Lipoti a le Matagaluega Suetusi a le Ekalesia, 2019
I Le Au Peresitene Sili o Le Ekalesia a Iesu Keriso o le Au Paia o Aso e Gata Ai
Uso Pele: E pei ona faatonuina ai i le faaaliga o loo tusia i le vaega e 120 o le Mataupu Faavae ma Feagaiga, o le Aufono e Faafoeina ia Sefuluai—lea e aofia ai le Au Peresitene Sili, o le Korama a Aposetolo e Toasefululua, ma le Au Epikopo Pulefaamalumalu—e faatagaina tupe faaalu o tupe a le Ekalesia. E faaaogaina e totino o le Ekalesia tupe ia ogatusa ma paketi, aiaiga faavae, ma faiga faavae ua faamaoniaina e le Ekalesia.
O le Matagaluega Suetusi a le Ekalesia, lea e aofia ai ni tamalii faapolofesa ma e tutoatasi lava mai isi matagaluega uma ma totino a le Ekalesia, ua i ai le tiutetauave e faatino ai suegatusi mo le faamoemoega o le tuuina atu o le faamautinoaga talafeagai e tusa ai ma saofaga na tauaaoina, o tupe na faaalu, ma le malupuipuia o aseta a le Ekalesia.
E tusa ai ma suegatusi ua faatinoina, ua manatu ai le Matagaluega Suetusi a le Ekalesia e faapea, i tulaga uma o meatotino, o saofaga na mauaina, o tupe na faaaluina, ma aseta a le Ekalesia mo le tausaga 2019 ua faamaumauina ma faatautaia e tusa ma paketi, o aiaiga faavae, ma faiga masani faatausitusi ua faamaoniaina e le Ekalesia. O loo mulimulitaia e le Ekalesia ia faiga masani o loo aoaoina atu i ona tagata o le ola lea i se paketi, aloese mai le nofoaitalafu, ma le sefeina o ni tupe mo le taimi e manaomia ai.
E tuuina atu ma le faaaloalo lava,
Matagaluega Suetusi a le Ekalesia
Kevin R. Jergensen
Pule Faatonusili