Faataunuuga o le Valoaga
O valoaga ua faataunuuina e ala i le Toefuataiga o le atoatoaga o le talalelei a Iesu Keriso, e tele.
O’u uso e ma tuafafine pele, ua faamamaluina lava a’u e lauga atu i lenei konafesi aoao iloga e faamanatuina ai le Uluai Faaaliga ia Iosefa Samita, o le Atua le Tama ma Lona Alo o Iesu Keriso, i le mea, e le fesiligia, o se Vao Paia. O lena faaaliga o se amataga ofoofogia i le Toefuataiga mai o le talalelei ma sa folasia mai ai mea uma, mai le Tusi a Mamona i le toefaafoi mai o le pule o le perisitua ma ki, o le faatulagaina o le Ekalesia moni a le Alii, o malumalu o le Atua, ma perofeta ma aposetolo o e o loo taitaia le galuega i nei aso e gata ai.
E ala i le mamanu mai luga, na valoia ai e perofeta anamua a le Atua, pe a uunaia ai e le Agaga Paia, le Toefuataiga ma mea o le a oo mai i o tatou taimi, o le toe tisipenisione ma le atoatoaga o taimi. O le galuega tonu lenei na “uunaia agaga” o uluai tagatavaai.1 I le gasologa o augatupulaga o taimi, sa latou muai ta’u maia, moemiti, ma vaaia faaaliga, ma valoia le lumanai o le malo o le Atua i le lalolagi, lea na ta’ua e Isaia “o se galuega ofoofogia ma le mea e ofo ai.”2
O valoaga ua faataunuuina e ala i le Toefuataiga o le atoatoaga o le talalelei a Iesu Keriso, e aofia ai Le Ekalesia a Iesu Keriso o le Au Paia o Aso e Gata Ai, e tele. Ae, i le asō, o le a ou faamamafaina ai na o ni nai mea e pele ia te a’u. O mea ia na aoao mai e o’u faiaoga pele o le Peraimeri ma i vae o lo’u tina amioatua.
O Tanielu, o le na faasegisegia leona e ala i lona faatuatua i le Alii o Iesu Keriso ma le talosāaga a agelu o auaunaga a le Atua, o se tasi na vaaia o tatou aso i se faaaliga. I le faamatalaina o se faalepo mo le Tupu Papelonia o Nepukanesa, sa valoia ai e Tanielu le Ekalesia a le Alii o le a tulai mai i aso e gata ai, o se maa itiiti “na tofia i le mauga ae lei tofia e lima.”3 “E lei tofia e lima,” o lona uiga e ala i le faaolooloma’au mai luga, o le a faateleina ai le Ekalesia a le Alii i lona aofai seia oo ina tumu ai le lalolagi uma “e le faaumatia … [ae e] tumau lava e faavavau.”4
O se molimau maoae e faapea ua faataunuuina upu a Tanielu ao maimoa mai tagata o le Ekalesia, mai tuluiga uma o le laloagi, ma faafogafoga mai i le konafesi i le asō.
Sa faamatalaina e le Aposetolo tuuto o Peteru ia “tausaga e toe fuatai ai mea uma lava … talu mai anamua.”5 Sa tusia e le Aposetolo o Paulo e faapea o le atoatoaga o taimi, o le a “faapotopotoina [ai e le Atua] … [mea uma] ia Keriso.”6 “O Iesu Keriso o le maatulimanu lava Ia.”7 Sa ou matua lagonaina malosi na valoaga ina ua ou auai i le faapaiaga o le Malumalu o Roma Italia. Sa i ai uma perofeta ma aposetolo iina ma tuuina atu molimau ia Iesu Keriso, o le Togiola o le lalolagi, e pei foi ona sa faia e Peteru ma Paulo. O le Ekalesia o se faataitaiga ola o lena toefuataiga, uso e ma tuafafine, ma o o tatou tagata o ni molimau o na valoaga ua loa mai luga.
Sa valoia e Iosefa o Aikupito e faapea i aso e gata ai “o le a faatu mai e le Alii loʼu Atua se tagatavāai, o lē o le a avea ma tagatavāai filifilia i le fua o oʼu sulugatiti.”8 “Ona o le a ia faia [le] galuega [a le Alii].”9 O Iosefa Samita, le perofeta o le Toefuataiga, o le tagatavaai lena.
Na valoia e Ioane le Talifaaaliga se agelu a le Silisiliese e tuufaatasia elemene taua o le Toefuataiga i upu nei: “Na a’u iloa foi le tasi agelu ua lele i le taulotoaiga o le lagi, ua ia te ia le tala lelei e faavavau e folafola atu i e nonofo i le lalolagi i atunuu uma, ma itu aiga, ma gagana eseese, ma nuu.”10 O Moronae o le agelu lena. Sa vaai o ia i o tatou taimi e pei ona faamaumauina i totonu o le Tusi a Mamona. I le tele o taimi na faaali mai ai o ia, sa ia saunia ai Iosefa Samita mo lana galuega, e aofia ai le faaliliuga o le Tusi a Mamona: O Se Tasi Molimau ia Iesu Keriso.
Na muai ta’u mai e isi perofeta o tatou taimi. Na tautala Malaki e uiga ia Elia e faaliliuina “loto o matua i fanau, ma loto o fanau i o latou matua.”11 Ua sau Elia, ma o le taunuuga, o le taimi nei, ua 168 o tatou malumalu ua faagaoioi ma ua salalau i le lalolagi. Ua auauna atu malumalu taitasi i tagata agavaa o le Ekalesia ua osia ai feagaiga ma maua ai sauniga paia mo i latou lava faapea o latou tuaa ua maliliu. O lenei galuega paia sa faamatalaina e Malaki o le “totonugalemu i le fuafuaga a le Foafoa mo le taunuuga e faavavau o Ana fanau.”12
Ua tatou ola i lena taimi na valoia, o i tatou o le nuu na nafa ma le faafeaoina o le Afio Mai Faalua o Iesu Keriso; e tatau ona tatou faapotopotoina mai fanau a le Atua, o i latou o le a faalogo ma talia upumoni, feagaiga, ma folafolaga a le talalelei e faavavau. Ua faaigoaina e Peresitene Nelson “o le luitau aupito sili, o le mafuaaga aupito sili, ma le galuega aupito sili ua i ai i le lalolagi i ona po nei.”13 Ou te tuuina atu la’u molimau i lena vavega.
O se galuega na tofia ai a’u e Peresitene Russell M. Nelson, ia Fepuari o le tausaga nei sa ou faapaiaina ai le Malumalu o Durban i Aferika i Saute. O se aso o le a ou manatuaina pea i lo’u olaga atoa. Sa ou mafuta ai faatasi ma tagata o le Ekalesia o e na o mai i le talalelei e faapei ona sa valoia e Ieremia i ona po ua leva—“e taitasi i aai, ma le taitoalua i aiga.”14 O le aoaoga faavae a Iesu Keriso ua tuufaatasia ai i tatou uma—i le lalolagi atoa—o ni atalii ma afafine o le Atua, o ni uso ma ni tuafafine i le talalelei. Pe o a lava foliga o o tatou lavalava, o i tatou lava o se nuu e tasi i se Tama i le Lagi, o lana fuafuaga mai le amataga sa i ai ma o loo i ai nei e mo Lona aiga ia tuufaatasia e ala i le osia ma tausia o feagaiga paia i le malumalu.
I se potopotoga toaitiiti o e na umia le perisitua i se faleaoga i Katelani, Ohaio, i le 1834, sa valoia ai e le Perofeta o Iosefa, “Ua na o sina aofaiga toaitiiti lava o le Perisitua o loo outou vaai atu i ai i le po nei, ae o lenei Ekalesia o le a faatumulia ai Amerika i Matu ma Saute—o le a faatumulia ai le lalolagi.”15
I tausaga talu ai nei sa ou femalagaai ai i le salafa o le lalolagi e feiloai i tagata o le Ekalesia. Sa faapena foi ni tofitofiga o o’u Uso o le Korama a le Toasefululua. Ae tusa lava, o ai se na te gafataulimaina le faasologa o malaga a lo tatou perofeta pele, o Peresitene Nelson o ana femalagaaiga i uluai tausaga e lua o le avea ai ma Peresitene o le Ekalesia ua feiloai atu ai o ia i le Au Paia i le 32 atunuu i teritori o le I.S.16 e molimau atu i le Keriso soifua.
Ou te manatua ina ua ou mauaina lo’u valaauga o le misiona o se alii talavou. Sa ou manao ou te talai i Siamani, e pei o lo’u tama, uso, ma le toalua o lo’u tuafafine. Ou te lei manao e faatali sei taunuu mai se isi i le fale, o lea sa ou faanatinati atu ai i le pusameli ma tatala le valaauga. Sa ou faitauina e faapea ua valaauina a’u i le Misiona a Setete i Sasae, o le laumua e i le Aai o Niu Ioka. Sa ou le fiafia, o lea sa ou alu ai i totonu ma susue a’u tusitusiga paia mo se faamafanafanaga. Sa amata ona ou faitau i le Mataupu Faavae ma Feagaiga: “Faauta, ma tagai ua ia te au ni tagata e toatele i le nofoaga lenei, i itulagi faataamilo ai; ma o le a tatalaina se faitotoa aoga i itulagi faataamilo i le laueleele i sasae.”17 O lena valoaga, na tuuina atu i le Perofeta o Iosefa Samita i le 1833, o se faaaliga mo a’u. Sa ou iloaina i lena taimi ua valaauina a’u i le misiona tonu na finagalo le Alii ou te galue ai. Sa ou aoao atu le Toefuataiga ma lona amataga maoae na amata ina ua malele mai lo tatou Tama i le Lagi ia Iosefa Samita ma faapea mai, “O Lo’u Atalii Pele Lenei. Faalogo ia te Ia!”18
E taua tele i le Ekalesia atoa le valoaga a Isaia, na le silia ma le 700 tausaga a o lei soifua mai Iesu Keriso: “O aso e gata ai, e oo ina faatumauina ai o le mauga o i ai le fale o le Alii … , ona gasolo ane ai lea o nuu uma i ai.”19
I lo’u mafaufau i le asō, ua ou vaaia ai le faitau miliona o o tatou tagata ma uo o loo fesootai mai faaeletonika i nei taualumaga e ala i televise, initoneti, ma isi auala. Ua tatou saofafai i lalo e faapei o faatasitasi “i tumutumu o atu mauga.”20 O Polika Iaga lea na saunoa i upu faaperofeta “O le nofoaga tonu lenei.”21 O le Au Paia, o ni isi o i latou o o’u lava tuaa paionia, sa galulue i le faatuina o Siona i Mauga Papa “e ala i le loto ma le finagalo malie o ia o lē pulea atunuu uma o le lalolagi.”22
Ou te tu atu nei i luga o le eleele sa na tosina maia le faitau miliona o tagata asiasi mai. I le 2002, na talimalo ai le Aai o Sate Leki i taaloga Olemipeka o le Taumalulu. Sa pepese le Aufaipese a le Tapeneko i sauniga tatala, ma sa ofoina atu e le Ekalesia ia konaseti ma polokalama mo malo ma i latou sa pa’au mai i ai mai le anoanoai o atunuu. O le a ou manatuaina pea lava le vaaia o le malumalu i tua atu o faasalalauga o talafou i po taitasi i le lalolagi atoa.
I le gasologa o le tele o tausaga, sa autovaa mai ai peresitene o le Iunaite Setete, o tupu, faamasino, palemia, amepasa, ma taitai o le tele o atunuu i le Aai o Sate Leki ma feiloai ai ma o tatou taitai. Sa talimalo Peresitene Nelson i taitai o le National Association for the Advancement of Colored People [Mafutaga Faaleatunuu mo le Siitiaina o Tagata Uli], o se faalapotopotoga i le Iunaite Setete ua matua faatauaina aia tatau tutusa e aunoa ma se faailogalanu. Ou te manatua lo’u tu ai i autafa o nei uo ma taitai a o faatasi atu Peresitene Nelson ia i latou i le faaaloalogia sili atu ma le nofolelei ma ituaiga i le lalolagi.23
E anoanoai isi ua malaga mai i le Lotoa o le Malumalu ma fefautuaai ai ma taitai o le Ekalesia. Mo se faataitaiga, o le tausaga na te’a nei, o le a ta’ua na o ni isi, sa matou faafeiloa’ia ai le Konafesi a le Mafutaga Taualoa a Malo Aufaatasi Lona 68, o se aofaiga o atunuu uma o le lalolagi, ma o le uluai tauaofiaga muamua lea ua faia i fafo atu o le Aai o Niu Ioka. Sa matou fono ma le Komiti a Viatename mo Mataupu Faalelotu ma amepasa mai Kiupa, o Filipaina, Atenitina, Romania, Sutana, Qatar, ma Saudi Arabia. Sa matou faafeiloaia foi le failautusi aoao o le Au Musalemi o le Lalolagi.
O mea o loo ou faamatalatalaina atu o se faataunuuga o le valoaga a Isaia e faapea o aso e gata ai, o le a lolofi mai malo i “le mauga o i ai le fale o le Alii.”24 O le Malumalu tele o Sate Leki, o loo tu i le totonugalemu o lena mamalu malualii.
E le o le faataatiaga o teuga o le laufanua o loo ta’a’ina mai ai tagata, e ui ina matagofie la tatou atamamanu; o le fatu o le faatuatuaga mama a’ia’i e faaalia i le agaga, faatupulaia, tausaafia, ma le agalelei o Le Ekalesia a Iesu Keriso o le Au Paia o Aso e Gata Ai ma ona tagata; o lo tatou alofa e faapei ona alofa mai o le Atua; o lo tatou tautino atu i se galuega e maualuga atu, lea sa ta’ua e Iosefa Samita, “o le fuafuaga faatuina a Keriso.”25
Tatou te le iloa pe o afea e toe foi mai ai le Faaola, ae o le mea lenei ua tatou iloa. E tatau ona tatou saunia i le loto ma le mafaufau, ia agavaa e talia o Ia, ma faamamaluina ia avea o se vaega o mea uma ua loa ona valoia.
Ou te molimau atu o Peresitene Russell M. Nelson o le perofeta a le Alii i le lalolagi, ma o i ona autafa ia Aposetolo na valaauina e le Atua, ma lagolagoina o ni perofeta, tagatavaai, ma talifaaaliga. Ma, o’u uso e ma tuafafine, o loo faaauau pea le Toefuataiga.
Ou te faaiu atu i le valoaga a Iosefa Samita, o upu ou te molimau atu ai e moni: “E leai se lima eleelea e mafai ona taofia le galuega mai le alualu i luma; e ono tula’i mai sauaga, e ono tuufaatasia tagata faatupu faalavelave, e ono faapotopotoina vaegaau, e ono taufaasese tuua’iga, ae o le upumoni a le Atua o le a agai pea i luma ma le manino, mamalu, ma le tutoatasi, seia oo ina so’o uma ai konetineta, ma asiasi atu i atunuu uma, ma aofia ai malo uma, ma lagonaina e taliga uma, seia oo ina faataunuuina faamoemoega o le Atua, ma seia oo ina fetalai mai le Ieova Silisiliese, ua mae’a le galuega.26 Ou te molimau atu ua faataunuuina nei valoaga a Iosefa Samita.
Ou te folafola atu a outou mulimuli i fautuaga musuia a lo tatou perofeta pele, o Peresitene Russell M. Nelson, o ona fesoasoani, o Aposetolo, ma isi taitai o le Ekalesia, ma a outou gauai atu i perofeta anamua o e sa mua’i ta’ua o tatou aso, o le a faatumuina outou, i le ta’ele o outou loto ma agaga, i le agaga ma le galuega o le Toefuataiga. Ou te folafola atu o le a outou vaai i le aao o le Atua i o outou olaga, faalogo i Ana uunaiga, ma lagonaina Lona alofa. I le suafa o Iesu Keriso, ma le lotofaafetai mo le Toefuataiga mai o Lana talalelei ma Lana Ekalesia, o se faamaoniga o Lona alofa e le mafuatiaina, amene.