fia faasoa atu e i ai sau molimau o le mana ma faatosinaga e mafai ona i ai i lou olaga.

E alala le tusitala i Iuta, ISA.

Sa i ai sau molimau i le Tusi a Mamona talu mai le taimi muamua na ou faitau ai a o ou laitiiti. Ae o le mea moni, o au “suesuega” o tusitusiga paia i masina na muamua atu i le konafesi aoao ia Oketopa 2018 sa lagona ua pei o le faapasi faasamasamanoa. O lea la, ina ua luiina e Peresitene Nelson ia tamaitai o le Ekalesia e faitau ia mae’a le Tusi a Mamona i le faaiuga o le tausaga, sa pei o le valaaulia lea na ou manaomia.

O lana valaaulia na oo mai faatasi ma ni folafolaga mamana foi. Na ia saunoa, “a o e suesue ma le agaga tatalo, ou te folafola atu o le a tatalaina le lagi mo oe” (“o le auai o tuafafine i le faapotopotoina o Isaraelu,” Liahona, Nov. 2018, 69).

A o ou faalogologo, sa ou lagona le fiafia e toe tautino atu i le tusi sa ou matua fiafia i ai, ma sa le mafai ona ou faatali mo le lagi e tatala mai mo au.

Ma sa latou faia. I le tele o itu. Ina ua maea le lui lea a le Tusi a Mamona, sa ou faaaluina le taimi e mafaufau loloto ai i le aafiaga na ou maua ma o loo ou i ai pea. Ou te maofa i mea na ou aoaoina, ou lagona, ma lea ua amata ona avea ai au e ala i le suesueina o ona itulau musuia.

O le Mea Na ou Aoaoina

A o ou faitauina le Tusi a Mamona i se saoasaoa vave atu nai lo le mea ua ou masani ai, o ona upu ua tino ma ola moni mai lava. Sa ou lagonaina se sootaga faapena ia i latou o e o a latou molimau ma aafiaga o loo fausia ai lenei tusi.

Mai le uso o Nifae o Sama, ua ou iloa ai o le amiotonu filemu e mamalu lava. Mai ia Alema na ou aoao ai ia aua lava nei toilalo lou faatuatua. Mai lona Alo, e leai se taimi ua tuai tele ai le faalatalata atu ia Keriso lagona ia aafiaga o le mana faamama o Lana Togiola e le iu (tagai Mosaea 27; Alema 36). Na musuia au e le Tama o le Tupu o Lamonae ina ia faia ni osigataulaga e tele atu mo le Atua (tagai Alema 22:15, 18). Na aoaoina au e Paorana ina ia toamalie ma ia faa-Keriso pe a ou lagona le ave seseina o se malamalamaaga (tagai Alema 61). Mai le uso o Iareto sa ou aoaoina ai e ui e taua le faatinoina o la tatou vaega, ae ua le lava lea; tatou te manaomia le fesoasoani a Keriso ma le mana e mafai ai (tagai i le Eteru 2 – 3). Mai ia Moronae na ou aoaoina ai e ui lava atonu tatou te lagonaina le tuuatoatasi, ae e le o tuua moni tatou faapena (tagai Mamona 8:3, 5).

Sa ou aoao e fesili soo atu i le Alii, ia tatalo malosi ma le faatuatua. Sa ou aoaoina le taua o le tausia o faamaumauga ma tuuina atu le molimau ma le ala sao e salamo ai. Sa ou aoaoina o loo manatu mai le Atua, e alofa mutimutivale Keriso, ma e tasi i latou i le faamoemoe.

Sa ou aoaoina o le “[taumamafa fiafia i afioga a Keriso” (2 Nifae 32:3) e aumaia ai le taitaiga ou te manaomia mo lou olaga.

Sa ou toe aoao ai e faapea e le’o o Iosefa Samita — ma e na te le mafai — ona tusi lenei tusi.

Auala Na Ou Lagonaina

Pe o se mea na tupu faafuasei lo’u faitauina o le salamo a Nifae (2 Nifae 4) i se aso na ou lagona ai le taofiofia o a’u i lalo e lo’u le atoatoa ma vaivaiga? E moni a e leai. O se faalavelave fiafia lea na ou fetaiai ai ma le folafolaga a le tupu o Limae, “e, ua matua ofoofogia lava galuega a le Alii, ma ua matua loa lava lona tautiga mo ona tagata” (Mosaea 8:20) ina ua ou lagona le tuuatoatasi i ou tofotofoga? Leai! Faatasi ai ma le Atua, e leai se faafuaveta, ua na’o fuafuaga o le alofa mutimutivale, ma o a’u lava na o’o mai i ai le tele a o o’u faitau. Sa ou lagonaina moni le alofa o lou Tama Faalelagi mo a’u ma se lagona le mafaatusalia o le filemu a o ou faatofuina au lava i le Tusi a Mamona.

O le mana faamalolo lea o le Faaola lea na sili ona ou lagonaina i lou faitauina atoa o le Tusi a Mamona. O lea fuaiupu e sosoo ma lea fuaiupu o loo molimau mai i Lona alofa tunoa, alofa mutimutivale, agaalofa, ma le alofa e le iu. A o ou faitau e uiga ia Iesu Keriso, sa ou lagona le lofituina i le agaga faafetai mo Lana taulaga. O se tasi o vavega sili na ou oo i ai a o faitauina o le lagona o le faamagaloina atoatoa mo se faagasologa o filifiliga le lelei na faia i tausaga ua mavae. Sa ou lagonaina e pei lava o loo fetalai tuusao mai le Faaola ia te au a o ou faitau. Sa ou lagonaina i lou loto ia upu, Ua oo i le taimi e agai ai i luma. Na saunia moni lava e Keriso le faamalologa sa ou manaomia.

E ui ou te lei vaai i le Keriso toetu e pei ona sa o’o i ai sa Nifae (tagai i le 3 Nifae 11), Sa ou lagonaina Lona i ai i lou olaga a o ou faitau e uiga ia te ia i le Tusi a Mamona. Na te malamalama moni lava ia i tatou taitoatasi ma o tatou tofotofoga tulaga ese, ma ua ia te Ia le mana e laveai ai, faamafanafana, ma faamalolo ai i tatou.

O Ai Ua Avea Ai Au

A o ou faatofuina a’u lava i aso taitasi uma i le Tusi a Mamona, ua sili atu lou onosai, agaalofa, loto faafetai, ma le faamoemoe. Ua faaitiitia ona ou manatu faapito ma faaitiitia le popole i mea faalelalolagi.

Ona o le Tusi a Mamona ma le Agaga na te aumaia i lou olaga, o au o se tina, ava, afafine, ma se uo ua sili atu ona lelei. O au o se so’o ua siitia le tuuto atu a Iesu Keriso.

E mafai faapefea e se tusi e tasi ona maua ia tali uma ? E mafai faapefea e se tusi se tasi ona ausia le tele o mea?

Ua na o se tusi ua mamanuina e le Atua e i ai lena ituaiga o mana. Ma ou te iloa moni lava e a le Atua.

E pei lava na folafola mai e Peresitene Nelson, sa tatala moni lava e le lagi mo au, i le tele o auala, nai lo mea e mafai ona ou mafaufauina. O le a ou faaauau pea ona faitau ma suesue i le Tusi a Mamona. O le a faaauau pea ona ou sailia ona itulau ma maua ai le Keriso iina aua o lenei tusi e faatatau moni lava ia te Ia.