Mea na Faamamafa mai mai le Konafesi Aoao Faaletausaga Lona 190

Sa i ai ia Peresitene Russell M. Nelson se savali manino i le konafesi aoao: “Faalogo ia te Ia.”

“E ao ona tatou saili atu, i ala uma tatou te mafaia, e faalogo ai ia Iesu Keriso, o lē e fetalai mai ia i tatou e ala i le mana ma le auaunaga a le Agaga Paia,” na aoao mai ai Peresitene Nelson.

“O le faamoemoega o lenei konafesi ma konafesi aoao uma o le fesoasoani lea ia i tatou ia faalogo ia te Ia” (itulau 7).

I se konafesi na taulai atu i le Uluai Faaaliga ma le Toefuataiga, sa aoaoina ai i tatou e mafai ona tatou faalogo ia te Ia, e faapei foi ona sa faia e Iosefa Samita i le Vao Paia. I le siomia ai e aafiaga o se faama’i oti i le lalolagi atoa ua aafia ai le fia miliona, sa aoaoina ai i tatou e faalogo ia te Ia mo se faasinoala i o tatou mafatiaga. O le vaavaai agai atu i se lumanai susulu mo le Ekalesia ma i tatou taitoatasi, sa aoaoina ai i tatou ia toefaafou a tatou taumafaiga e faalogo ia te Ia ma mulimuli ia te Ia.

“O vaega e tele o lenei koanfesi aoao ia Aperila 2020,” na saunoa ai Peresitene Nelson, “… e mafai ona aoteleina i upu paia faapoloaiga se fa: ‘Faalogo ia te Ia.’ Matou te tatalo mo la outou taulaiga i le Tama Faalelagi, o lē na fetalaia mai na upu, ma i Lona Alo Pele, o Iesu Keriso, ia avea ma mea sili ona taua e manatua pea mai mea uma na tutupu.”

A o e suesue i savali o lenei konafesi, saili “ia faalogo, uai atu, usitaia afioga a le Faaola,” o le a e iloaina ua faataunuuina folafolaga a le perofeta i lou olaga “o le faaitiitia o le fefe ma le faateleina o le faatuatua” (itulau 114).

• Ua folasia mai e Peresitene Nelson se faailoga fou mo le Ekalesia i le itulau 73.

• Ua folasia mai e Peresitene Nelson se folafolaga e uiga i le Toefuataiga i le itulau 91.

• Ua taitai e Peresitene Nelson se potopotoga paia i le itulau 92.

• Ua fofogaina mai e Peresitene Nelson ni malumalu fou se valu i le itulau 115.

• Aoao atili i le auala e mafai ai ona tatou fesoasoani i isi e #HearHim i le HearHim.ChurchofJesusChrist.org.

O Ata o le Lomiga Lenei

Ua matou taumafai e faapepa konafesi taitasi e ala i ata matou te lolomiina. E ui ina tulagaese konafesi taitasi, o ata o lenei lomiga o loo atagia ai nisi o tulaga e le masani ai na tuuina mai i lenei konafesi

E le gata i ata mai le faasalaluga, ae o le a e mauaina foi atapue mai le Lotoa matagofie o le Malumalu (e ui e le masani ona gaogao ona o le KOVITI-19 ma le galuega o le fauga), faapea foi ma atavali e faiā ma le Toefuataiga o le talalelei ma atapue na auina mai e tagata o le au paia o i latou lava o loo auai ai i le konafesi i le salafa o le lalolagi.