Elder Kelly R. Johnson

Fitugafulu o le Pulega Aoao

E manatua lelei e Elder Kelly R. Johnson le aso na valaauina ai o ia o se epikopo i le 31 o ona tausaga. O le aso foi lava lena, sa ta’u atu ai e le fomai ua maua o ia i le pe o Foliga [Bell’s palsy]—o se gasegase e pepē ai pe vaivai ia uaua o le tasi itu o foliga.

O se taimi faigata, e le gata ona o le le lagolelei ma le maasiasi e afua ona o le tulaga ua i ai, ae faapea foi ona o ona mau tiutetauave fou. Ae ua avea lena taimi faigata o se faamanuiaga.

“Ma le le iloaina pe o le a le umi o le a i ai i lea tulaga, sa ou amatalia ai se alofa naunau mo tagata taitoatasi sa matou mafuta e oo i le iuga o lo’u ola,” na ia saunoa ai. “Sa ou matua aoaoina moni e faapea, e feagai tagata ma mea matuia ma faanoanoa e le mafai ona latou pulea, ia e aafia ai o latou tomai, lagona, ma le mautinoa.”

E i ai taimi, e le faigofie ai ona auauna i le Ekalesia a le Alii. Ae e faapei lava o soo o le Faaola na “tuua loa lava o latou upega” (Mataio 4:20) ina ia mulimuli ia te Ia, “po o le a lava le mea e poloaiina ai i tatou e fai, tatou te naunau foi e faia,” o le saunoaga lea a Elder Johnson.

Po o fea lava e valaau i ai o ia po o lona aiga e le Alii, latou te o ma loto ma mafaufau naunautai, ma vaavaai e saili mea e lelei tusa lava po o a o latou tulaga e i ai.

Sa soifua mai i Kelly Ray Johnson i Pleasant View, Iuta i le aso 16 Ianuari, 1963 ia Harold Raymond Johnson Jr. ma Helen Cragaun Johnson. Sa soifua ae o ia i Ogden, Iuta, ma sa faaipoipo ai ia Teressa Lynn Bartrum i le Malumalu o le Aai o Sate Leki i le aso 27 Mati, 1986. E toalima le la fanau.

Na faauu Elder Johnson mai le Weber i le 1987, ma se faailoga o le tagata malaga saienisi i le suetusi ma sa maua lona faailoga o le matuaofaiva i le pulega o mea tau pisinisi mai le Iunivesite o Polika Iaga i le 1989. Sa faigaluega o ia o se suetusi su’esu’e faaletulafono mo le KPMG International Cooperative ma talu ai nei sa faigaluega ai o se suetusi su’esu’e faaletulafono ma se paaga mo Norman, Townsend, ma Johnson.

O Elder Johnson, o lē sa avea o se Fitugafulu Eria i le taimi o lona valaauga, sa tautua o se peresitene o le Misiona a Taialani Bangkok, lea foi sa faamisiona talai ai, ma sa avea foi o se peresitene o le siteki, fesoasoani i se au peresitene o le siteki, fautua maualuga, epikopo, peresitene o le korama a toeaina, taitai misiona a le uarota, ma le faiaoga o le vasega sauniuni a faifeautalai i le siteki.