Faatino i le Faatuatua
O la tatou autu i lenei tausaga o loo taulai atu i upu “alu ma fai,” o se tautinoga lototoa na tuuina mai e le perofeta faamaoni o le Tusi a Mamona o Nifae i le 1 Nifae 3:7. Ae atonu o le vaega sili ona faamafanafana o lenei fuaiupu e oo mai ina ua aoao mai Nifae e faapea o le a “saunia [e le Alii i taimi uma] le ala” e faataunuu ai Lana galuega.
O le talitonuga faapea o le a saunia e le Atua le ala i ou luma e sau mai se nofoaga o le faatuatua loloto. Na iloa e Nifae afai e fai atu le Atua ia te ia e fai se mea, o le a fesoasoani foi le Atua ia te ia e faataunuu le galuega. Ma ua tatou iloa ona o le faatuatua ma le talitonu o Nifae i le Alii, sa mafai ai ona ia toe aumaia ma le saogalemu ia papatusi apamemea.
E pei lava o Nifae, e mafai ona tatou maua le faatuatua e “alu ma fai.” Atonu e le o taimi uma e te malamalama ai i le “aisea” o loo i tua atu o faatonuga a taitai o le Ekalesia po o matua e oo lava i uunaiga mai le Agaga Paia. O le a le foliga mai i taimi uma e sao, pe atonu foi e pei e le mafai lava ona faataunuuina. Ae “e leai lava se mea e tasi e le mafaia e le Atua” (Luka 1:37). A o outou laa atu i luma ma le faatuatua, o le a outou iloa ai e i ai lava se mafuaaga ma se fuafuaga a le Atua.
O le a le fai atu lava le Atua ia te oe e fai se mea Na te iloa e le mafai ona e faia. O le a Ia le maileia lava oe ina ia toilalo. Ae atonu Na te talosagaina oe e fai se mea e manaomia ai le faatuatua malosi ma le faalagolago i le Agaga mo le taitaiga.
O le ki i le mauaina o le faatuatua e “alu ma fai” o le atiina ae lea o le lototele. Pe a ia te oe le talitonuga i le Alii, e te faatuatuaina o le a Ia faia oe ia tutusa ma galuega taitasi. Mafaufau i ai—na auina mai oe i le lalolagi i le taimi lenei aua ua e saunia ma mafai ona e faia le galuega a le Alii iinei ma le taimi nei. Ua filifilia oe e ola ai i lenei taimi ona ua faatuatuaina oe e le Alii.
O faamanuiaga e te maua i le faatinoina ma le faatuatua ma le mautinoa e ofoofogia. O le a oo ina e iloa lou faasinomaga ma lou faamoemoega i se vaaiga e sili atu ma se taulaiga sili atu; o le a faateleina ai lou faalagolago ia Iesu Keriso ma Lana Togiola; ma o le a e iloaina, faatasi ai ma le fesoasoani a le Alii, ua lava lena mo oe.