O Se Molimau Ola o le Keriso Soifua

Saunia e Epikopo Gérald Caussé

Epikopo Pulefaamalumalu

O le savali autu o le Tusi a Mamona o le toefuatai maia lea o le iloa moni o le matafaioi taua a Iesu Keriso i le faaolataga ma le faaeaga o tagata.

I se aso la o le tautotogo i le 2017, sa sologa lelei lava le fale tatala mo le Malumalu o Pale Farani ae faalatalata atu loa se alii i se tasi o taitai o le maimoaga ma se faailoaga faanoanoa i ona foliga. Sa ia fai mai e nofo o ia i talaane o le malumalu ma tautino mai o ia o se tagata sa matua tetee lava i le fauina o le malumalu. Sa ia faamatalaina i se tasi aso a o ia sioa atu i fafo mai le faamalama o lona falemautotogi, sa ia matamata ai i se masini telē (crane) o tuu ifoa i lalo se faatusa o Iesu mai le lagi ma tuu lemu i luga o le eleele o le malumalu. Sa tautino mai e lea alii o lenei aafiaga sa suia atoa ai ona lagona agai i le tatou Ekalesia. Sa ia iloa o tatou o soo o Iesu Keriso ma sa aioi mai mo le tatou faamagaloga mo ni manu’aga ua te’a sa ono ia faamatua’iaina.

Faatagata ua faatuina i le Malumalu o Paris Farani

O le faatusa o le Christus, lea ua faamamaluina le lotoa o le Malumalu o Pale ma isi lotoa o le Ekalesia, ua molimau atu e uiga i lo tatou alolofa mo le Faaola. O le uluai faatusa maamora o le galuega a le tusiata Tenimaka o Bertel Thorvaldsen, na vaneina i le 1820—o le tausaga lava e tasi o le Uluai Faaaliga. O le faatusa o loo tu o se vaaiga uigaese mai le tele o galuega faatufugaga o lena vaitau, lea na matua atagia ai mafatiaga o Keriso i luga o le satauro. O le galuega a Thorvaldsen ua tuu mai ai le Keriso soifua, o le na mauaina le manumalo i le oti ma, faatasi ma aao mafola, ua valaaulia ai tagata uma ia o mai ia te Ia. Ua na o tulaga o fao i Ona aao ma vae ma le manu’a i Lona itu o loo molimau mai i le tiga lē mafaamatalaina na Ia onosaia ina ia faaolaina ai tagata uma.

O le aao o le Faaola e pei ona faaalia i le Christus

Masalo o le tasi mafuaaga tatou te fiafia ai i lenei faatusa o ni tagata o Le Ekalesia a Iesu Keriso o le Au Paia o Aso e Gata Ai ona e faamanatu mai ai ia i tatou le faamatalaga ua tuuina mai i le Tusi a Mamona e uiga i le faaali atu o le Faaola i le konetineta o Amerika:

“Ma faauta, sa latou vaaia se Tagata ua afio ifo mai le lagi; ma sa laei o ia i se ofutalaloa paepae; ma sa afio ifo o ia ma tu i le totonugalemu o i latou. …

“Ma sa oo ina ia faaloaloa mai lona aao ma fetalai mai i tagata, ua faapea mai:

“Faauta, o Au o Iesu Keriso, …

“… Ma ua ou inu i lena ipu oona lea na tuuina mai e le Tamā ia te au, ma ua ou faamamaluina le Tamā i lou aveina i ou luga o agasala a le lalolagi.”¹

Ona Ia valaauliaina lea o alii taitasi, fafine, ma tamaiti ia o mai i luma ma tuu mai o latou lima i Lona itu ma tagotago i tulaga o fao i Ona aao ma vae, o lea na maua ai se molimau patino o Ia moni lava o le Mesia ua loa ona faatalitali i ai.²

O lenei vaaiga maoae o le taulaiga sili o le Tusi a Mamona. O le “tala fiafia” atoa o le talalelei o loo i ai i lenei ata o le Faaola o loo faaloaloa mai ma le agalelei Ona “aao o le alofa mutimutivale:³ e valaaulia tagata taitoatasi ia o mai ia te Ia ma maua faamanuiaga o Lana Togiola.

O le savali autu o le Tusi a Mamona o le toefuatai maia lea o le iloa moni o le matafaioi taua a Iesu Keriso i le faaolataga ma le faaeaga o tagata. O lenei autu o loo ta’ua pea mai le itulau o le faatomuaga e oo atu i upu mulimuli lava o le mataupu mulimuli. I le gasologa o seneturi o le liliuese ma le fenumiai faaleagaga, na leiloloa pe faapi’opi’oina ai le uiga loloto atu o mea na faia e Keriso i Ketesemane ma luga i Kolokota. Masalo na matuā lagona le faagaeetia o Iosefa Samita, a o ia faaliliuina le 1 Nifae, na ia iloaina ai lenei folafolaga ofoofogia: “O talafaamaumau mulimuli nei [o le Tusi a Mamona] … o le a faamaonia ai le moni o talafaamaumau muamua [le Tusi Paia] … ma o le a faailoa mai ai mea manino ma pele na aveesea mai ia i latou, ma o le a faailoa atu ai i ituaiga, gagana, ma tagata uma, o le Tamai Mamoe a le Atua o le Alo lea o le Tama Faavavau, ma o le Faaola o le lalolagi; ma e ao i tagata uma ona o mai ia te ia, [a leai] e le mafai ona faaolaina i latou.”⁴

O upumoni manino ma pele e uiga i le Togiola a le Faaola o loo ta’ua atoa i le Tusi a Mamona. A o ou lisiina atu nisi o nei upumoni, ou te valaaulia outou ia mafaufau i le auala ua suia ai pe mafai foi ona suia ai lou olaga.

O le Togiola a Iesu Keriso o se meaalofa fua ua ofo mai i tagata uma o ē ua soifua mai, o ē o loo soifua i le taimi nei, ma ē o le a soifua mai i le lalolagi.⁵
E faaopoopo atu i le tauaveina o a tatou agasala, na ave ai e Keriso i Ona lava luga o tatou faanoanoaga, vaivaiga, puapuaga, ma’i, faapea ai ma mafatiaga uma e tupu i tulaga faaletino o le tagata. E leai se mafatia, tiga, po o faanoanoaga Na te le’i mafatia ai mo i tatou.⁶
O le taulaga togiola a le Faaola ua mafai ai ona tatou manumalo i taunuuga lē lelei o le Pa’ū o Atamu, e i ai le oti faaletino. Ona o Keriso, o fanau uma a le Atua e fananau mai i lenei lalolagi, po o le a lo latou amiotonu, o le a oo i le toefaatasia o o latou agaga ma tino e ala i le mana o le Toetutu⁷ ma toe foi atu ia te Ia ina “ia faamasinoina … e tusa ma a [latou] galuega.”⁸
I se faatusatusaga, o le mauaina o faamanuiaga atoatoa o le Togiola a le Faaola ua i ai tuutuuga i lo tatou filiga⁹ i le ola ai i le “mataupu faavae a Keriso.”¹⁰ I lana miti, sa vaai ai Liae i le “ala lauitiiti ma le vaapiapi”¹¹ lea e tau atu i le laau o le ola. O ona fua, lea ua faatusa i le alofa o le Atua e pei ona faailoaina e ala i faamanuiaga maoae o le Togiola a Keriso, “ua silisili ona pele ma silisili ona manaomia … [ma] o le aupito silisili lea o meaalofa uma a le Atua.”¹² Ina ia mafai ona maua o lenei fua, e tatau ona tatou faatinoina le faatuatua ia Iesu Keriso, salamo, “faalogo i le afioga a le Atua,”¹³ maua sauniga taua, ma tausia feagaiga paia seia oo i le iuga o o tatou olaga.¹⁴
E ala i Lana Togiola, e le gata e faamama ese e Iesu Keriso a tatou agasala, ae ua Ia saunia foi le mana gafatia lea e mafai ai e Ona soo ona “[tuu ese] le tagata natura,”¹⁵ alualu i luma “[i] lea fuaitau i luga o lea fuaitau,”¹⁶ ma faateleina i le paia¹⁷ ina ia i ai se aso e mafai ai ona latou avea ma tagata atoatoa i fofoga o Keriso,¹⁸ agavaa e toe ola faatasi ma le Atua¹⁹ ma maua faamanuiaga uma o le malo o le lagi.²⁰

O le isi upumoni faamafanafana o loo i ai i le Tusi a Mamona e faapea, e ui e lē mafuatia ma e mo tagata uma, ae o le Togiola a le Alii o se meaalofa e ofoofogia le patino ma e faaletagata lava ia, ua talafeagai ia i tatou patino taitoatasi.²¹ E pei lava ona valaaulia e Iesu soo taitoatasi o sa Nifae ia tagotago i Ona manu’a, sa Ia maliu mo i tatou taitoatasi, patino, e peisea’i na o oe po o a’u le tagata na i ai i le lalolagi. Ua Ia tuuina mai ia i tatou se valaaulia patino ia o mai ia te Ia ma utuvai mai faamanuiaga ofoofogia o Lana Togiola.²²

O le natura patino o le Togiola a Keriso e faasolo ina moni atili a o tatou mafaufau i faataitaiga o alii ma tamaitai ofoofogia i le Tusi a Mamona. E aofia ai ia i latou ia Enosa, Alema, Seseroma, Tupu o Lamonae ma lona toalua, ma le nuu o le Tupu o Peniamina. O a latou tala o le liuaina ma molimau totoa ua maua ai se molimau ola o le auala e mafai ona suia ai o tatou loto ma liua ai o tatou olaga e ala i le lelei ma le alofa mutimutivale lē mafuatia o le Alii.²³

Sa fesili atu le perofeta o Alema i lona nuu i lenei fesili vailiili Na ia fai atu: “Afai ua oo ia te outou se liuga o le loto, ma afai ua outou lagona le fia pepese i le pese o le alofa togiola, ou te fia fesili atu, e mafai ea ona outou lagonaina nei²⁴ O lenei fesili e taua tele i le asō, ona i le avea ai ma soo o le Alii, e tatau ona faafeaoina i tatou e Lona mana togiola, uunaia i tatou, ma suia i tatou i aso uma taitasi.

O le fesili a Alema e mafai foi ona toefaaupuina e fesili ai: o anafea le taimi mulimuli na e lagonaina ai le faatosinaga matagofie o le Togiola a le Faaola i lou olaga? E tupu lenei mea pe a e lagonaina se olioli “logolelei ma suamalie”²⁵ e oo mai ia te oe ma molimau atu i lou agaga ua faamagaloina au agasala; pe o ni tofotofoga tiga ua faafuasei ona māmā le tauaveina; pe ua faamalūlūina foi lou loto ma ua mafai ona e faailoa atu le faamagaloga i se tasi na faatiga ia te oe. Pe atonu foi e te matauina i taimi taitasi le faateleina o lou gafatia e alofa ma auauna atu ai i isi, pe o loo faia e le faagasologa o le faapaiaga oe o se tagata ese, ua mamanuina i le faataitaiga a le Faaola.²⁶

Ou te molimau atu o nei aafiaga uma e moni ma o ni faamaoniga o olaga e mafai ona suia e ala i le faatuatua ia Iesu Keriso ma Lana Togiola. Ua faamanino e le Tusi a Mamona ma faalauteleina lo tatou iloa e uiga i lenei meaalofa paia. Pe a outou suesueina lenei tusi, o le a outou faalogo i le siufofoga o le Keriso soifua o valaauliaina outou ia o mai ia te Ia. Ou te folafola atu afai e te taliaina lenei valaaulia ma mamanu lou olaga i Lana faataitaiga, o le a oo mai Lana faatosinaga togiola i lou olaga. E ala i le mana o le Agaga Paia, o le a liua ai e le Faaola oe i lea aso ma lea aso “seia oo i le aso e atoatoa ai”²⁷ e pei ona Ia tautino mai, o le a e “vaai i o’u mata ma iloa o i ai A’u.”²⁸ I le suafa o Iesu Keriso, amene.