O Taimi e Manatua Pea i le Konafesi
E pei ona sa folafola mai e Peresitene Russell M. Nelson, o le konafesi aoao lenei o le a le mafaagaloina lava i le tele o itu.1 O ni nai taimi ia e manatua pea o le konafesi.
Faailoga Fou
Ua fofogaina mai e Peresitene Nelson se faailoga fou mo le Ekalesia (tagai itulau 73 ). O lenei faailoga ua aofia ai le igoa o le Ekalesia o loo si’oina i se faatafafa e le tutusa, ua avea o se maatulimanu. I luga a’e o lena o loo tu ai se faatusa o le Keriso i lalo o se lo’u, e faamanatu mai ai ia i tatou le Faaola ma Lona tuugamau avanoa.
Folafolaga o le Lua Seneturi
Na faitauina e Peresitene Nelson “O Le Toefuata’iga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi,” lea e valaaulia ai tagata i soo se mea e aoao o le talalelei a Iesu Keriso sa talanoa i ai i le Feagaiga Fou ua toe i ai nei i le lalolagi. O le faaliliuga aloaia e mafai ona maua i totonu o le faavaa i luma o le lomiga lenei i gagana e 12. O tagata o le ekalesia o loo faatalitali pea mo se faaliliuga aloaia e mafai ona maua uluai faaliliuga o le folafolaga i le saunoaga a Peresitene Nelson (tagai itulau 91).
Faapotopotoga Paia
O se “faapotopotoga paia” sa faia i le taeao o le Aso Sa o se vaega o le faamanatuga e le Ekalesia o le lua seneturi o le Uluai Faaaliga. I le taimi o lea sauniga paia, sa taitaia ai e Peresitene Nelson le Au Paia i le Alaga Osana, o se faaaliga tuufaatasi o le faaneetaga sa faaaoga i mea tutupu faapitoa e pei o faapaiaga o malumalu (tagai itulau 92).
Anapogi Lona Lua a le Lalolagi Atoa
Mo le taimi lona lua i aso e iva, sa valaaulia ai e Peresitene Nelson le lalolagi e anapopogi ma tatalo “ina ia mafai ona togafitia le faama’i oti o i ai nei, ia puipuia tausima’i, ia faamalosia le tamaoaiga, ma toe foi i le olaga masani” ( itulau 74 ). O lenei anapogi lona lua a le lalolagi atoa na faia i le Aso Maliu i le Aso Faraile, 10 Aperila, 2020.
Malumalu Fou
Na fofogaina mai e Peresitene Russell M. Nelson fuafuaga e fausiaina ni malumalu fou se valu i le salafa o le lalolagi (tagai itulau 115). Ua 167 malumalu o loo faaaoga i le taimi nei i le lalolagi atoa.
Failauga Talavou
O le sauniga i le afiafi o le Aso Toonai na mata’ina ai lauga mai talavou e toalua, o Laudy Ruth Kaouk ma Enzo Serge Petelo, o e na talanoa e uiga i le ala ua faamanuiaina ai talavou e le perisitua (tagai itulau 56 ma le 58). Ua silia ma le 20 tausaga talu ona aofia ai failauga talavou i se konafesi aoao.
Musika Mamana
O musika mo le konafesi sa muai pueina. Sa faaiuina e le Au Paia i le lalolagi atoa le konafesi e ala i le lagiina o le “Ia Viia Oe le Atua” faatasi ai ma aufaipese i Kana, Niu Sila, Aai o Mekisiko, Korea i Saute, Siamani, ma Pasila (tagai itulau 2).