2020
Maua’a i o Tatou Loto
Me 2020
2:3

Maua’a i o Tatou Loto

Saunia e Douglas D. Holmes

Fesoasoani Muamua i le Au Peresitene Aoao o Alii Talavou Na Faamaloloina Talu Ai Nei

O loo taumafai le Alii e fesoasoani mai ai ia i tatou—i tatou uma—ia avatu Lana talalelei ia maua’a i o tatou loto.

Uso e ma tuafafine, e ma’eu le matagofie o le taimi ua tatou ola ai nei. A o tatou faamanatuina le amataga o le Toefuataiga, ua talafeagai foi ona faamanatuina le Toefuataiga faifaipea o loo tatou molimauina. Ou te olioli faatasi ma outou e ola i lenei vaitaimi. 1 O loo faaauau pea ona faatulagaina lelei e le Alii, e ala mai i Ana perofeta, mea uma e manaomia e fesoasoani ia i tatou e saunia ai ia taliaina o Ia. 2

O se tasi o na mea e manaomia o le ta’imua fou mo Tamaiti ma le Autalavou. O le toatele o outou ua masani i le faamamafa a lenei polokalama i le setiina o sini, faatusa fou o le auai, ma konafesi Mo le Malosi o le Autalavou. Peitai e le tatau ona tatou tuu atu i na mea e faanenefuina la tatou vaai i mataupu faavae o loo fausia ai le polokalama ma lo latou faamoemoega: ia fesoasoani e avatu le talalelei a Iesu Keriso ia maua’a i loto o a tatou tamaiti ma le autalavou. 3

Ou te talitonu afai tatou te vaavaai manino atili i nei mataupu faavae, o le a tatou iloa o lenei [polokalama] o se mea e sili atu nai lo o se polokalama mo tagata e i le vaitausaga o le 8 i le 18. O le a tatou vaai i le auala o loo taumafai le Alii e fesoasoani mai ai ia i tatou—i tatou uma—ia avatu Lana talalelei ia maua’a i o tatou loto. Ou te tatalo ia fesoasoani mai le Agaga Paia ia i tatou ia aoao faatasi.

Sootaga—“Ia faatasi ma i Latou” 4

O le mataupu faavae muamua o sootaga. Talu ai ona o i latou o se vaega masani o le Ekalesia a Iesu Keriso, e galo ai ia i tatou i nisi taimi le taua o sootaga i la tatou malaga faifaipea ia Keriso. E le o faamoemoeina i tatou e saili pe savavali na o i tatou i le ala o feagaiga. Tatou te manaomia le alofa ma le lagolago mai i matua, isi tagata o le aiga, uo, ma taitai o e o loo savalia foi le ala.

O nei ituaiga o sootaga e manaomia ai le taimi. Taimi e faatasitasi ai. Taimi e ‘ata ai, taalo ai, aoao ai, ma auauna atu ai faatasi. Taimi e talisapaia ai e isi mea e fiafia ma luitau ai isi. Taimi e tatala ai [talanoaga] ma talanoa faamaoni i le tasi ma le isi a o tatou tauivi ia sili atu ona lelei faatasi. O nei sootaga o se tasi lea o faamoemoega o le faatasitasi o ni aiga, korama, vasega, ma faalapotopotoga. O faavae ia o le auaunaga mataalia. 5

Na tuuina mai e Elder Dale G. Renlund ia i tatou se ki e atiaeina ai nei sootaga ina ua ia saunoa: “O le auauna atu ma le mataalia i isi, e tatau lava ona tatou vaai atu ia i latou … e ala atu i se vaaiga mai fofoga o le Tama Faalelagi. Ona faatoa mafai lea ona tatou amata ona malamalama i le taua moni o se agaga. Ona faatoa mafai lea ona tatou lagonaina le alofa o loo i ai i le Tama Faalelagi mo Ana fanau uma.” 6

O le vaai atu i isi e pei [ona silasila mai i ai] le Atua o se meaalofa lea. Ou te valaaulia i tatou taitoatasi ia saili mo lenei meaalofa. A o faapupulaina o tatou mata ia vaai, 7 o le a mafai foi ona tatou fesoasoani atu i isi ia vaai ia i latou lava e pei ona [silasila mai le] Atua. 8 Na faamamafa mai e Peresitene Henry B. Eyring le mana o lenei mea ina ua saunoa mai: “O le mea o le a sili ona taua o le mea e aoaoina [e isi] mai ia te [oe] i le pe o ai moni lava i latou ma le mea e mafai ona avea moni ai i latou. O la’u mate o le a le mafai ona latou aoaoina tele mai lauga. O le a latou mauaina mai lagona po o ai oe, tagata e manatu e i ai i latou, ma pe o ai e te manatu e ono latou avea ai.” 9 O le fesoasoani atu i isi ina ia malamalama i lo latou faasinomaga moni ma le faamoemoega o se tasi lea o meaalofa silisili e mafai ona tatou tuuina atu. 10 O le vaai i isi ma i tatou lava e pei ona silasila mai ai le Atua e fili “faatasi [o latou loto] i le lotogatasi ma le alofa.” 11

Faatasi ai ma le faaauau pea ona faateleina o malosiaga faalelalolagi o loo fetosoaia i tatou, tatou te manaomia le malosi lea e sau mai sootaga alofa. A o tatou fuafuaina la gaoioiga, fonotaga, ma isi faatasiga, sei o tatou manatuaina o se faamoemoega autu o nei faatasiga o le fausia lea o sootaga alofa e tuufaatasia i tatou ma fesoasoani e avatu le talalelei a Iesu Keriso ia maua’a i o tatou loto. 12

Faaaliga, Faitalia, ma le Salamo—“Fesootai i Latou ma le Lagi” 13

Ioe, e le lava le na o le fusia faatasi. E tele vaega ma faalapotopotoga e ausia le lotogatasi i mafuaaga eseese. Peitai, o le lotogatasi tatou te sailia o le tasi ia Keriso, ia fesootai i tatou ma Ia. 14 Ina ia fesootai o tatou loto ma le lagi, tatou te manaomia aafiaga faaleagaga taitoatasi, e pei ona saunoa manino mai ai Elder Andersen ia i tatou. 15 O na aafiaga e oo mai a o molioo mai e le Agaga Paia le afioga ma le alofa o le Atua i o tatou mafaufau ma loto. 16

E oo mai lenei faaaliga e ala mai i tusitusiga paia, aemaise lava le Tusi a Mamona; e ala i upu musuia mai perofeta soifua ma isi soo faamaoni; ma e ala mai i le leo filemu itiiti. 17 O nei upu e sili atu nai lo se vaitusi i luga o se itulau, leo o galu i o tatou taliga, po o ni manatu i o tatou mafaufau, po o ni lagona i o tatou loto. O le afioga a le Atua o le mana faaleagaga. 18 O le upumoni ma le malamalama. 19 O le auala o loo tatou lagonaina ai o Ia! O le afioga e amatalia ma faateleina lo tatou faatuatua ia Keriso ma faasasao ai i totonu o i tatou se manao ia avea atili faapei o le Faaola—o le salamo ma savali lea i le ala o feagaiga. 20

Ia Aperila ua mavae, na fesoasoani mai ai Peresitene Russell M. Nelson ia i tatou ia malamalama i le matafaioi tutotonu o le salamo i lenei malaga faavaloaga. 21 Sa ia saunoa mai: “A tatou filifili e salamo, ua tatou filifili e sui! Ua tatou faatagaina le Faaola e suia i tatou i o tatou lava ituaiga tagata silisili. … Tatou te filifili ia avea atili e faapei o Iesu Keriso!” 22 O le faagasologa o le suiga, uunaia e le afioga a le Atua, o le ala lea tatou te fesootai ai ma le lagi.

O le autu o le valaaulia a Peresitene Nelson ia salamo o le mataupu faavae o le faitalia. E tatau ona tatou filifili le salamo mo i tatou lava. E lē mafai ona faamalosia le talalelei i totonu o ō tatou loto. E pei ona saunoa Elder Renlund, “O le sini a lo tatou Tama Faalelagi i tulaga faamatua, o le le tuu atu lea i Ana fanau e faia le mea sa’o; ae o le tuu atu i Lana fanau e filifili e fai le mea sa’o.” 23

I polokalama ia ua suitulaga ai [le polokalama] a Tamaiti ma le Autalavou, e silia ma le 500 tulaga manaomia eseese e faamaea ai ina ia mafai ai ona mauaina ia aloaiaga eseese. 24 I le asō, e tasi lava le mea taua. O se valaaulia ia filifili ia avea atili faapei o le Faaola. Tatou te faia lenei mea e ala i le mauaina o le afioga o le Atua e ala i le Agaga Paia ma faatagaina Keriso e suia i tatou i o tatou lava ituaiga tagata silisili.

Ua sili atu lenei mea nai lo se faatinoga o le setiina o sini po o le faaleleia o le tagata lava ia. O sini ua na o ni meafaigaluega ia e fesoasoani e fesootai i tatou ma le lagi e ala i faaaliga, faitalia, ma le salamo—ia o mai ia Keriso ma maua Lana talalelei ia maua’a i o tatou loto.

Auai ma le Ositaulaga—“Tuu Atu ia i Latou e Taitai” 25

Ma le mea mulimuli, ina ia avatu le talalelei a Iesu Keriso ia maua’a i o tatou loto, tatou te manaomia le auai ai—e tuuina atu lo tatou taimi ma taleni i ai, ia ositaulaga i ai. 26 Tatou te mananao uma lava e ola i se olaga e i ai se uiga, ma e faapitoa lava le moni o lenei mea i le tupulaga faia’e. Latou te mananao i se galuega.

O le talalelei a Iesu Keriso o le galuega aupito silisili lea i le lalolagi. Na saunoa mai Peresitene Ezra Taft Benson: “Ua poloaiina i tatou e le Atua ina ia avatu lenei talalelei i le lalolagi uma. O le galuega lena e tatau ona tuufaatasia ai i tatou uma i aso nei. E na o le talalelei lava o le a faasaoina le lalolagi mai le mala o lona faatafunaina. E na o le talalelei lava o le a tuufaatasia ai alii [ma tamaitai] o ituaiga ma atunuu uma i le filemu. E na o le talalelei lava o le a aumaia le olioli, fiafia, ma le faaolataga i le aiga o tagata.” 27

Na folafola mai Elder David A. Bednar, “A o tatou faamalosiauina le autalavou e ala i le valaauliaina ma le faatagaina o i latou e galulue, o le a agai atu i luma le Ekalesia i ni auala ofoofogia.” 29 Ua tele ina tatou le valaauliaina ma faatagaina le autalavou e ositaulaga mo lenei galuega sili a Keriso. Na matauina e Elder Neal A. Maxwell, “Afai e matuā mafatia [a tatou] talavou [i le galuega a le Atua], o le a sili atu ona lofituina i latou e le lalolagi.” 28

O le polokalama a Tamaiti ma le Autalavou e taulai atu i le faamalosia o le autalavou. Latou te filifilia a latou lava sini. O au peresitene o korama ma vasega ua tuu atu ai a latou matafaioi e tatau ai. O le aufono a le autalavou a le uarota, e tai pei lava o le aufono a le uarota, e taulai atu i le galuega o le faaolataga ma le faaeaga. 30 Ma o korama ma vasega e amata a latou fonotaga e ala i le fefautuaai e uiga i le auala e faia ai le galuega ua tuuina atu e le Atua ia i latou. 31

Na saunoa mai Peresitene Nelson i le autalavou o le Ekalesia: “Afai e te filifili e, pe afai e te manao ai … e mafai ona avea oe o se vaega taua o se mea telē, o se mea maoae, o se mea malualii! … O outou o e aupito silisili ua auina mai e le Alii i lenei lalolagi. Ua ia te outou le gafatia ina ia atamamai ma popoto sili atu ma tele atu la outou uunaiga i le lalolagi nai lo soo se isi lava tupulaga ua mavae atu!” 32 I se isi taimi, na saunoa atu Peresitene Nelson i le autalavou: “Ou te talitonu atoatoa ia te outou. Ou te alofa ia te outou, ma e faapea foi le Alii. O tatou o Lona nuu, ua auai faatasi i Lana galuega paia.” 33 Tupulaga talavou e, pe mafai ea ona outou lagonaina le faatuatuaina e Peresitene Nelson o outou ma le taua o outou i lenei galuega?

Matua ma taitai matutua, ou te valaaulia outou ia vaavaai atu i le autalavou e pei ona silasila i ai Peresitene Nelson. A o lagonaina e le autalavou lo outou alofa ma le faatuatuaina, a o outou uunaia ma aoao atu i latou i le ala e taitai ai—ona o ese ai lea mai o latou ala—o le a latou faamaofaina outou i lo latou malamalama, tomai, ma le tuuto atu i le talalelei. 34 O le a latou lagona le olioli i le filifili e auai ma le ositaulaga mo le mafuaaga sili a Keriso. O le a maua’a atili Lana talalelei i o latou loto, ma o le a agai atu i luma le galuega i auala ofoofogia.

Folafolaga ma le Molimau

Ou te folafola atu, pe a tatou taulai atu i nei mataupu faavae—sootaga, faaaliga, faitalia, salamo, ma le ositaulaga—o le a goto ifo loloto le talalelei a Iesu Keriso ma maua’a i o tatou loto uma. O le a tatou vaaia le agai i luma o le Toefuataiga i lona faamoemoega tupito, le togiolaina o Isaraelu ma le faatuina o Siona, 35 lea o le a nofotupu ai Keriso o le Tupu o tupu.

Ou te molimau atu o loo faaauau pea ona faia e le Atua mea uma e tatau ai e saunia ai Lona nuu mo lena aso. Tau ina ia tatou vaai i Lona aao i lenei galuega matagofie a o tatou tauivi uma ia “o mai ia Keriso, ma faaatoatoaina ia te ia.” 36 I le suafa o Iesu Keriso, amene.

Faamatalaga

  1. Tagai i le Mataupu Faavae ma Feagaiga 45:12. Na saunoa mai Peresitene Nelson: “Tau lava ina mafaufau i le manaia ma le faanatinati o lena galuega uma: o perofeta uma e amata mai ia Atamu sa vaai i o tatou aso. Ma sa talanoa perofeta taitasi e uiga i o tatou aso, pe a faapotopotoina ia Isaraelu ma o le a saunia le lalolagi mo le Afio Mai Faalua o le Faaola. Mafaufau i ai! Mai i tagata uma ua ola ai i le paneta o le lalolagi, o i tatou o tagata ua auai i lenei mea maoae faaiu, o le faapotopotoina. Se mea ina a ofoofogia!” (“Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], HopeofIsrael.ChurchofJesusChrist.org.

    Na aoao mai Elder Jeffrey R. Holland:

    “O se taimi sili lenei ua tatou ola ai!

    “O le talalelei a Iesu Keriso o le upumoni aupito mautinoa, sili ona malupuipuia, sili ona faatuatuaina, ma sili ona tauia i le fogaeleele ma i le lagi, i le olaga nei ma i le faavavau. E leai se mea—leai lava, leai se tasi, leai se faatosinaga—o le a taofia lenei Ekalesia mai le faataunuuina o lana misiona ma le iloaina o lona taunuuga ua folafola mai a o lei faavaeina le lalolagi. … E leai se mea e fefe pe le mautonu ai e uiga i le lumanai.

    “E le pei o isi vaitausaga i o tatou luma, o lenei tisipenisione o le a le oo i se liliuese faafaalapotopotoga; o le a le vaaia le leiloloa o ki o le perisitua; o le a le mafatia i le taofia o faaaliga mai le siufofoga o le Atua Silisiliese. … Oka se taimi ina a ola ai!

    “… Afai e te lei matauina, ou te lagona le toafimalie e uiga i aso e gata ai. … Talitonu. Tulai a’e i luga. Ia faamaoni. Ma faia le mea sili e uiga i le aso ofoofogia lea ua tatou ola ai nei.“ (Facebook post, Me 27, 2015; tagai foi i le “Be Not Afraid, Only Believe” [saunoaga i faiaoga o le Matagaluega o Aoga a le Ekalesia, Feb. 6, 2015], broadcasts.ChurchofJesusChrist.org).

  2. Tagai i le Ioane 1:12.

  3. E lei umi talu ona valaauina i matou o se Au Peresitene Aoao o Alii Talavou, ae talanoa mai Peresitene Henry B. Eyring ia i matou i luitau ma avanoa tulaga ese o loo feagai ma le autalavou a le Ekalesia i aso nei. Na ia fautuaina i matou e taulai atu i mea ia o le a fesoasoani e aveina atu le talalelei a Iesu Keriso i le loloto o latou loto. O lena fautuaga ua avea o se taiala mo i matou o le Au Peresitene o Alii Talavou.

  4. Tagai i le “Be with Them,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them.

  5. Tagai i le Mosaea 18:25; Moronae 6:5.

  6. Dale G. Renlund, “E Ala Mai i Fofoga o le Atua,” Liahona, Nov. 2015, 94; tagai foi i le Mose 1:4–6.

    Sa aoao mai e Peresitene Monson: “Ua ia i tatou le tiutetauave e vaai atu ai i tagata, e le o tagata o loo latou i ai ae o tagata e mafai ona avea ai i latou. Ou te augani atu ia te outou ia mafaufau ia i latou i lenei ala” (“Vaai Atu i Isi o Tagata e Mafai ona Avea ai i Latou,” Liahona, Nov. 2012, 70).

    Sa aoao mai e Elder Neal A. Maxwell: “O le tele lava o taimi, o le le tausisia e se tagata talavou o tulaga faatonuina a le Ekalesia, po o ana fesili e foliga mai e feteenai, po o ona masalosaloga faaaliga e vave ona faailogaina ai o ia. O taunuuga e mafai ona mamaoese ma, i nisi taimi, faaesea. O le alofa moni e le fiafia i le faailogaina!“ (“Unto the Rising Generation,” Ensign, Apr. 1985, 9).

  7. Tagai i le 2 Tupu 6:17.

  8. Na saunoa Stephen L. Richards, o se uso o le Au Peresitene Sili: “O le ituaiga iloatino e aupito maualuga o le mafai lea ona iloa e isi ma faaali atu ia i latou o latou lava uiga sili ona lelei, o natura lelei o loo i totonu o i latou” (in Conference Report, Apr. 1950, 162; in David A. Bednar, “Ia Atamai,” Ensign, Dec. 2006, 35; Liahona, Tes. 2006, 19). Tagai foi i le 2 Tupu 6:17.

  9. Henry B. Eyring, “Teaching Is a Moral Act” (saunoaga i le Iunivesite o Polika Iaga, Aok. 27, 1991), 3, speeches.byu.edu; emphasis added; tagai foi i le Henry B. Eyring, “Fesoasoani ia i Latou e Faatutu ni Sini Maualuluga,” Liahona, Nov. 2012, 60–67.

  10. Tagai i le Mose 1:3–6.

  11. Mosaea 18:21; tagai foi i le Mose 7:18.

  12. “O alii talavou o loo i ai ni sootaga malolosi ma lelei ma se aiga, uo, ma taitai [o le Au Paia o Aso e Gata Ai] lea e fesoasoani ia i latou e atiina ae se sootaga ma lo latou Tama Faalelagi, e foliga mai o le a tumau malosi. O elemene o polokalama faapitoa—e pei o le mataupu aoaoina, polokalama o gaoioiga a [Alii Talavou], faamoemoega o mea e ausia e le tagata lava ia … atonu e itiiti se aafiaga saoloto i na sootaga. … O le fesili taua e le o le auala o loo faatinoina ai ma le atoatoa o ia elemene o polokalama faapitoa, ae o le auala o saofagā ai i ni sootaga lelei e faamalosia ai le faasinomaga faalelotu o alii talavou o le [Au Paia o Aso e Gata Ai]” (“Be with Them,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them).

  13. Tagai i le “Connect Them with Heaven,” ChurchofJesusChrist.org/callings/aaronic-priesthood-quorums/my-calling/leader-instruction/connect-them-with-heaven.

  14. Tagai i le Ioane 15:1–5; 17:11; Filipi 4:13; 1 Ioane 2:6; Iakopo 1:7; Ominae 1:26; Moronae 10:32.

  15. Ua tumu tusitusiga paia i faataitaiga o lenei mea; e na o le lua lenei: 1 Nifae 2:16; Enosa 1:1–4.

  16. Tagai i le Luka 24:32; 2 Nifae 33:1-2; Iakopo 3:2; Moronae 8:26; Mataupu Faavae ma Feagaiga 8:2–3.

  17. Tagai i le 2 Timoteo 3:15–16; Mataupu Faavae ma Feagaiga 68:3–4; 88:66; 113:10.

  18. Tagai i le 1 Tesalonia 1:5; Alema 26:13; 31:5; Helamana 3:29; 5:17; Mataupu Faavae ma Feagaiga 21:4–6; 42:61; 43:8–10; 50:17–22; 68:4.

  19. Tagai i le Ioane 6:63; 17:17; Alema 5:7; Mataupu Faavae ma Feagaiga 84:43–45; 88:66; 93:36.

  20. Tagai i le Ioane 15:3; 1 Peteru 1:23; Mosaea 1:5; Alema 5:7, 11–13; 32:28, 41–42; 36:26; 62:45; Helamana 14:13.

  21. Tagai i le 2 Nifae 31:19–21; 32:3, 5.

  22. Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 67.

  23. Dale G. Renlund “Ina Filifili Ia o Outou i le Aso Nei,” Liahona, Nov. 2018, 104.

  24. O lenei fuainumera e aofia ai tulaga manaomia o polokalama faasikauti, lea na avea talu ai nei o se vaega o le polokalama o gaoioiga a le Ekalesia mo tamaiti ma alii talavou, aemaise i le Iunaite Setete ma Kanata. I eria ia e le’i auai i le Sikauti, o le aofai o tulaga manaomia sa silia ma le 200. Ma le isi, o polokalama eseese o gaoioiga mo tamaiti, teineiti, alii talavou, ma tamaitai talavou na mamanuina eseese, ma ua sili atu ai ona lavelave mo aiga.

  25. Tagai i le “Let Them Lead,” ChurchofJesusChrist.org/callings/aaronic-priesthood-quorums/my-calling/leader-instruction/let-them-lead.

  26. Tagai i le Omnae 1:26; 3 Nifae 9:20; 12:19; Mataupu Faavae ma Feagaiga 64:34. “O se tapuaiga e le manaomia le ositaulagaina o mea uma, e le i ai lava se mana e lava e maua ai le faatuatua e manaomia mo le ola ma le faaolataga” (Lectures on Faith [1985], 69).

  27. Ezra Taft Benson, The Teachings of Ezra Taft Benson (1988), 167; in Preach My Gospel: A Guide to Missionary Service (2019), 13; tagai foi ia Russell M. Nelson, “Hope of Israel,” HopeofIsrael.ChurchofJesusChrist.org.

  28. Fonotaga ma Elder David A. Bednar; tagai foi i le “2020 Temple and Family History Leadership Instruction,” Feb. 27, 2020, ChurchofJesusChrist.org/family-history.

  29. Neal A. Maxwell, “Unto the Rising Generation,” 11. Na faaauau pea Elder Maxwell, “I le faatinoga, e toa fia au peresitene o korama a tiakono ma aoao e aofia ai i le na o le valaauina o se tasi e ofoina atu se tatalo pe tufaina le faamanatuga? Uso e, o agaga faapitoa moni lava nei, ma e mafai ona latou faia ni mea taua pe a tuuina i ai se avanoa!

  30. Tagai i le Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 2.2, ChurchofJesusChrist.org.

  31. O loo maua le tele o punaoa i le Gospel Library e fesoasoani i le autalavou e taitai ai, e aofia ai “Punaoa mo le Au Peresitene o Korama ma Vasega,” “e Faaaogaina ai le Sau, Mulimuli Mai ia te A’u—Mo le Korama a le Perisitua Arona ma Vasega a Tamaitai Talavou, ” ma i punaoa mo vasega a Tamaitai Talavou ma korama a le Perisitua Arona i “Tofiga o le Uarota po o Paranesi.”

  32. Russell M. Nelson, “Hope of Israel,” HopeofIsrael.ChurchofJesusChrist.org. I le faagasologa o lenei lava faigalotu, na saunoa ai Peresitene Nelsona: :Sa faapolopolo e lo tatou Tama Faalelagi Ana agaga aupito sili ona tamalii—atonu e mafai ona ou fai atu o Lana ‘au aupito lelei—mo le toe laasaga lenei. O na agaga tamalii—na tagata taaalo silisili ona lelei, na toamanumanu—o outou!”

  33. Russell M. Nelson, malelega amata i le “Tamaiti ma le Autalavou: O Se Talanoaga Faafesagai ma Elder Gerrit W. Gong,” Nov. 17, 2019, broadcasts.ChurchofJesusChrist.org.

  34. Na saunoa Peresitene Nelson: “E manaomia ona tatou tuu atu i le autalavou e taitai, aemaise lava i latou ua valaauina ma vaetofiaina e auauna atu i au peresitene o vasega ma korama. O le a faamatuu atu ia i latou le pule o le perisitua. O le a latou aoao i le auala e maua ai musumusuga i le taitaiga o a latou vasega po o korama” (i le “Children and Youth Introductory Video Presentation,” Sete. 29, 2019, ChurchofJesusChrist.org).

    Na saunoa Elder Quentin L. Cook, “Ua talosagaina tatou talavou ia faia atili o latou lava tiutetauave faaletagata lava ia a o talavou—e aunoa ma le faia e matua ma taitai o mea e mafai e le autalavou ona faia mo i latou lava” (“O Fetuunaiga e Faamalosia ai le Autalavou,” Liahona, Nov. 2019, 40).

  35. Na aoao mai Peresitene George Q. Cannon: “Ua faapolopoloina e le Atua agaga mo lenei tisipenisione o e ua i ai le lototoa ma le naunautai e fetaiai ma le lalolagi, ma mana uma o le tiapolo, o ē e vaaia ma ē le vaaia, ia folafola atu le talalelei ma faatumauina le upu moni ma fausia le Siona a lo tatou Atua e le fefefe i soo se taunuuga. Ua Ia auina mai nei agaga i lenei tupulaga e faataatia le faavae o Siona e le toe mafai ona faatoilaloina, ma ia faatuina ni fanau o le a amiotonu, ma o le a ava i le Atua, ma ava ia te Ia i mea uma, ma usitai ia te Ia i tulaga uma’ (“Remarks,” Deseret News, May 31, 1866, 203); tagai foi i le Aoaoga a Peresitene o le Ekalesia: Iosefa Samita (2007), 186.

  36. Moronae 10:32.