Ahmad S. Corbitt

Fesoasoani Muamua i le Au Peresitene Aoao o Alii Talavou

O Ahmad S. Cobitt, 57, na soifua mai ia Aokuso 1962 ia James Earl Crbitt ma Amelia Corbitt. Sa matitiva le aiga ma sa nonofo i falemautotogi taugofie o le malo i Filatelefia Penisilevania, ISA, sa vagaia e le au solitulafono ma faatupu faalavelave. Sa le’i saogalemu le feoai mai lea pitonuu i lea pitonuu.

Ae o uunaiga faaleagaga a lona tina sa taialaina ai lana fanau e toa 10 ma sa tausisia ai lo latou saogalemu. Sa ia iloa lelei lava le taimi e tatau ai ona taaalo lana fanau i fafo ma le taimi e tatau ai ona nonofo i totonu.

O le nofouta faaleagaga lena na taitai mulimuli ane ai o ia e valaaulia ia faifeautalai mai Le Ekalesia a Iesu Keriso o le Au Paia o Aso e Gata Ai i totonu o lona fale. O le tele o lona soifuaga faatamaitiiti ma lona talavou, sa tapuai ai Ahmad ma lona aiga faatasi ma le Nuu o Isalama, ma sa mulimuli ane papatiso o ia i le lotu Porotesano. Ae o le taimi nei sa ia lagonaina le alofagia o ia e le faapotopotoga o le Au Paia o Aso e Gata Ai.

Sa papatisoina lona tina ma nisi o nai ona tei i le masina na sosoo ai. I le aso 16 o Aokuso, i lona aso fanau lona 18, sa ulu ifo ai foi Ahmad i le vai o le papatisoga. Na auai lona tama fai, o Henry Brandford Campbell, i le Ekalesia i le tausaga na sosoo ai.

“Sa le o se mea na faatatau moni ia i matou,” o lana tala lea. “Sa o se mea na faatatau i le Atua ma le mea sa Ia finagalo matou te faia. Sa matou naunau e lotomaualalo ma i ai le faitalia. Sa Ia taitaia i matou.”

Ina ua uma le Kolisi o Ricks, ma auauna i le Misiona a Puerto Rico San Juan mai le 1982 i le 1984, sa feiloai i la’ua ma Jayne Joslin i se malaga a le autalavou matutua nonofofua i le malumalu. Sa faaipoipo i la’ua i le aso 24 Aokuso, 1985, i le Malumalu o Uosigitone D.C, ma o i laua o ni matua o se fanau e toaono.

Mo le iva tausaga na sosoo ai, sa faigaluega o ia i le ao ma a’oga i le po, ma sa maua ai ona faailoga mai le Kolisi a Richard Stockton o New Jersey ma le Aoga Faaloia a le Iunivesite o Rutgers.

Sa avea o ia ma fesoasoani i le au peresitene o se siteki, peresitene o le siteki, fautua maualuga, ma le peresitene o le Misiona a Dominican Republic Santo Domingo East.

Sa faigaluega Uso Corbitt o se loia faataitai, i sootaga a tagata lautele ma o se faatonusili o le Ofisa o le Ekalesia i Niu Ioka o Mataupu Lautele ma Faavaomalo. O loo faafaigaluega nei o ia e le Matagaluega o Faifeautalai a le Ekalesia.