O Atatusi o le Faatuatua
Rachel Lighthall
Kalefonia, ISA
Savalivali solo i le lefulefu ma mea na faaleagaina sa masani ona nofo ai Rachel, ma ioe i lou iloaina ua leai se mea o totoe. Ae e ui lava foi i le afi na faaumatia ai Parataiso, i Kalefonia, o le a e matauina le faatuatua o Rachel a o ia talanoa mai e uiga i le auala na ia vaaia ai le aao o le Atua i lona olaga.
Richard M. Romney, pueata
Ua matou masani i le i ai o ni afi i lenei eria, o lea, ina ua ou vaaia le lagi ua matuai asu lava i lena taeao, sa ou le popole tele i ai. Sa fai si ou fou i le eria, ae o i latou sa nonofo i Parataiso mo se taimi umi lava — ae maise lava i latou o e sa nonofo i vanu — sa sosola ese muamua.
Ae peitai, o le taimi lea, ua vave ona aveina atu e matagi malolosi le afi lea na matuai manatu faatauvaa ai taitai i le umi e oo mai ai ia i matou. O le toatele o i matou sa lei iloaina lava le mea sa tupu seia oo ina mumu le taulaga i nofoaga uma lava. O le matou tulaga na suia mai “sina popole” i “faalavelave faafuasei! O ese! “i totonu o le itula e tasi.
O le sosolaese na vevesi — ma vave. O le toatele o tagata sa tatau ona ui i totonu o le afi ina ia o ese ai mai le taulaga. A o matou tietie ese atu ma lau fanau, sa i ai le asu i nofoaga uma. Sa salalau solo le lefulefu i le aai atoa ma na feosofi solo afi i nofoaga uma. O le toatele o tagata na o ese ae ua mumu o latou fale po o fale o o latou tuaoi ua mumu. Sa ou lei iloa pe o le a faatafunaina lo matou fale pe leai.
A o matou tietie atu, sa ma talanoa ma le Atua. Sa ou tatalo ina ia matou o atu ma le saogalemu ma ia faasaoina lo matou fale. Sa na o le lua tausaga na matou i ai i lo matou fale. I le avea ai o se aiga, sa matou galulue faatasi ai o le faaleleia. Sa fesoasoani lou toalua ma lau fanau ia te au e toe faaleleia fata ma le fola. Sa matou taua o la matou “tamai fale i le vao.” Sa ou fiafia i lou fale, ae sa ou taumafai ina ia lava lou malosi e gauai atu ai lou loto i le finagalo o le Atua.
I ni nai aso mulimuli ane, sa matou iloa ai ua leai lo matou fale. Na matou faia ia matagofie, ma o lea ua susunuina i lalo. Ae o le toe tepa i tua, o le taimi na matou nonofo ai i lo matou fale o se taimi matagofie. Ou te faafetai na tuuina mai e le Atua i lo matou aiga lena taimi i totonu o lena fale.
O se tasi o mea e sili ona matagofie na ou vaai ma faalogo i ai o se taunuuga o lenei afi o molimau a tagata e uiga i le mea ua ou taua o le “faatuatua tele.” Na vaai nei tagata i le auala na i ai le Atua i vaega auiliili o o latou olaga. O le “faatuatua tele” e pei o lenei, e le o se mea e mafai ona e vave maua. E alu se taimi umi e fausia ai.
E faamanatu mai ai ia te au le faataoto i taupou e toasefulu. Afai e le faatumulia lau lamepa, e te liliu atu i le Atua i le taimi a o lei tupu le faalavelave. A tutupu mala e pei o lenei afi, e le o le taimi lena e amata ai ona faatumuina lau lamepa. E pei ua e oso i le taavale ma fai atu i lau fanau e fai o latou fusipau. Vaai faalemafaufau ia i latou o faapea mai, “Ou te le manaomia se fusipau. Pe a ou faalogo atu ua outou feei, o le a ou faamau loa!” I se faalavelave, o le a leai lava se taimi e fai ai.
Ina ua mae‘a le afi, ua ou matauina o tagata iinei ma “suauu i a latou lamepa” e lei tele so latou mafatia. Sa latou faanoanoa pea, o loo i ai pea o latou luitau, ae sa latou talitonu pea e popole le Atua ia i latou ma o loo i ai i vaega uma o o latou olaga. Ua latou iloa e lava le malosi o le Atua e mafai ai ona Ia faasaoina o latou fale mai le afi, ae latou te le feita foi pe a le fetaui ni mea ma o latou manao. Latou te talia Lona finagalo. O le mea lena ou te taua o le “faatuatua tele.”
O tagata uma o e talitonu i le Atua ua vaaia Lona aao i lenei afi. Atonu e le mafai ona e faamaonia atu i se isi o loo i ai se Atua ona o se vavega tele se tasi, ae ua aumai e le Atua ni vavega laiti e miliona iinei i Parataiso. Afai e te talitonu i le Atua, e mafai ona e vaaia Lona aao i soo se mea. E ui lava sa faigata, ae sa avea foi o se vavega. Ua fesoasoani le Atua ia i tatou ia aoao lelei i mea e tatau ona tatou aoaoina.
O le i ai o le “faatuatua tele” sa lei faasaoina ai se tasi mai le faanoanoa ona o mea ua latou le maua. O se tasi o vaega sili ona faigata o lenei aafiaga atoa o le vaai atu lea i le faavauvau o i latou ou te alofa i ai. E ono tele atu le faanoanoa na ou faia ma i latou nai lo au lava ia. Ioe, o se mea faigata i lou aiga, ma na tele ni mea na matou le toe maua. Ae sa tele foi ni mea sa matou maua ai.
Sa tele mea na faia e tagata o le Siteki o Chico i Kalefonia e auauna atu ai ia i latou na aafia i le afi. O tagata uma lava na o mai i le nofoaga autu o le siteki i le aso na sosola ai, na maua fale e nonofo ai i totonu o ni itula i isi tagata o le siteki. Sa latou aumaia i matou i totonu o o latou fale ma fesoasoani ia matou maua mea sa matou manaomia. Sa ou maofa foi i foai o ituaiga eseese sa matou mauaina mai le au paia i le lalolagi atoa. Sa faamanuiaina ma lagolagoina i matou, ma e mafai ona matou lagonaina lo latou alofa. E matua maoae naua le avea ma se Au Paia o Aso e Gata Ai. O le a ou alaga atu lena mea ma le leo tele!
Ina ua tupu le afi, sa ou tatalo soo ona sa ou manaomia ona ou faanoanoa ma sa manaomia ona ou aoaoina lau fanau i le ala e faanoanoa ai. Sa i ai i le Atua ni mea matagofie e aoaoina ai au. Sa ou aoaoina le taua o le “faanoanoa mama.” O le uiga o lenei mea ia te au o lou le alu i nofoaga pogisa ma lou faanoanoa po o lou alu i se nofoaga o le fefe. E te le faatagaina ou mafaufauga e o i se nofoaga o le ita po o le maasiasi. E te faanoanoa i le ala o le a faanoanoa ai le Atua. I lenei auala, o le faanoanoa e matagofie ma faamaloloina. E lagonaina ai ua pei o le alofa.
I lenei tulaga, o le lui e sili ona tele o le le mailoa. E tele atu fesili nai lo tali mo tagata uma. Tatou te le iloa pe o le a le umi e toe fausia ai Parataiso, pe o le a mafai ona toe fausia ona o le aofaiga o le faatafunaga ma le toilalo e maoae.
Na galue le Atua ia te au mo le tele o tausaga e saunia ai au mo lenei tulaga. Sa i ai isi a’u “mala” i lou olaga na fesoasoani ou te iloa ai e matagofie le taitaiina o lou olaga e le Atua.
E leai se mea e faigata na ou oo i ai e le o i ai se faamoemoega atoatoa ma matagofie ma se uiga. Sa ou matauina ina ua ou faatagaina le Atua e aoao au, sa ou aoao mai lava i taimi uma i ou luitau. E faatagaina i tatou e le Atua e ui i nei luitau ina ia mafai ai ona tatou faalagolago ia te Ia ma alolofa ia te Ia. Ou te iloa pe a oo ina faigata mea uma, e i ai lava o Ia iina.
Sa vaai Rachel i toe vaega o mea sa i ai lona fale. “O le taimi sa matou faaaluina i lo matou fale sa o se taimi matagofie tele,” o lana tala lea. “Ou te faafetai i le tuuina mai e le Atua i lo matou aiga o lena taimi i lena fale.”
O le fale o le Uarota Muamua a Parataiso, sa avea o se taimi o se nofoaga tapuai, o le suesueina o le talalelei, ma gaoioiga, ua avea nei ma se faaputuga o lapisi. Ae peitai, ua lagona e tagata o le Ekalesia le lagolago mai le Au Paia i le lalolagi atoa. “E mafai ona matou lagonaina lo latou alofa,” o le tala lea a Rachel. “E matua maoae le avea ai ma se Au Paia o Aso e Gata Ai. O le a ou alaga atu lena mea i le leotele ou te mafaia!”
“O tagata uma o e talitonu i le Atua ua vaaia Lona aao i lenei afi,” o le tala lea a Rachel. “E ui lava sa faigata, ae sa o se vavega foi. Ua fesoasoani le Atua ia i matou ia aoao tonu i mea e tatau ona matou aoaoina.”
Ua uu i luga e tagata o le aiga o Lighthall se aitema na toe maua mai i lefulefu o lo latou fale. O nei mea e avea o se faamanatu o faamanuiaga a le Atua. I le talanoa ai e uiga i le afi, fai mai Rachel, “Ioe, o se luitau, ma ua tele ni mea na matou le toe maua. Ae sa tele foi ni mea sa matou maua.”