Uunaia o le Tupulaga Faia’e
E alala le tusitala i Iuta, ISA.
O auala nei e fa e fesoasoani i lau fanau e faatulaga ma ausia ni sini anoa ia tuputupu ae faapei ona faia e le Faaola.
Ata na tusia e David Green
I le avea ai ma matua ma taitai, tatou te mananao e fesoasoani i tamaiti ma le autalavou ia avea ma ni soo o Iesu Keriso i le olaga atoa o e ua musuia mai le loto e auauna atu i le Alii ma faataunuu a latou misiona patino.
O le Tamaiti ma le Autalavou o se seti faatauvaa ae mamana o punaoa e fesoasoani i tamaiti ma le autalavou ia tuputupu ae faaleagaga, faaleagafesootai, faaletino, ma faaleatamai, e pei ona faia e le Faaola (tagai i le Luka 2:52). E mafai ona tupu lenei mea a o latou aoao ma ola i le talalelei a Iesu Keriso, auai i auaunaga anoa ma gaoioiga fiafia, ma faatulaga ma ausia a latou lava sini. Peitai, e pei o matua i le tala o loo i lalo, atonu ua uma ona tatou lagonaina le mamafatu o avega e aunoa ma le faaopoopoina atu o sini a se isi tagata i la tatou lisi. Pe atonu tatou te popole faapea o le a le tuputupu ae a tatou fanau sei vagana ua tuleiina.
Talanoaga mo le Faia o sini, Faataitaiga 1:
O Alana, e 15 tausaga, na nonofo faatasi ma lona tina, o Rachel, e vaavaai i se lisi na la faia o ni sini faamoemoeina e mafai e Alana ona galue ai. Sa savali ane le Tama o Alana, o Jeff. “O le fea o nei mea e tatau ona ou faia, Tama?” O le fesili lea a Alana.
Sa tilotilo atu Jeff i lana uati, ma faanonou laitiiti, ma tilotilo atu i le lisi. “Ia, e faigofie lea. Ae a le ‘Tauloto se viiga’? E mafai ona e vave makaina lena. O a nisi mea e faigofie ona faia?”
Sa oso ane Rachel, i le manatuaina le le manao o Alana e taumafai mo le au tamomoe a le aoga. “O le mea moni, atonu e manaomia lou faataitaia o se mea faigata! E faapefea se mea e i ai se faamalositino?” na ia fautua atu ai.
“A’e,” le memumemu a Alana, ma aapa atu i lana telefoni. “Ou te manatu ua uma.”
E Mafai Faapefea ona Fesoasoani Matua ma Taitai?
E mafai e matua ma taitai ona faia mea e tele e fesoasoani ai i tamaiti ma le autalavou ina ia uunaia mai i le loto e faaaoga tulaga faatauaina lelei, fai filifiliga lelei, ma olioli i lo latou alualu i luma ma mea ua latou ausia.
Mafaufau i se taimi sa e matua naunau ai lava e galue agai i se sini. O le a le mea na uunaia ai oe? O taimi e te vaaia ai se avanoa po o se tomai ua e matuai manao lava i ai po o se faafitauli e te manaomia ona foia. O le faataitaiga ma le lagolago a isi na musuia ai oe e taumafai.
E faapena foi, o le a sili atu ona uunaia tamaiti ma le autalavou mai le loto pe a latou (1) filifili ma le agaga tatalo mea latou te mananao ai (ae le na o mea e mananao i ai isi mo i latou), (2) fatu se fuafuaga mo le mauaina, (3) e le soona uunaia e ni taui po o ni faasalaga, ma (4) lagona o loo i o latou autafa matua ma taitai.
1. Fesoasoani i le autalavou e fuafua mea e sili ona latou mananao i ai
E mananao uma lava tagata i se mea: ina ia fai le au, toe moe, lagona le le tuuatoatasi, ia latalata atili i le Atua. E masani ona fesili le Alii ma Ana avefeau i tagata, “O le a le mea ua e manao i ai?” (tagai Mareko 11:24; 1 Nifae 11:1–2; Alema 18:15; 3 Nifae 27:1–2; Eteru 2:23–25). Ae o le iloaina o le mea e sili ona tatou mananao ai, e le na o mea tatou te mananao ai i le taimi nei, e aafia ai i tatou lava ma le toe iloiloga o i tatou lava.
A o e mafaufau i se tamaitiiti po o se talavou e te manao e fesoasoani i ai, fesili ifo ia te oe lava:
-
E faapefea ona ou faailoa atu ia i latou ia aafiaga fou, tulaga faatauaina, ma manatu i se anotusi o sootaga lelei ma malie?
-
Pe ou te tuu atu ia latou oo i taunuuga o filifiliga le lelei ina ia latou mananao ai e avea ma ni tagata e sili atu?
-
O le a se taimi e mafai ona ou fesili atu ai ia i latou e uiga i mea latou te talitonu i ai ma faatauaina? (Tagai i le lisi o loo avatu ai, “Fesili Aoga e Iloa Ai.”)
-
E mafai faapefea ona ou faailoa atu o latou malosiaga? (Taumafai: “Ou te vaai atu ua e lelei lava i le _____________. E mafai faapefea ona e faaaogaina lena mea e auauna ai i le Alii?”)
2. Fesoasoani i le autalavou e fatu se fuafuaga
O le taimi lava latou te faamautu ai se sini, e masani lava ona lelei le autalavou i le faatulagaina o se fuafuaga. Atonu e manaomia e tamaiti laiti ni manatu faaopoopo. Faaopoopo i ai au fautuaga pe a le mautonu i latou. Ae ia fiafia i ai, aua le faalii, pe afai latou te fiafia atu i o latou manatu nai lo ou manatu!
Ina ia fesoasoani i isi e fai se fuafuaga, e mafai ona e fesili:
-
O le a lau sini? (O sini le mautinoa e pei o le “Ia sili atu” e faigata ona faauigaina sei vagana ua aofia ai ni faatinoga faapitoa e pei o le “Faamalo atu i se tagata i aso uma” po o le “Faatoese atu pe a ou ita.”)
-
Aisea e taua ai ia te oe lea sini? (O le a faapefea ona fesoasoani ia i latou e ola ai i o latou tulaga faatauaina pe avea atili ai e pei o le Faaola?)
-
Pe o se taimi lelei ea lenei e galue ai i lenei sini? (Aisea pe aisea e leai ai?)
-
O le a se laasaga laitiiti, ma faigofie e mafai ona e faia e amata ai? (Faamanatu ia i latou o lena faatinoga e fatuina ai le uunaiga. Fesoasoani ia i latou e amata, pe toe amata foi, i se mea itiiti ma faatauvaa.)
-
E mafai faapefea ona e faatulagaina ni mea e lagolago ai lau fuafuaga? (Mafaufau e fatu ni faamanatu, ni upu o le faamalosiauga, faia o se siata po o se taimi e siaki ai le alualu i luma, aveeseina o faaosoosoga, mauaina o meafaigaluega sao, po o le talosaga mo se fesoasoani.)
-
O a ni faafitauli atonu e oo mai i lou auala? E faapefea ona e taulimaina na mea? (Fesoasoani ia i latou ia manatua la latou fuafuaga, ia iloa mea o loo sese, faataitai atili se vaega faigata, faataitai se fuafuaga fou, pe fetuunai le sini.)
Ina ia fesoasoani i isi e ala i mea faalavefau, e mafai ona e faasoa atu ni aafiaga mai lou olaga po o le aiga e uiga i tagata o feagai ma tofotofoga ma le le toe maluelue. Taumafai foi e fesili atu:
-
O le a se mea na e faataitaia? O le a se isi mea e mafai ona e taumafai ai?
-
O ai e mafai ona fesoasoani? E mafai faapefea ona ou fesoasoani?
-
O a ni manatu e oo mai i lou mafaufau a o e tatalo e uiga i lenei mea?
3. Ia faaeteete i taui po o faasalaga
E mafai ona fesoasoani ni taui laiti i tagata e faataitai se mea fou, faia se galuega faigata e sili atu le malie, po o le faamanatuina o se faamanuiaina. Peitai, pe a ova ona fai, o taui e mafai ona faavaivaia ai le uunaiga moni. O tagata ua fiafia i se galuega e tele lava ina latou le faia, e le sili atu, pe afai e totogi mo le faia, ma faaiuina ai e le aoga ona faia mo na o le taui lava. Ma a o manaomia e fanau ona oo i taunuuga o filifiliga le lelei, ua latou aoao ai e matata’u ma aloese mai tagata o e faasalaina i latou nai lo le aoao e teu loto tulaga faatauaina lelei.
O le mea moni, e faamoemoe tagata o le a totogi atu galuega, lea e mafai ai foi ona tuuina atu i ponesi po o le aloaiaina o ni manatu faaalia aoga. Ae a oo mai i le ola ai i le talalelei ma le ausiaina o sini patino, o taui i totonu e sili ona uunaia i le taimi lava lena. Taui i totonu e aofia ai le:
-
Lagonaina o le Agaga.
-
Lagonaina o le fesootai ma matua, taitai, ma uo.
-
Ola i o latou tulaga faatauaina.
-
Aoaoina, tofotofoina o mea fou, ma le foiaina o faafitauli.
-
Mauaina o le fiafia.
-
Faia se eseesega mo le lelei.
Fesoasoani i tagata talavou ia iloa ma faataua nei taui i totonu. Ma e i ai taimi e tuuina mai ai se taui e fesootai e faailoga ai se galuega ua lelei ona faia!
4. Fesoasoani i le autalavou ia lagona lou alofa
O mafutaga alofa o se tasi lea o auala e sili ona taua e uunaia ai tulaga faatauaina, sini, ma le uunaiga. O faapefea ona fesootai atu tagata ia te oe faapea e alolofa moni ma faapelepele ia te oe? E faapefea ona e filifili po o ai e saogalemu e faamaoni i ai i au mea sese po o tauiviga? Afai e te lei lagonaina moni le alofagia i le aiga, o le a sou manatu i le mea sa e manaomia e te lei mauaina?
O au tali e mafai ona fesoasoani ia te oe e iloa ai pe faapefea ona fesootai atu i tagata talavou latou te faapelepele i ai ma saogalemu ai.
Faatasi ai ma se faatinoga ma le fesoasoani mai le lagi, e mafai ai ona tatou fesoasoani e uunaia ma faatosinaina le tupulaga faiae.
Talanoaga mo le Faia o sini, Faataitaiga 2:
O Alana, e 15 tausaga, na nonofo faatasi ma lona tina, o Rachel, ma matamata i se lisi o sini e mafai ona galue ai Alana ae savali ane ai le Tama o Alana, o Jeff. “O le fea o nei mea e tatau ona ou faia, Tama?” O le fesili lea a Alana.
Sa tilotilo atu Jeff i lana uati, ma faanonou laitiiti, ma tilotilo atu i le lisi. “Ia, e faigofie lea. Ae a le ‘Tauloto se viiga’? E mafai ona e vave makaina lena mea. O a nisi mea e faigofie ona faia?”
Sa tu Jeff. E i ai le mea e le foliga sao, o lea sa ia faaaluina ai le taimi e mafaufau ai po o le a.
Ua ou tuai, o ona mafaufauga ia. Na o lou fia manao lava ia uma lenei mea. Ou te lē lelei tele i lenei mea o le faamatua. Aaaaaa. Sa ia tilotilo atu i lona afafine ona ia iloa ai lea ua ia mauaina foi nisi lagona. Faamoemoe. Fiafia. E le na o le makaina o mea ua uma. Sa faatatau i lona tuputupu ae. Ma o se avanoa lenei e fesootai ai ma ia. Sa i ai se ataata na susulu mai i ona foliga.
“Tatou taofi ma mafaufau e uiga i lenei mea,” o lana tala lea. “Ae faapefea pe afai tatou te tusia taitoatasi i lalo ni mea na tatou lagonaina le uunaiga e galue ai talu ai nei?”
“Aaaa, Lelei,” o le tala lea a Alana. Sa maua e Rachel ni penitala ma se pepa, ma sa latou faaaluina ni minute e mafaufau ai ma tusitusi.
“Lelei,” o le tala lea a Rachel. “O le a nei la?”
Na manatua e Alana, “Ou te manatu e tatau ona tatou tatalo i ai ona filifili lea o se sini ma fai se fuafuaga. Ae Tama, e te manatu moni lava e popole le Tama Faalelagi po o le a le sini ou te filifilia?”
Na tomanatu Jeff. “E tele ou manatu lelei, atonu e finagalo le Tama Faalelagi e te filifilia se tasi e amata ai. Ae ou te matuai mautinoa lava le mea e tasi. E popole le Tama Faalelagi ia te oe.”
“Ou te iloa e te fia faaaogaina au meaalofa e fai ai se eseesega,” na faaopoopo mai ai Rachel, “ma afai o se tasi o nei mea e sili atu le taua, ou te mautinoa o le a fesoasoani le Tama Faalelagi ia te oe ia lagona lena mea.”
Sa ataata Alana, ona ia manatua ai lea, “na fesili atu Peresitene Nelson i le autalavou e fai se iloiloga maeaea o o tatou olaga. E mafai ona ou alu e aumai le mea na ou tusia?”
“Ioe!” o le tala lea a Jeff, ma ataata. Na ia toe tilotilo atu foi i lana uati. “Oi, ua tatau ona ou alu. Sue le mea na e tusia ona tatou talanoa ai lea i le taumafataga o le afiafi, Ua e iloa? E i ai ni nai au fesili e ono fesoasoani.”
“Lelei tele!” o le tala lea a Alana, ma ataata. “Ma, Tama? Tina? Faafetai lava.”