O Le Upu Mulimuli
Alu ma Fai ma le Faalagolago i le Atua
Saunia e Peresitene Henry B. Eyring
Fesoasoani Lua i le Au Peresitene Sili
Mai se lauga o le konafesi aoao ia Oketopa 2010.
O le taulealea o Nifae i le Tusi a Mamona ua faatupuina i totonu o i tatou se manao e atiina ae le faalagolago i le Alii e usiusitai i Ana poloaiga. Na feagai Nifae ma tulaga lamatia ma na ono oti ai ina ua ia faia nei upu o le faatuatuaina faapea e tatau ona tatou lagona le tumau i o tatou loto: “O le a ou alu ma fai mea ua poloaiina e le Alii, aua ua ou iloa e le tuuina mai e le Alii ni poloaiga i le fanauga a tagata, vagana o le a saunia e ia se ala mo i latou ina ia mafai ai ona latou faataunuuina o le mea ua ia poloaiina ai i latou” (1 Nifae 3:7).
E maua lena faalagolago mai le iloa o le Atua. E sili atu nai lo se isi lava tagata i le lalolagi, ua tatou, e ala i mea mamalu na tutupu i le Toefuataiga o le talalelei, lagona le agaga faafetai mo mea ua faaalia mai e le Atua e uiga ia te Ia lava ina ia mafai ona tatou faatuatuaina o Ia.
Mo au, na amata i le 1820 i se taulealea i se togavao o laau i se faatoaga i le setete o Niu Ioka. O le tamaitiiti, o Iosefa Samita le Itiiti, na savali atu i se nofoaga tuufua ma tootuli ai e tatalo ma se faatuatuaga atoatoa o le a tali mai le Atua. O taimi taitasi ou te faitauina ai lana tala, e faateleina ai lo’u faalagolago i le Atua ma Ana auauna:
“Na ou vaai i se malamalama faaniutu i luga ae tonu o lou ulu, e sili atu le pupula nai lo le la, ua alu ifo malie lava seia oo mai ia te au.
“… Ina ua oo ifo le malamalama i o’u luga, sa ou vaaia ni Tagata se toalua, o lo laua pupula ma le mamalu e le mafaamatalaina, o tutu a’e i ou luga i le ea. Sa fetalai mai le tasi o i laua ia te au, ma tau mai ia te au lou igoa, ma fetalai mai, ao tusi ane i le tasi—O Lou Atalii Pele lenei. Faalogo ia te Ia!” (Iosefa Samita—Talafaasolopito 1:16–17).
Na faailoa mai e le Tama ia i tatou o loo soifua o Ia, o Iesu Keriso o Lona Alo Pele, ma ona o le tele o Lona alofa ia te i tatou, ua auina mai ai lena Alo e faaolaina i tatou. Ma talu ai e i ai la’u molimau na Ia valaauina se tamaitiiti o se perofeta, ou te faatuatuaina ai Ana aposetolo ma perofeta i ona po nei, ma i latou ua latou valaauina e auauna atu i le Atua.
E te faaalia lou faalagolago i le Atua pe a e faalogo ma le faamoemoe e aoao ma salamo ona e alu lea ma faia soo se mea ua Ia poloai mai ai. Afai e lava lou faalagolago i le Atua e faalogologo ai i Ana savali o le faamalosiauga, faasa’oga, ma le taitaiga mai Ana auauna, o le a e mauaina i latou. Ma afai loa e te alu ma faia le mea ua Ia finagalo e te faia, o le a faatupulaia lou mana e faalagolago ai ia te Ia ma o le a oo mai le taimi, o le a lofituina oe i le loto faafetai ina ua e iloa ua Ia faalagolagoina oe.