O Le Fuafuaga Sili
O i tatou ua iloaina le fuafuaga a le Atua ma o ē ua osifeagaiga e auai ai, ua i ai se tiutetauave manino e a’oa’o atu nei upumoni.
E ui lava i le lotolotoi o tofotofoga ma luitau tulagaese, ae ua faamanuiaina moni lava i tatou! O lenei konafesi aoao ua aumaia ia i tatou le anoanoai o oa ma le olioli o le Toefuataiga o le talalelei a Iesu Keriso. Ua tatou olioli i le faaaliga a le Tamā ma le Alo lea na amatalia ai le Toefuataiga. Ua faamanatu mai foi ia i tatou le oo mai faavavega o le Tusi a Mamona, o lona faamoemoega autu o le molimau mai lea ia Iesu Keriso ma Lana mataupu faavae. Ua faafouina i tatou i le moni faafiafiaina o faaaliga—i perofeta ma ia i tatou taitoatasi. Ua tatou faalogo i molimau taua o le Togiola le i’u a Iesu Keriso ma Lona Toetu moni mai. Ma ua a’oa’oina i tatou i isi upumoni o le atoatoaga o Lana talalelei na faaali mai ia Iosefa Samita ina ua uma ona tautino mai e le Atua le Tama i lena perofeta fou faato’a valaauina: “O Lo’u Atalii Pele lenei. Faalogo ia te Ia!(Iosefa Samita—Talafaasolopito 1:17).
Ua faamautu i lo tatou malamalama e uiga i le toefuataiga o le perisitua ma ona ki. Ua toefaafouina i tatou i lo tatou naunautaiga ia faalauiloa le Ekalesia toefuataiina a le Alii i lona igoa e tatau ai, O Le Ekalesia a Iesu Keriso o le Au Paia o Aso e Gata Ai. Ma ua valaauliaina i tatou ia auai i anapogi ma tatalo ia faaitiitia ai aafiaga o le taimi nei ma le lumanai mai se faamai faataumaoi ua pipisi i le lalolagi atoa. Na musuia i tatou i lenei taeao e le perofeta soifua a le Alii i lona fofogaina o se folafolaga faasolopito o le Toefuataiga. Matou te faamautu atu lea tautinoga e faapea “O i latou e su’esu’e ma le agaga tatalo i le sāvali o le Toefuata’iga ma galulue i le faatuatua o le a faamanuiaina e maua ā latou lava molimau e uiga i lona pa’ia ma lona faamoemoega e saunia le lalolagi mo le Afio Mai Faalua o lo tatou Alii ma le Faaola, o Iesu Keriso, ua folafola mai.”1
O Le Fuafuaga
O nei mea uma o se vaega o se fuafuaga paia lea e i ai lona faamoemoega ina ia mafai e fanau a le Atua ona faaeaina ma avea e pei o Ia. O loo faasino i ai tusitusiga paia o le “fuafuaga tele o le fiafia,” “o le fuafuaga o le togiolaina,” ma “o le fuafuaga … o le olataga” (Alema 42:8, 11, 5), o lena fuafuaga—ua faaalia i le Toefuataiga—na amata i se Fono i le Lagi. I le avea ai ma ni agaga, sa tatou mananao ai ia ausia le ola e faavavau o loo olioli ai o tatou matua faalelagi. I lena taimi sa tatou alualu i luma i le mea na gata ai lo tatou mafai e aunoa ma se olaga faaletino i se tino faitino. Ina ia maua lena aafiaga, na fuafua ai le Atua le Tama e foafoa lenei lalolagi. I le olaga faaletino na fuafuaina, o le a tatou eleelea ai i le agasala a o tatou feagai ai ma mea faafeagai e manaomia mo lo tatou tuputupu a’e faaleagaga. O le a noatia foi i tatou i le oti faaletino. Ina ia toe faaola mai i tatou mai le oti ma le agasala, o le a saunia ai e lo tatou Tamā Faalelagi se Faaola. O Lona Toetu o le a togiola ai tagata uma mai le oti, ma o Lana taulaga togiola o le a totogi ai le tau e manaomia mo tagata uma ina ia faamamaina ai mai agasala e tusa ma tuutuuga ua faatuina e siitia ai lo tatou tuputupu a’e. O lenei Togiola a Iesu Keriso e totonugalemu i le fuafuaga a le Tama.
I le Fono i le Lagi, sa folasia atu ai i fanau agaga uma a le Atua le fuafuaga a le Atua, e aofia ai ona taunuuga faaletino ma tofotofoga, o ana fesoasoaniga faalelagi, ma lona taunuuga mamalu. Na tatou vaaia le i’uga mai le amataga. O tagata soifua lē mafaitaulia ua fananau mai i lenei lalolagi na filifilia le fuafuaga a le Tama ma tau mo lea fuafuaga i le taua i le lagi na sosoo ai. E toatele foi na osia ni feagaiga ma le Tama e faatatau i mea o le a latou faia i le olaga faitino. I ni auala e le’i faaalia maia, na faatosinaina ai e a tatou amioga i le lalolagi o agaga o tatou tulaga i le olaga nei.
Olaga Faitino ma le Lalolagi o Agaga
O le a ou aoteleina nei nisi o elemene autu o le fuafuaga a le Tama, ona e aafia ai i tatou i la tatou malaga faaletino ma i le lalolagi o agaga e sosoo ai.
O le faamoemoega o le olaga faitino ma le tuputupu a’e e mafai ona sosoo ai pe a mavae lenei olaga e mo fanau a le Atua ia avea e pei o Ia. O le finagalo lea o le Tama Faalelagi mo Ana fanau uma. Ina ia ausia lenei taunuuga olioli, ua manaomia ai e tulafono e faavavau i tatou ia tatau ona avea ma ni tagata ua faamamaina e ala i le Togiola a Iesu Keriso ina ia mafai ai ona tatou nonofo i le afioaga o le Tama ma le Alo ma olioli i faamanuiaga o le faaeaga. E pei ona a’oa’o mai le Tusi a Mamona, ua Ia valaaulia “i latou uma ia o mai ia te Ia ma taumamafa i lona agalelei; ma e le teena e ia se tasi e sau ia te ia, e uliuli pe paepae, e pologa pe saoloto, o tane ma fafine; ma e manatua e ia le ua faapaupau; ma ua tutusa tagata uma i le Atua” (2 Nifae 26:33; tagai foi i le Alema 5:49).
O le fuafuaga paia mo i tatou o le avea lea ma tagata ua faamoemoeina e avea ai e manaomia ai lo tatou faia o filifiliga ia tetee atu i mea faafeagai a le tiapolo ia e faaosoosoina tagata soifua ia faia amioga e feteenai ma poloaiga a le Atua ma Lana fuafuaga. O loo manaomia ai foi le noatia o i tatou i isi mea faafeagai faaletino e pei o mea e oo mai agasala a isi pe mai nisi o tulaga lē atoatoa o le fanau mai. O nisi taimi o lo tatou tuputupu a’e manaomia e ausiaina lelei e ala i puapuaga ma mafatiaga nai lo le mafanafana ma le toafimalie. Ma e leai ma se tasi o nei mea faafeagai faaletino e mafai ona ausia ona faamoemoega e faavavau pe afai e aumai e suiga a le lagi le toomaga ia i tatou mai taunuuga uma lē lelei o le olaga faitino.
Ua faaalia i le fuafuaga lo tatou taunuuga i le ola e faavavau, o faamoemoega ma tuutuuga o la tatou malaga i le olaga faitino, atoa ai ma fesoasoaniga a le lagi o le a tatou mauaina. O poloaiga a le Atua ua lapatai ai i tatou e faasaga i le o ese atu ma ō i tulaga lamatia. O aoaoga a taitai musuia e taiala ai lo tatou ala ma maua ai faamautinoaga ia e siitia ai la tatou malaga e faavavau.
Ua aumai e le fuafuaga a le Atua ia i tatou ni faamautinoaga se fa e lagolago ai la tatou malaga i le olaga faitino. Ua aumai uma ia i tatou e ala mai i le Togiola a Iesu Keriso, o le totonugalemu o le fuafuaga. O le mea muamua ua faamautinoa mai ia i tatou e faapea, e ala i Ona puapuaga mo agasala ia tatou te salamoina, e mafai ai ona faamamaina i tatou mai na agasala. Ona oo lea i le faamasinoga alofa mutimutivale mulimuli o le a “le toe manatuaina lava i latou” (Matatupu Faavae ma Feagaiga 58:42).
Lua, o se vaega o le Togiola a lo tatou Faaola, na Ia avea ai i Ona luga isi uma vaivaiga faaletino. Ua faatagaina ai e lenei mea i tatou ia maua le malosi e lavātia ai avega lē ma’alofiaina o le olaga faitino, avega faaletagata lava ia ma lautele, e pei o taua ma faama’i. Ua aumai e le Tusi a Mamona le tatou faamatalaga sili ona manino faatusitusiga paia e uiga i lenei mana taua o le Togiola. Na ave e le Faaola i Ona luga “tiga ma ma’i [ma vaivaiga] o lona nuu. … O le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino, le ala e fesoasoani ai i ona tagata e tusa ma o latou vaivaiga” (Alema 7:11–12).
Tolu, o le Faaola, e ala i Lana Togiola le i’u, na aveesea ai tuutuuga o le mutaaga o le oti ma aumai ia i tatou le faamautinoaga olioli o le a toetutu i tatou uma. Ua a’oa’o mai le Tusi a Mamona, “O lenei toefuataiga o le a oo mai i tagata uma, o e matutua ma e laiti, o e pologa ma e saoloto, o tane ma fafine, o e e amioleaga ma e e amiotonu; ma e oo lava i se lauulu e tasi o o latou ulu o le a lē toesea; ae o le a toefuataiina mea taitasi i lona tulaga atoatoa” (Alema 11:44).
Ua tatou faamanatuina le moni o le Toetu i lenei vaitau o le Eseta. Ua aumaia e lenei toetu le vaaiga ma le malosi e onosaia ai luitau o le olaga faaletino o loo feagai ma i tatou taitoatasi, ma i latou tatou te alolofa i ai, o mea e pei o tulaga lē atoatoa faaletino, faalemafaufau, pe faalelagona ia tatou te o mai ma i tatou ina ua fananau mai pe oo mai foi i le gasologa o le olaga faitino. Ona o le Toetu, ua tatou iloa ai o nei faaletonu faaletino ua na o se taimi lē tumau!
Ua faamautinoa mai e le talalelei toefuataiina ia i tatou o le Toetu e mafai ona aofia ai le avanoa e faatasi ai ma tagata o o tatou aiga—tane, ava, fanau, ma matua. O se faamalosi’auga mamana lea mo i tatou e faataunuu ai o tatou tiutetauave faaleaiga i lenei olaga faitino. E fesoasoani ia i tatou e ola faatasi ai i le alofa i lenei olaga i le tulimatai atu o le toetuufaatasiga fiafia ma fegalegaleaiga i le isi olaga.
Fa ma le mea mulimuli, ua a’oa’o i tatou e faaaliga o onapo nei o lo tatou alualu i luma e le manaomia ona muta i le i’uga o le olaga faaletino. E itiiti se mea ua faaali mai e uiga i lenei faamautinoaga taua. Ua ta’u mai ia i tatou o lenei olaga o le taimi lea e saunia ai e feiloai ai ma le Atua ma o lea e lē tatau ai ona faatuai lo tatou salamo (tagai i le Alema 34:32–33). Ae o loo a’oa’o pea i tatou e faapea i le lalolagi o agaga o loo tala’i ai le talalelei e oo lava i “e amioleaga ma lē usiusitai o e na teena le upumoni” (Mataupu Faavae ma Feagaiga 138:29) ma o i latou ua aoaoina iina ua mafai ona salamo a o lumanai ai le Faamasinoga Mulimuli (tagai i fuaiupu 31–34, 57–59).
O nisi nei o mea faavae o le fuafuaga a lo tatou Tama Faalelagi.
O le talalelei toefuataiina a Iesu Keriso ua tatou maua ai se vaaiga tulagaese i mataupu o le ola mama, faaipoipoga, ma le fanauina of fanau. Ua a’oa’o mai o le faaipoipoga e tusa ma le fuafuaga a le Atua e manaomia mo le faataunuuina o le faamoemoega o le fuafuaga a le Atua, e tuu mai ai le faatulagaga ua tofia mai le lagi mo le fanau mai faaletino, ma le sauniaina o tagata o le aiga mo le ola e faavavau. “O le faaipoipoga ua faauuina e le Atua mo le tagata,” sa fetalai ai le Alii, “ina ia mafai ona faataunuu e le lalolagi le faamoemoe o lona foafoaga” (Mataupu Faavae ma Feagaiga 49:15–16). I lenei fuafuaga, ioe, o Lana fuafuaga, ua fetaiai ma nisi o malosiaga malolosi faalelalolagi i le tulafono ma tumasani.
O le mana e foafoa ai le ola faaletino o le mana aupito sili lea ona faaeaina ua tuuina mai e le Atua i ana fanau. O lona faaaogaaga sa faatonuina mai i le poloaiga muamua, ae sa i ai se isi poloaiga taua sa tuuina mai e faasa ai lona faaaogaina sese. I fafo atu o noataga o le faaipoipoga, o le faaaogaina o le mana foafoa i auala uma lava, o ni faaaogaina sese ia ma agasala inosia o le uiga paia silisili o tane ma fafine. O le faamamafa ua tuu e le talalelei toefuataiina i luga o lenei tulafono o le ola mama, ona o le faamoemoega o o tatou mana foafoa i le faataunuuina o le fuafuaga a le Atua.
O Le A le Mea e Sosoo ai?
I lenei faamanatuga o lenei 200 tausaga o le Uluai Faaaliga lea na amatalia ai le Toefuataiga, ua tatou iloa ai le fuafuaga a le Alii ma ua uunaia i tatou e faamanuiaga o seneturi e lua e ala i Lana Ekalesia toefuataiina. I lenei tausaga o le 2020, ua tatou maua ai le mea ua ta’ua e foma’i o le vaaiga mamao 20/20 mo mea na tutupu i le tuanai.
Peitai, a o tatou vaai atu i le lumanai, ua fai si le manino o le tatou vaaiga mamao. Ua tatou iloa o seneturi e lua ua mavae o le Toefuataiga, ua i ai nei i le lalolagi o agaga le tele o tagata atamamai mai lenei olaga e faataunuu le tala’iga o loo faia iina. Ua tatou iloa foi ua tele nei ni a tatou malumalu e faatino ai sauniga o le faavavau mo i latou o e salamo ma taliaina le talalelei a le Alii i le isi itu o le veli o le oti. O nei mea uma ua faalautele ai le fuafuaga a le Tama Faalelagi. Ua tele na’ua le alofa o le Atua, na Ia saunia ai se taunuuga o le mamalu mo Ana fanau uma, vagana ai nisi toalaiti na loto lava e avea ma atalii o le malaia (tagai i le Mataupu Faavae ma Feagaiga 76:43).
Ua tatou iloa o le a toe afio mai le Faaola ma o le a i ai se meleniuma o le nofotupu filemu e faamaea ai le vaega faaletino o le fuafuaga le Atua. Ua tatou iloa foi o le a eseese toetutu, o e amiotonu ma e le amiotonu, faatasi ma le faamasinoga mulimuli o tagata taitoatasi e sosoo ma lona lava toetu mai.
O le a faamasinoina i tatou e tusa ma a tatou amioga, o manaoga o o tatou loto, ma le ituaiga o tagata ua tatou avea ai. O lenei faamasinoga o le a mafai ai e fanau uma a le Atua ona agai atu i se malo o le malumalu na agavaa ai i latou e tusa ma lo latou usiusitai ma le mea o le a latou toafimalie ai. O le faamasino o nei mea uma o lo tatou Faaola, o Iesu Keriso (tagai i le Ioane 5:22; 2 Nifae 9:41). O Lona silisili ese ua Ia maua ai se silafia atoatoa i a tatou amioga ma manaoga uma, e aofia uma ai ē lē salamo pe lē suia ma ē ua salamo po o ē amiotonu. O le mea lea, i le mavae ai o Lana faamasinoga o le a tatou ta’utino atu “ua tonu ana faamasinoga” (Mosaea 16:1).
I le faaiuga, ou te faasoa atu le talitonuga maumaututu na oo mai ia te a’u i le tele o tusi ma e ala i le iloiloina o le tele o talosaga ia toefoi mai i le Ekalesia i le mavae ai o le aveesega o igoa po o le liliuese. O le toatele o o tatou tagata o le Ekalesia e lē malamalama i lenei fuafuaga o le faaolataga, lea na te taliina le tele o fesili e uiga i aoaoga faavae ma aiaiga faavae musuia a le Ekalesia toefuataiina. O i tatou ua iloaina le fuafuaga a le Atua ma o ē ua osifeagaiga e auai ai, ua i ai se tiutetauave manino e a’oa’o atu nei upumoni ma faia mea uma tatou te mafaia e faalautele ai ia mea mo isi ma i o tatou lava tulaga i le olaga faaletino. Ou te molimau ia Iesu Keriso, lo tatou Faaola ma le Togiola, ua mafaia ai mea uma, i le suafa o Iesu Keriso, amene.