Batbayar ma le Tusi e i ai Ata
O se aso matagi i Monokolia. Sa savali atu Batbayar e iva tausaga le matua mai le fale faatali pasi ina ua tuua le aoga. Sa ia fusi mau lona ofu tele i le matagi. O le mea na laki ai, e lei mamao le fale o ona matua matutua, lea sa ia nofo ai.
“Talofa!” Na fai mai ai Batbayar a o sau i totonu.
“Sau i le fale,” o le tala lea a Tinamatua. “Sa ou faia sina khuushuur mo se meaai mama.”
“Faafetai lava!” Sa aapa atu Batbayar i se tasi o pai povi mafanafana, ma feu.
“Faatali! Aua le aia sei taunuu mai faifeautalai, “o le tala lea a tamamatua. “Ua toeitiiti taunuu mai.”
Sa fiafia Batbayar pe a o mai faifeautalai mai le lotu a Tinamatua ma tamamatua e asiasi. E tele mea na ia aoaoina mai ia i laua. Peitai, sa na o le tasi lava le faafitauli.
“Mata o le a la fesili mai ia te au e toe faitau mai le Tusi a Mamona?” O le fesili lea a Batbayar. “O le faitau e faigata mo au.”
“O le mafuaaga lena ua la aumaia ai se isi tusi i le aso,” o le tala lea a Tinamatua.
“O le a le tusi?” Na fai mai ai Batbayar.
“O le a e vaai i ai” o le tala lea a tamamatua.
Na vave ona oo mai faifeautalai. Sa latou aai faatasi i pai povi manaia a Tinamatua. Ona fai mai lea o Batbayar, “Sa fai mai Tinamatua ua lua aumaia mo au se tusi.”
“Ou te manatu o le a e fiafia i le tusi lea,” o le tala lea a Sister Heitz. “E tele lava ata o loo i ai.”
Na tilotilo Batbayar i le faavaa. Tala o le Tusi a Mamona, na fai mai ai. O se ata i le faavaa na faaalia ai ni tagata o fausia se vaa.
“Ou te manatua lena tala,” o le tala lea a Batbayar. “E le iloa e le tamaloa le auala e fau ai se vaa. O lea na ia tatalo ai. Ma na fesoasoani le Atua ia te ia.”
“E sa’o lena,” na fai atu ai Sister Enkhtuya. “E te taumafai e faitau le tusi lenei? Ona mafai lea ona e tatalo ia iloa pe o mea o loo aoao mai ai e moni.”
“O le a ou faia,” na folafola atu ai Batbayar.
O le po lena sa ia faitau ai mai le tusi na i ai ni ata. Sa ia faitauina le tala e uiga i le vaa. Ona ia tatalo lea. Sa moe o ia ao mafaufau e uiga i le tagata na fauina le vaa ma le ala na fesoasoani ai le Atua ia te ia.
Mai lava i lena taimi, sa faitau ai e Batbayar i po taitasi se tala. Ona ia tatalo lea. Ma o po taitasi, e moe ai ao mafaufau i mea na ia faitauina.
Ina ua toe o mai tamaitai faifeautalai, sa la aoao atili ia Batbayar e uiga ia Iesu Keriso. Sa aoao Batbayar e uiga i perofeta. Sa aoao o ia i tulafono a le Atua. Sa alu pea lava o ia i le lotu faatasi ma Tinamatua ma Tamamatua. Ma sa ia faitau pea ma tatalo.
I se tasi aso na i ai se mea taua a Batbayar e tau atu i ona matua matutua. “A ou faitau i tala o i totonu o le tusi e i ai ata, e fiafia lou loto,” o lana tala lea. “Pe a ou tatalo, ou te lagona e moni. Ou te manatu e tatau ona ou papatiso.”
I le aso, o Batbayar o se tagata o le Ekalesia. Ua sili atu lona lelei ma sili atu ona lelei lana faitau. Ma na te faitauina pea lava le Tusi a Mamona i po uma! ●