Bradley R. Wilcox

Fesoasoani Lua i le Au Peresitene Aoao o Alii Talavou

A o auai i se konafesi a le autalavou i Kalefonia, sa feiloai ia Uso Bradley (Brad) R. Wilcox i se alii talavou sa lei manao e i ai iina. Sa mafuta atu o ia i le taulealea i lalo o se laau paolo, ma e lei pine ae o la talatalanoa i le autu e fiafia i ai le talavou—o le faasee i laupapa faasee.

Sa fai atu Uso Wilcox i le talavou e faaali atu ia te ia ni nai fegi faasee. O le faagaeetia ai, sa ia valaaulia ai le talavou e na te faia se faataitaiga o le faasee i le laupapa faasee i le polokalama Faapitoa mo Talavou [Especially for Youth] i le taumafanafana i lena tausaga. Na musu le alii talavou ae na iu lava ina ioe atu i ai. I le EFY, sa ia maua ai se aafiaga na suia ai lona olaga ma maua ai lana molimau i le talalelei.

“Na alu atu o ia i le EFY i se laupapa faasee, ae na ia foi o se faifeautalai,” o le tala lea a Uso Wilcox.

“Na ou faaaluina lo’u olaga e mafuta ai ma tamaiti ma tupulaga talavou,” na saunoa ai Uso Wilcox, “ma ou te alofa i le autalavou.”

Sa soifua mai Bradley Ray Wilcox i Provo, Iuta, ISA, i le aso 25 Tesema, 1959 ia Ray T. Wilcox ma Val C. Wilcox. Sa soifua ae o ia i Provo sei vagana ai le faaaluina o ni nai tausaga a o laitiiti i Itiopia.

Ina ua maea lana misiona talai i le Misiona a Chile Viña del Mar, sa faaipoipo Uso Wilcox ia Deborah Gunnell i le Malumalu o Provo Iuta i le aso 7 Oketopa, 1982. O i la’ua o matua o se fanau e toafa.

Na maua e Uso Wilcox lona faailoga o le tagata malaga ma le matuaofaiva mai le Iunivesite o Polika Iaga ma lona faailoga o le tofamanino i aoaoga mai le Iunivesite o Wyoming. E tele ni faailoga na faamamaluina ai Uso Wilcox mo lana galuega i a’oga, ma sa tuuto atu le silia ma le 30 tausaga i le polokalama a le BYU o le Especially for Youth, ma sa fiafia tele o ia i le avea ma faiaoga i le Campus Educational Week.

Sa nonofo Uso Wilcox ma lona aiga i Niu Sila ma Sepania a o ia faatonutonuina polokalama o suesuega i fafo mo le BYU. E tele ni tusi na ia tusia ma o le taimi nei o ia o se polofesa i le Matagaluega o Tusitusiga Paia Anamua i le BYU.

Sa auauna Uso Wilcox o se peresitene o le Misiona a Chile Santiago i Sasa’e, ma o se sui auai o le aufaatonu aoao o le Aoga Sa, fesoasoani i se au peresitene o le siteki, ma se epikopo o se uarota a le autalavou matutua nofofua. I le taimi o lona valaauga, sa auauna atu o ia o se fautua maualuga ma se peresitene o Alii Talavou o le siteki.