Tuleiga Amata
E ao ona tatou saili atu, i ala uma tatou te mafaia, e faalogo ai ia Iesu Keriso, o lē e fetalai mai ia i tatou e ala i le mana ma le auaunaga a le Agaga Paia.
O’u uso e ma tuafafine pele, a o matou faafeiloai atu ia te outou i lenei konafesi aoao faasolopito ia Aperila 2020 o Le Ekalesia a Iesu Keriso o le Au Paia o Aso e Gata Ai, mo ni mafuaaga ua tou silafia lava, ua ou tu ai i i luma o se potu gaogao.
E aunoa ma so’u iloa, ina ua ou folafola atu ia te outou i le konafesi aoao ia Oketopa o lenei konafesi ia Aperila o le a “manatua pea” ma o le a “le galo lava,” o le lauga atu i se aofia o alala mai ii e itiiti ifo ma le 10 tagata o le a avea ai lenei konafesi ma konafesi e matua manatua pea ma lē galo lava mo a’u! Ae o le iloaina o loo outou auai mai e ala i fesootaiga faaeletonika, ma le fātuga matagofie a le aufaipese o le “It Is Well with My Soul,” ua aumai ai se mafanafana tele i lo’u agaga.
E pei ona outou silafia, o le auai i lenei konafesi aoao ua matuā faatapulaaina lava ona o se vaega o a tatou taumafaiga ina ia avea ma ni tagatanuu lelei i le lalolagi atoa ma ia faia mea uma tatou te mafaia e taofia ai le pipisi o le COVID-19. O lenei vairasi ua i ai sona aafiaga tele i le lalolagi atoa. Ua fesuia’i ai foi a tatou sauniga faale-Ekalesia, auaunaga faafaifeautalai, ma galuega faalemalumalu mo sina taimi.
E ui o tapu i aso nei e fesootai i se vairasi matautia, ae o tofotofoga patino o le olaga ua sili atu i lo lenei faamai pipisi. O ni tofotofoga o le lumanai e ono tupu mai se faalavelavae faafuasei, se mala faalenatura, po o se lototiga o le tagata ia sa le’i faamoemoeina.
E faapefea ona tatou onosaia ia tofotofoga? Ua ta’u mai e le Alii ia i tatou, “afai ua saunia outou o le a outou le matatau ai lava.”1 Ioe, e mafai ona tatou teuina a tatou lava faaputuga faaleoleo o meaai, vai, ma teugatupe. Ae e tutusa foi le taua tele i lo tatou manaomia ona faatumu o o tatou faleteuoloa faaleagaga faaletagata lava ia i le faatuatua, upumoni, ma le molimau.
O le tatou sailiga silisili lava i le olaga o le saunia lea e feiloai ma lo tatou Mataisau. Tatou te faia lenei mea e ala i le tauivi i aso taitasi ia avea atili e pei o lo tatou Faaola, o Iesu Keriso.2 Ma e tatou te faia lena mea pe a tatou salamo i aso taitasi ma maua Lana faamamāāga, faamalologa, ma le mana faamalosiau. Ona mafai lea ona tatou lagonaina le filemu ma le olioli tumau, e oo lava i taimi faigata. O le mafuaaga tonu lea ua augani mai ai le Alii ia i tatou ia tutu i nofoaga paia ma “aua le masii ese.”3
I lenei tausaga, ua tatou faamanatuina ai le 200 tausaga o se tasi o mea silisili ona taua na tupu i le talafaasolopito o le lalolagi—o le faaali mai o le Atua le Tama Faavavau ma Lona Alo Pele, o Iesu Keriso ia Iosefa Samita. I lena faaaliga e tasi, na tusi ane ai le aao o le Atua le Tama ia Iesu Keriso ma fetalai mai, “O Lo’u Atalii Pele lenei. Faalogo ia te Ia!”4
O lena apoapoaiga na tuuina atu ia Iosefa e mo i tatou uma taitoatasi. E ao ona tatou saili atu, i ala uma tatou te mafaia, e faalogo ai ia Iesu Keriso, o lē e fetalai mai ia i tatou e ala i le mana ma le auaunaga a le Agaga Paia.
O le faamoemoega o lenei konafesi ma konafesi aoao uma o le fesoasoani lea ia i tatou ia faalogo ia te Ia. Ua matou tatalo, ma valaaulia outou ia tatalo, ina ia faatasi mai le Agaga o le Alii ma i tatou i se faatelega na’ua e mafai ai ona e faalogo i savali ua i ai i le Faaola e faapitoa mo oe—savali o le a aumaia le filemu i lou agaga. O savali o le a faamaloloina lou loto nutimomoia. O savali o le a faamalamalamaina lou mafaufau. O savali o le a fesoasoani ia te oe ia iloa le mea e fai pe a e agai i luma i taimi o faigata ma tofotofoga.
Matou te tatalo mo lenei konafesi ina ia manatua pea ma lē galo lava ona o savali o le a outou faafofoga i ai, o faasilasilaga tulagaese o le a faia, ma aafiaga ia o le a valaauliaina outou ia auai ai.
Mo se faataitaiga, i le faaiuga o le sauniga o le taeao o le Aso Sa, o le a tatou taloina ai se faapotopotoga paia i le lalolagi atoa pe a ou taitaia outou i le Alalaga paia o le Osana. Matou te tatalo o le a avea ma se faatumutumuga faaleagaga mo oe a o faailoa atu i se lotogatasi i le lalolagi atoa lo tatou lotofaafetai sili i le Atua le Tama ma Lona Alo Pele e ala i le viia o i La’ua i lenei ala tulaga ese.
Mo lenei aafiaga paia, tatou te faaaogaina ai se solosolo mamā pa’epa’e. Ae afai e leai sau solosolo, ia tau lava ina talotalo mai lou lima. I le maea ai o le Alalaga o le Osana, o le a auai faatasi le potopotoga ma le aufaipese i le lagiina “O Le Agaga o le Atua.”5
O’u uso e ma tuafafine pele, o lenei konafesi o le a ofoofogia. O le a tulaga ese lenei tausaga pe a tatou taulai atu ma le loto i le Faaola ma Lana talalelei. O aafiaga sili ona taua ma tumau o lenei konafesi faasolopito pe a suia o tatou loto ma tatou amataina se sailiga o le olaga atoa e faalogo ia te Ia.
Susu maia i le konafesi aoao ia Aperila 2020! Ou te iloa o le Atua lo tatou Tama Faalelagi ma Lona Alo, o Iesu Keriso, o loo mafaufau mai ia i tatou. O le a faatasi i La’ua ma i tatou i taualumaga uma o nei aso mamalu e lua a o tatou saili ia latalata atili atu ia i La’ua ma faamamalu i La’ua. I le suafa paia o Iesu Keriso, amene.