O Tatalo o le Faatuatua
Pe a tatou tatalo i le faatuatua, o le a avea i tatou ma se vaega taua i le galuega a le Alii a o Ia sauniaina le lalolagi mo Lona Afio Mai Faalua.
O le tatalo a Elder Maynes i le amataga o lenei uluai sauniga o le konafesi aoao ua taliina. Ua oo mai musumusuga ia te i tatou e ala i savali ofoofogia ma musika matagofie. O le folafolaga a Peresitene Russell M. Nelson e faapea o lenei konafesi o le a manatua pea ua amata lava ona faataunuuina.
Ua atofaina e Peresitene Nelson lenei tausaga e avea ma “se vaitau o seneturi e lua e faamanatuina ai le 200 tausaga talu ona faaali mai le Atua le Tama ma Lona Alo Pele, o Iesu Keriso, ia Iosefa Samita i se faaaliga.” Na valaaulia i tatou e Peresitene Nelson ia faia se fuafuaga patino e saunia ai i tatou lava mo lenei konafesi faasolopito, lea na ia saunoa ai o le faamanatuina o le a avea ma “se taimi o suiga iloga i le talafaasolopito o le Ekalesia, ma o lau vaega e taua tele.”1
E pei o a’u, masalo na e faafofoga i lana savali ma fesili ifo ia te oe lava, “O le a se auala e taua tele ai la’u vaega?” Masalo na e faitau ma tatalo e uiga i mea na tutupu o le Toefuataiga. Masalo, e sili atu i lo se isi lava taimi muamua, na e faitauina ai tala o na taimi ina ua faailoa mai e le Atua le Tama Lona Alo Pele. Masalo na e faitau i mea na tutupu i le taimi na fetalai mai ai le Faaola i fanau a lo tatou Tama Faalelagi. Ou te iloa na ou faia na mea uma ma isi mea.
Sa ou mauaina maufaasino i a’u faitauga i le perisitua a le Atua ma le tatalaga o tisipenisione. Na faamaualaloina a’u ina ua ou iloaina o a’u sauniuniga mo lenei konafesi o se taimi lea o suiga iloga i la’u lava ia talafaasolopito. Sa ou lagonaina ni suiga i lo’u loto. Sa ou lagonaina se lotofaafetai fou. Sa ou lagonaina le faatumulia i le olioli i le avanoa o le valaauliaina ia auai i lenei faamanatuga o le Toefuataiga faifai pea.
Ou te mafaufau ona o sauniuniga faaeteete, o loo lagonaina ai e isi le olioli sili atu, faamoemoega sili atu, ma sili atu ona naunau e auauna i soo se matafaioi e manaomia mai e le Alii.
O mea maoae na tutupu tatou te faamamaluina, o le amataga o le tisipenisione mulimuli na valoiaina, lea o loo saunia ai e le Alii Lana Ekalesia ma Lona nuu, o i latou o loo tauaveina Lona suafa, ia talia o Ia. I le avea ai ma se vaega o a tatou sauniuniga mo Lona afio mai, o le a Ia siitia ai i tatou taitoatasi ina ia mafai ona tatou tutulai a’e i luitau faaleagaga ma avanoa e le faatusalia i soo se mea na vaaia i le talafaasolopito o lenei lalolagi.
Ia Setema 1840, na folafola mai ai e le Perofeta o Iosefa Samita ma ona fesoasoani i le Au Peresitene Sili le folafolaga lenei: “O le galuega a le Alii i nei aso e gata ai, o se galuega maoae tele ma e toetoe e le oo i ai le malamalama o tagata soifua. O ona mamalu e le mafaamatalatalaina, ma o lona maoae e le mafaatusalia. O le autu lea sa uunaia ai loto o perofeta ma alii amiotonu mai le foafoaga o le lalolagi e oo i tupulaga uma e sosoo ai e oo mai i le taimi nei; ma o le tisipenisione moni lava o le atoaga o taimi, lea o mea uma o ia Keriso Iesu, pe o i le lagi po o le lalolagi, o le a faapotopoto faatasi ia te Ia, ma a oo ina toefuatai mai mea uma, e pei ona fetalaia e perofeta paia uma talu ona faavae le lalolagi; aua o iina o le a tupu ai le faataunuuina mamalu o folafolaga na faia i tamā, a o maoae, mamalu, ma matagofie le faaaliga mai o le mana o le Silisiliese.”
Sa faaauau ona latou faapea mai: “Tatou te lagona le naunautaiga e agai i luma ma tuufaatasia o tatou malosiaga mo le fausiaina o le Malo, ma le faatuina o le Perisitua i lo la atoatoaga ma mamalu. O le galuega e tatau ona faataunuuina i aso e gata ai o se galuega e maoae lona taua tele, ma o le a manaomia le faaaogaina o le malosiaga, atamai, taleni, ma agavaa o le Au Paia, ina ia taavale atu i luma ma lena mamalu ma le malosi na faamatalaina mai e le perofeta [o Tanielu] [tagai i le Tanielu 2:34–35, 44–45]; a o le iuga o le a manaomia le manatu tasi i ai o le Au Paia, ina ia faataunuuina galuega e maoae tele le taua ma le matagofie.”2
O le tele o auiliiliga o mea o le a tatou faia ma le taimi o le a tatou faia ai i le gasologa o le Toefuataiga e le’i faaalia maia. Ae na iloa lava e le Au Peresitene Sili i na uluai aso le lautele ma le loloto o le galuega ua tuu mai e le Alii i o tatou luma. Na o ni nai faataitaiga nei o mea ua tatou iloa o le a tutupu:
E ala mai i Lana Au Paia, o le a ofo mai ai e le Alii le meaalofa o Lana talalelei “i atunuu uma, ituaiga, gagana, ma nuu.”3 O le a faaauau pea ona faia e tekinolosi ma vavega se vaega—e faapena foi i tagata taitoatasi o “fai faiva i tagata”4 o ē auauna atu ma le mana ma le faatuatua faateleina.
O i tatou o se nuu o le a lotogatasi atili i le lotolotoi ai o fetaua’iga faateleina. O le a faapotopotoina i tatou i le malosiaga faaleagaga o vaega ma aiga e faatumulia i le malamalama o le talalelei.
E oo lava i se lalolagi lē talitonu o le a iloaina Le Ekalesia a Iesu Keriso o le Au Paia o Aso e Gata Ai ma iloaina le mana o le Atua ua i ai i ona luga. O soo faatuatua ma lotototoa o le a tauaveina ma le lē fefe, lotomaualalo, ma le saoloto i o latou luga le suafa o Keriso i o latou olaga i aso uma.
E mafai faapefea la e i tatou taitoatasi ona auai i lenei galuega taua ma le mamalu? Na a’oa’o mai Peresitene Nelson i le auala e tuputupu a’e ai i le mana faaleagaga. Pe a tatou aveina le salamo o se avanoa fiafia ona o lo tatou faatuatua faatupulaia o Iesu o le Keriso, pe a tatou malamalama ma talitonu e faafofoga mai le Tama Faalelagi i a tatou tatalo uma, pe a tatou tauivi e usitai ma ola i poloaiga, ua tatou ola i lo tatou mana e maua ai faaaliga faifai pea. E mafai ona avea le Agaga Paia ma a tatou soa tumau. E tumau pea se lagona o le malamalama ia i tatou e tusa lava pe faasolo pogisa le lalolagi o siomiaina i tatou.
O Iosefa Samita o se faataitaiga o le ala e tuputupu a’e ai i lena mana faaleagaga. Sa ia faaali mai ia i tatou o le tatalo o le faatuatua o le ki lea i faaaliga mai le Atua. Sa ia tatalo i le faatuatua, ma le talitonu o le a tali mai le Atua le Tama i lana tatalo. Sa ia tatalo i le faatuatua, sa talitonu e na o Iesu Keriso na mafai ona faasaolotoina o ia mai le ta’usalaga sa ia lagonaina mo ana agasala. Ma sa ia tatalo i le faatuatua, ma le talitonu na manaomia ona ia maua le Ekalesia moni a Iesu Keriso e maua ai lena faamagaloga.
I lana auaunaga faaperofeta atoa, sa faaaoga ai e Iosefa Samita ia tatalo o le faatuatua e maua ai faaaliga faifai pea. A o tatou feagai ai ma luitau o nei aso ma luitau e lei oo mai, o le a tatou manaomia foi ona faataitaia lea lava mamanu e tasi. Sa saunoa Peresitene Polika Iaga, “Ou te le iloa se isi lava auala mo le Au Paia o Aso e Gata Ai nai lo mo mānava uma ina ia avea ma se tatalo taua i le Atua ia taiala ma faatonu lona nuu.”5
O nei upu mai tatalo o le faamanatuga e tatau la ona faamatalaina ai o tatou olaga i aso taitasi: “Ia manatua pea o ia.” O “Ia” o loo faasino ia Iesu Keriso. O upu e sosoo ai, “ma tausi i ana poloaiga,” ua fautua mai ai le uiga o le manatua pea o Ia.6 A tatou manatua pea Iesu Keriso, e mafai ona tatou fesili atu i tatalo leleoa, “O le a se mea e finagalo o Ia ou te faia?”
O se tatalo faapena, na ofo atu i le faatuatua ia Iesu Keriso, na amatalia ai lenei tisipenisione mulimuli. Ma o le a i ai i le fatu o vaega o le a faia e i tatou taitoatasi i lona faagasologa faifai pea. Ua ou iloaina, e pei ona outou iloaina, ni faataitaiga matagofie o tatalo faapea.
Muamua o Iosefa Samita. Sa ia ōle atu i se faatuatua faatamaitiiti i le mea e finagalo le Alii na te faia. O Lana tali na suia ai le talafaasolopito o le lalolagi.
Ia te a’u, o se lesona sili ona taua e sau mai le tali a Iosefa i le osofaiga a Satani a o tootuli Iosefa e tatalo.
Ou te iloa mai aafiaga e taumafai Satani ma ana auauna ia tatou lagonaina e le tatau ona tatou tatalo. Ina ua faaaoga e Iosefa Samita lona malosi atoa e valaau atu ai i le Atua e laveai o ia mai le mana na taumafai e noatia o ia, o lana tatalo mo se toomaga sa taliina ma na faaali mai ai le Tama Faalelagi ma Iesu Keriso.
O le taumafaiga a Satani e taofia le amataina o le Toefuataiga sa matuā ogaoga ona o le tatalo a Iosefa sa matuā taua. Ua i ai ia te oe ma a’u ni vaega laiti ifo e fai i le Toefuataiga faifai pea. Ae o le a taumafai le fili o le Toefuataiga e taofi i tatou mai le tatalo. O le faataitaiga o le faatuatua o Iosefa ma lona naunautaiga e mafai ona faamalosia ai i tatou i o tatou naunautaiga. O se tasi lenei o mafuaaga e tele e faaaofia ai i a’u tatalo le faafetai i le Tama Faalelagi mo le Perofeta o Iosefa.
O Enosa i le Tusi a Mamona o le isi faataitaiga lea mo la’u tatalo o le faatuatua a o ou taumafai e fai la’u vaega i le Toefuataiga faifai pea. Po o le a lava lau vaega o le a i ai, e mafai ona e ave o ia e fai ma se faufautua patino.
E pei o Iosefa, sa tatalo Enosa i le faatuatua. Sa ia faamatalaina lona aafiaga i le ala lenei:
“Ma sa matelaina lo’u agaga; ma sa ou tootuli i lalo i luma o lo’u Tufuga, ma ou tagi atu ia te ia i le tatalo malosi ma le faatauanau mo lo’u lava agaga; ma sa ou tagi atu ia te ia i le aso atoa; ioe, ma ina ua oo mai le po sa ou sii maualuga a’e pea lo’u leo sa oo ina oo atu i le lagi.
“Ma sa oo mai se siufofoga ia te au, ua fetalai mai: Enosa e, ua faamagaloina au agasala, ma o le a faamanuiaina oe.
“Ma o au, o Enosa, sa ou iloa e le mafai ona pepelo le Atua; o le mea lea, sa tafi ese ai lo’u lagona o a’u sese.
“Ma sa ou fai atu: Le Alii e, ua faapea ea ona faia lenei mea?
“Ma sa fetalai mai o ia ia te au; Ona o lou faatuatua ia Keriso, o lē e te lei faalogo lava pe na e vaai muamua i ai. Ma e tele tausaga e mavae atu ae lei faaali mai e ia o ia lava i le tino; o le mea lea, inā alu ia, ua faamamāina oe i lou faatuatua.”7
O le lesona ua faamanuiaina ai o loo i ai i upu nei: “Ona o lou faatuatua ia Keriso, o lē e te lei faalogo lava pe na e vaai muamua i ai.”
Sa i ai le faatuatua o Iosefa ia Keriso e alu atu ai i le togavao ma ia tatalo foi mo le faasaolotoina mai mana o Satani. Sa le’i vaai o ia i le Tama ma le Alo, ae na ia tatalo i le faatuatua ma le malosi atoa o lona loto.
O le aafiaga o Enosa na a’oa’oina ai a’u i le lesona taua lava lea e tasi. Pe a ou tatalo i le faatuatua, e ia te a’u le Faaola e fai ma o’u puluvaga i le Tama ma e mafai ona ou lagonaina ua oo a’u tatalo i le lagi. E oo mai tali. E maua faamanuiaga. O loo i ai le filemu ma le olioli e oo lava i taimi faigata.
Ou te manatua le taimi, i le avea ai ma uso sili ona fou o le Korama a Aposetolo e Toasefululua, sa ou tootuli ai i le tatalo faatasi ma Elder David B. Haight. Sa pei o ia o lo’u matua lea ua i ai nei, faatasi ma luitau ua ou oo i ai a’u ia i le taimi nei. Ou te manatua lona leo a o ia tatalo. Ou te le’i pupula e vaai atu i ai, ae sa peisea’i ia te a’u sa ataata. Sa ia talanoa ma le Tama Faalelagi faatasi ma le olioli i lona leo.
Na mafai ona ou faalogoina i lo’u mafaufau lona fiafia ina ua ia fai mai, “I le suafa o Iesu Keriso.” Sa foliga mai ia te a’u e peisea’i na lagona e Elder Haight ua faamaonia mai e le Faaola i lena taimi le savali na ia tatalo atu ai i le Tama. Ma sa ou mautinoa o le a taliaina i se ataata.
O le a faateleina lo tatou tomai e fai ai a tatou saofaga taua i le Toefuataiga faifai pea ofoofogia a o tatou tuputupu ae i lo tatou faatuatua ia Iesu Keriso i le avea ma o tatou Faaola ma lo tatou Tama Faalelagi i le avea ma o tatou Tama alofa. Pe a tatou tatalo i le faatuatua, o le a avea i tatou ma se vaega taua i le galuega a le Alii a o Ia sauniaina le lalolagi mo Lona Afio Mai Faalua. Ou te tatalo ina ia tatou maua uma le olioli i le faia o le galuega ua Ia valaauliaina i tatou taitoatasi e faatino.
Ou te molimau atu o loo soifua Iesu Keriso. O Lana Ekalesia ma le malo lenei i le lalolagi. O Iosefa Samita o le perofeta o le Toefuataiga. O Peresitene Russell M. Nelson o le perofeta a le Alii i le lalolagi i aso nei. O loo ia umia ki uma o le perisitua i Le Ekalesia a Iesu Keriso o le Au Paia o Aso e Gata Ai. I le suafa o Iesu Keriso, amene.