“Ia Fausia Lenei Fale mo Lo’u Igoa”
(Mataupu Faavae ma Feagaiga 124:40)
O feagaiga e mauaina ma sauniga e faatinoina i totonu o malumalu e taua i le faapaiaina o o tatou loto ma mo le faaeaga mulimuli o atalii ma ni afafine o le Atua.
I le Vao Paia i le 200 tausaga talu ai, sa vaai ai ma talanoa le taulealea o Iosefa Samita i le Atua, le Tama Faavavau, ma Lona Alo, o Iesu Keriso. Mai ia i La’ua, sa aoao ai Iosefa e uiga i le natura moni o le Aiga Atua faapea ai ma faaaliga faifai pea ina ua amatalia e lenei faaaliga faalelagi i aso e gata ai le “tisipenisione o le atoaga o taimi.”1
Pe tusa ma le tolu tausaga mulimuli ane, i le tali mai i se tatalo naunautai i le afiafi o le aso 21 o Setema, 1823, na faatumulia ai le potumoe o Iosefa i le malamalama seia oo ina “sili atu le malamalama o le potu nai lo le aoauli.”2 Sa tu atu se tagata i autafa o lona moega, ma ta’u le taulealea i lona igoa ma ta’u atu “o ia o se avefeau na auina mai mai le Atua … ma o lona igoa o Moronae.”3 Sa ia aoaoina Iosefa e uiga i le oo mai o le Tusi a Mamona.
Ona sii mai lea e Moronae o se mau mai le tusi a Malaki i le Feagaiga Tuai, e fai si eseesega laitiiti i le gagana o loo faaaogaina i le King James Version:
“Faauta, o le a Ou faaali atu ia te outou le Perisitua, e ala i le lima o Elia le perofeta, ae lei oo i le oo mai o le aso tele ma le matautia o le Alii. …
“Ma o le a ia totoina i loto o fanau folafolaga na faia i tamā, ma o le a liliu atu loto o fanau i o latou tamā. Afai e lē faapea, o le a faaumatia atoa le lalolagi i lona afio mai.”4
O le mea taua, o faatonuga a Moronae ia Iosefa Samita e uiga i le misiona a Elia na amatalia ai galuega faalemalumalu ma talafaasolopito o aiga i aso e gata ai ma o se elemene autu i le toefuataiina mai “o mea uma, ua fetalaia mai e le Atua i fofoga o ana perofeta paia uma lava talu mai anamua.”5
Ou te tatalo mo le fesoasoaniga a le Agaga Paia a o tatou a’oa’o faatasi e uiga i feagaiga, sauniga, ma faamanuiaga o loo avanoa mo i tatou i totonu o malumalu o Le Ekalesia a Iesu Keriso o le Au Paia o Aso e Gata Ai.
O Le Toe Foi mai o Elia
Ou te amata i le fesili atu i se fesili taua: aisea na taua ai le toe foi mai o Elia?
“Ua tatou aoao mai i faaaliga o aso e gata ai o Elia na umiaina le mana o faamauga o le Perisitua Mekisateko”6 ma o le perofeta mulimuli lea na ia faia lea mea a o le’i oo atu i le taimi o Iesu Keriso.”7
Sa faamalamalama mai e le Perofeta o Iosefa Samita: “O le agaga, mana, ma le valaauga o Elia o le i ai ia te oe o le mana e umia ai ki o le … atoatoaga o le Perisitua Mekisateko … ; ma ia … maua … sauniga uma lava o le malo o le Atua, e oo lava i le faaliliuina o loto o tama i fanau, ma loto o fanau i tama, e oo lava ia i latou o e o loo i le lagi.”8
O lenei pule paia o faamauga e taua [aua] “o soo se mea e te faamauina i le lalolagi, o le a faamauina foi lea i le lagi; ma o soo se mea e te tālā i le lalolagi, o le a tatalaina foi lea i le lagi.”9
Sa faamanino atili mai e Iosefa: “E faapefea ona afio mai le Atua e laveaiina lenei tupulaga? O le a Ia auina mai Elia le perofeta. … O le a faaalia mai e Elia feagaiga e faamauina ai loto o tama i fanau, ma le fanau i tama.”10
Sa faaali atu Elia ma Mose i luga o le Mauga o Liua ma faaee atu lenei pule i luga o Peteru, Iakopo, ma Ioane.11 Sa toe faaali atu foi Elia ma Mose ma Elaia i le aso 3 o Aperila, 1836, i le Malumalu o Katelani ma faaee atu ia lava ki e tasi o le perisitua i luga o Iosefa Samita ma Oliva Kaotui.12
O le toefuataiga e Elia o le pule mo faamauga i le 1836 sa tatau ai ina ia saunia le lalolagi mo le Afio Mai Faalua o le Faaola ma amatalia ai se naunau faateleina i le lalolagi atoa i suesuega o talafaasolopito o aiga.
Suiina, Liliuina, ma le Faamamaina o Loto
O le upu loto e silia ma le faa-1000 ona faaaogaina i tusitusiga faavae. O lenei upu faigofie ae taua e tele ina faasino atu i lagona o’oo’o o se tagata. O o tatou loto—o le aofaiga atoa lea o o tatou manaoga, alofa, faamoemoega, faanaunautaiga, ma uiga—ua faauigaina ai po o ai i tatou ma iloa ai tagata o le a avea ai i tatou. Ma o le ute o le galuega a le Alii o loo suiina, liliuina, ma faamamaina loto e ala i feagaiga o le talalelei ma sauniga o le perisitua.
Tatou te le o fausiaina pe ulufale atu i malumalu paia e tau na ona maua ai se aafiaga faaletagata lava ia pe faaleaiga e manatua pea. Ae, o feagaiga e mauaina ma sauniga e faatinoina i totonu o malumalu e taua i le faapaiaina o o tatou loto ma mo le faaeaga mulimuli o atalii ma ni afafine o le Atua.
O le totoina i loto o fanau o folafolaga na faia i tama—e oo lava ia Aperaamo, Isaako, ma Iakopo—liliuina o loto o fanau i o latou lava tama, faatautaiga o sailiga o talafaasolopito o aiga, ma le faatinoina o sauniga sui o le malumalu, o galuega ia e manuia ai tagata taitoatasi i itu uma e lua o le veli. A o tatou auai ma le naunautai i lenei galuega paia, ua tatou usitai i poloaiga ia alolofa atu ma auauna atu i le Atua ma o tatou tuaoi.13 Ma o lea auaunaga lē manatu faapito ua fesoasoani moni ia i tatou ia “Faalogo ia te Ia!”14 ma o mai i le Faaola.15
O feagaiga ma sauniga o le perisitua sili ona paia ua na o totonu o se malumalu e maua ai—le maota o le Alii. O mea uma e aoaoina ma mea uma e faia i totonu o le malumalu ua faamamafa mai ai le paia o Iesu Keriso ma Lana matafaioi i le fuafuaga sili o le fiafia a le Tama Faalelagi.
Mai Totonu i Fafo
Sa faamatala mai e Peresitene Ezra Taft Benson se mamanu taua e faaaogaina e le Togiola i le aumaia o le “tino ola pea ma le ola faavavau o le tagata.”16 Sa ia saunoa: “E galue le Alii mai totonu i fafo. E galue le lalolagi mai fafo i totonu. E ave ese e le lalolagi tagata mai tulaga eleelea. E ave ese e Keriso tulaga eleelea mai tagata, ona latou ave ese ai lea o i latou mai tulaga eleelea. E suia e le lalolagi tagata e ala i le suia o lo latou siosiomaga. E suia e Keriso tagata ona latou suia ai lea o lo latou siosiomaga. E sui e le lalolagi amioga faaletagata, ae e mafai e Keriso ona suia uiga faaletagata.”17
O feagaiga ma sauniga o le perisitua e totonugalemu i le faagasologa faifai pea o le toefanauina ma suiga faaleagaga; o auala foi ia e galue ai le Alii ia i tatou taitoatasi mai totonu i fafo. O feagaiga e faamamaluina ma le mausali, e manatua pea i taimi uma, ma tusia i “le Agaga o le Atua soifua … i papatusi aano o le loto”18 ua maua ai le faamoemoega ma le faamautinoaga o faamanuiaga i le olaga faaletino ma mo le faavavau. O sauniga e taliaina ma le agavaa ma manatuaina e le aunoa, e tatala ai auala faalelagi e mafai ai ona tafe mai le mana o le amio atua i o tatou olaga.
Tatou te le o mai i le malumalu e lalafi ai pe sosola ese ai mai mea leaga o le lalolagi. Ae, tatou te o mai i le malumalu e faatoilalo le lalolagi o mea leaga. Pe a tatou valaaulia i o tatou olaga le “mana o le faale-atua”19 e ala i le mauaina o sauniga o le perisitua ma osia ma tausia feagaiga, e faamanuiaina i tatou i le malosi e sili atu i lo tatou lava malosi20 e manumalo ai i faaosoosoga ma luitau o le olaga faaletino ma ia faia le lelei ma ia lelei.
O Le A Salalau Atu le Taʼutaʼua o Lenei Fale
O le uluai malumalu o lenei tisipenisione sa fausiaina i Katelani, Ohaio ma sa faapaiaina i le aso 27 o Mati, 1836.
I se faaaliga i le Perofeta o Iosefa Samita i le mavae ai o le vaiaso talu ona faapaiaina, na tautino mai ai le Alii:
“Ia olioli loto o lo’u nuu uma, o e na latou fausia lenei fale i lo’u igoa, ma lo latou malosi. …
“Ioe o le a matua olioli tele lava loto o afe ma sefulu o afe ona o faamanuiaga o le a sasaa atu, ma le faaeega ua faaeeina ai aʼu auauna i lenei fale.
“Ma o le a salalau atu le taʼutaʼua o lenei fale i atunuu ese; ma o le amataga lenei o le faamanuiaga o le a sasaa mai i luga o ulu o loʼu nuu.”21
Faamolemole ia matau fasifuaitau o le a matua olioli tele lava loto o afe ma sefulu o afe ma o le a salalau atu le taʼutaʼua o lenei fale i atunuu ese. O ni tautinoga ofoofogia nei ia Aperila o le 1836, i le taimi sa na o ni nai tagata toalaiti lava ma le malumalu e tasi a le Ekalesia.
O le asō i le 2020, e 168 a tatou malumalu o loo faaaogaina. E fasefulu-iva ni malumalu faaopoopo o loo fausiaina pe ua faasilasila mai. O maota o le Alii ua fausiaina i luga o “motu o le sami”22 ma i atunuu ma nofoaga sa manatu muamua i ai le toatele e le mafai ona i ai se malumalu.
O le sauniga o le faaeega paia o loo tuuina atu i le taimi nei i gagana e 88 ma o le a maua i le tele o gagana faaopoopo a o fausiaina malumalu e faamanuia ai le toatele o fanau a le Atua. I le isi 15 tausaga e sosoo ai, o le aofai o gagana o le a maua ai sauniga o le malumalu e foliga mai o le a faaluaina.
O lenei tausaga o le a tatou suatiaina eleele ma amatalia le fausiaina o malumalu e 18. I se faatusatusaga, e 150 tausaga na fausia ai uluai malumalu e 18, mai le faatuina o le Ekalesia i le 1830 i le faapaiaga o le Malumalu o Tokyo Iapani e Peresitene Spencer W. Kimball i le 1980.
Mafaufau i le faanatinatiina o le galuega faalemalumalu ua tupu i le gasologa o le soifuaga o Peresitene Russell M. Nelson. Ina ua soifua mai Peresitene Nelson i le aso 9 o Setema, 1924, sa na o le ono malumalu na i ai i le Ekalesia.
Ina ua faauuina o ia o se Aposetolo i le aso 7 o Aperila, 1984, 60 tausaga mulimuli ane, sa 26 malumalu na faagaoioia, o se faatelega e 20 malumalu i totonu o le 60 tausaga.
Ina ua lagolagoina Peresitene Nelson o le Peresitene o le Ekalesia, e 159 malumalu na faagaoioia, o se faatelega e 133 malumalu i totonu o le 34 tausaga i le taimi na auauna ai o se uso o le Korama a le Toasefululua.
Talu ona avea ma Peresitene o le Ekalesia i le aso 14 o Ianuari 2018, ua faasilasila mai ai e Peresitene Nelson malumalu fou e 35.
E ivasefulu-ono pasene malumalu o i ai nei na faapaiaina i le gasologa o le soifuaga o Peresitene Nelson; e 84 pasene ua faapaiaina talu ona faauuina o ia o se Aposetolo.
Ia Taulai Atu Pea i Mea E Sili Ona Taua
I le avea ai ma tagata o le Ekalesia toefuataiina a le Alii, tatou te tutu ai ma ofo i le saoasaoa-faataalise o Lana galuega i aso e gata ia. Ma e tele isi malumalu o loo agai mai.
Na valoia e Polika Iaga, “Ina ia faataunuuina lenei galuega, o lea o le a le na o le tasi ai le malumalu ae o le a faitau afe, ma o le a faitau fiaselau afe alii ma tamaitai o le a o atu i ai i totonu o na malumalu, ma faia sauniga mo tagata, o e na soifua ai, e tau atu i le taimi o le a faaalia mai e le Alii.”23
Ua malamalama lava, o le faasilasilaga o malumalu fou taitasi o se puna o le olioli tele ma se mafuaaga e avatu ai le faafetai i le Alii. Peitai, o lo tatou taulaiga autu e tatau ona tuu i feagaiga ma sauniga ia e mafai ona suia ai o tatou loto ma faalolotoina ai lo tatou tuuto atu i le Faaola ma ia le tau na ona taulai atu i le nofoaga po o le matagofie o le maota.
O matafaioi autu o loo taoto i luga o i tatou o tagata o le Ekalesia toefuataiina a le Alii e (1) ia “Faalogo ia te Ia!”24 ma ia suia o tatou lava loto e ala i feagaiga ma sauniga, ma le (2) ia faataunuu ma le olioli le tiutetauave na tofia mai le lagi e ofo atu faamanuiaga o le malumalu i le aiga atoa o tagata i itu uma e lua o le veli. Faatasi ma le taitaiga ma le fesoasoani a le Alii, o le a tatou faataunuu moni ai nei tiute paia.
O Le Fausiaina o Siona
Ua folafola mai e le Perofeta o Iosefa Samita:
“O le fausiaina o Siona o se galuega ua naunau i ai le nuu o le Atua i vaitausaga uma; o se autu sa nopia’i ai perofeta, faitaulaga ma tupu ma le fiafia tulaga ese; sa o latou sagisagi atu ma le naunauga fiafia i le aso tatou te ola ai; ma faasasao atu ai ma naunauga faalelagi ma le olioli sa latou pepese ai ma tusia ma valoia o tatou aso; peitai sa latou maliliu e aunoa ma le vaai i ai; … ua tuua mo i tatou e vaai i ai, auai i le faatinoga ma fesoasoani e faataavale i luma le mamalu o Aso e Gata Ai.”25
“O le Perisitua i le lagi o le a faatasia ma le perisitua o i le lalolagi, e faataunuuina ai na mafuaaga maoae; … o se galuega na manatunatu loloto i ai le Atua ma agelu ma le fiafia mo tupulaga ua mavae; na uunaia agaga o peteriaka ma perofeta anamua; o se galuega ua faamoemoe e aumaia le faaumatiaina o mana o le pouliuli, le faafouina o le lalolagi, le mamalu o le Atua, ma le faaolataga o le auaiga o tagata soifua.”26
Ou te molimau atu ma le faamaoni na faaali atu le Tama ma le Alo ia Iosefa Samita, ma na toefuatai mai e Elia le pule o faamauga. O feagaiga ma sauniga paia o le malumalu e mafai ona faamalosia ai i tatou ma faamama ai o tatou loto pe a tatou “Faalogo ia te Ia!”27 ma maua le mana o le faale-atua i o tatou olaga. Ma ou te molimau atu o lenei galuega o aso e gata ai o le a faaumatiaina mana o le pouliuli ma aumaia le faaolataga o le auaiga o tagata soifua. Ou te molimau atu ai ma le fiafia i nei upumoni i le suafa paia o le Alii o Iesu Keriso, amene.