Pe o le a Ia Malamalama?
Ata na tusia e Allen Garns
I le 2005, na ou vave fanauina ai se masaga tolu: o Milena, Mateo, ma Nelson. Sa fanau mai Milena e malosi, ae sa mafatia au tama tama laiti e toalua i ni faafitauli. Na maliu Mateo i na faafitauli ina ua mavae le tolu masina talu ona fanau mai o ia.
O se masina mulimuli ane talu ona maliu Mateo, na iloa ai o Nelson na maua i se supa o le faiai ma le tutuli. Sa lofituina i ma’ua. Sa fai mai fomai o le a le mafai ona ia savali. I lena taimi, sa matou faafetai mo lo matou malamalama i le talalelei a Iesu Keriso. Na fesoasoani matou te malamalama ai i le mafuaaga matou te oo ai i faigata i lenei olaga.
E ala i le faatuatua ma le galue malosi, na aoao ai Nelson e savali ma fesootai atu i le gagana e fai i faailoga. Ua sili atu mea ua ia faia nai lo le mea na muai tau mai e ana fomai. Sa ola ae o ia ma le fiafia i lo matou aiga ma i le talalelei.
E ui lava i ona tapulaa, ae sa tele ni a matou sini mo Nelson: ia malamalama o ia i le uiga o le papatisoga a o lei papatisoina o ia, na te mauaina le Perisitua Arona i le 12 o ona tausaga, ma e alu o ia i le malumalu e faia papatisoga mo e ua maliliu.
I le 2017, na atoa ai le 12 tausaga o Nelson. Sa matou fesoasoani ia te ia e saunia e faia papatisoga mo e ua maliliu. O se luitau ia te ia le malamalama o i latou o e ua maliliu e aunoa ma le papatisoga e manaomia la tatou fesoasoani. E lei leva ona mavae le aso fanau o Nelson, ae latou o atu loa ma Milena ma ona tei matutua o Franco ma Brenda, ma isi talavou mai le matou uarota i le Malumalu o Cordoba Atenitina. Sa faafeiloai i latou e le peresitene o le malumalu ma talanoa atu ia i latou e uiga i le taua o le sui papatisoga. Sa ma nonofo ma Nelson ma fai atu le gagana faailoga mo ia. E lei umi, ae oo i lona taimi. Ina ua laa atu o ia i le faatanoa o le vai papatisoga, sa matou tuufesili, pe o le a malamalama moni lava o ia?
A o ulu atu o ia i le vai, na faasolo ina ootia lagona o Nelson. I lena taimi, sa faaali mai ai e le Agaga Paia ia i matou e faapea, sa ia malamalama moni lava o loo ia faia se mea mo ona tuaa ua maliliu e le mafai ona latou faia mo i latou lava. Na matou iloa na ia malamalama o tagata o le aiga i le isi itu o le veli sa fiafia ua ia fesoasoani ia i latou. Sa faaali mai foi e le Agaga ia i matou sa i ai Mateo iina e faatasi ma lona uso ma lona tuafafine. Ina ua sau Nelson mai le vai, sa fiafia tele o ia.
Talu mai lena taimi, na papatisoina ia Nelson ma faamauina mo le toatele o tagata o le aiga, e aofia ai lou tama, lea na maliu i le 2016. Matou te fiafia i le malumalu. O le auauna atu iina ua avea ai ma se tu masani a lo matou aiga. O taimi uma lava matou te o ai, matou te manatua lena aso faapitoa.